ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – មានឱកាសជាច្រើនដែលឪពុកម្ដាយអាចពង្រឹងការយល់ដឹងរបស់កុមារ រាប់ទាំងជំនាញនិយាយនិងភាសា សមត្ថភាពនៃការគិត និងភាពវៃឆ្លាតបស់កូនៗនៅផ្ទះ។ ចាប់ពីកាយវិការរហូតដល់ការបង្កើតពាក្យរបស់កុមារ មានវិធីជាច្រើនដើម្បីបញ្ចូលការរៀនសូត្រក្នុងសកម្មភាពសប្បាយៗរបស់ឪពុកម្ដាយជាមួយកូនៗរបស់ខ្លួន។
ទី១. អានសៀវភៅជាមួយកូនរបស់អ្នក៖ ឪពុកម្ដាយអាចទៅរកមើលសៀវភៅថ្មីៗនៅបណ្ណាល័យដោយផ្ទាល់ បញ្ជារទិញតាមប្រព័ន្ធអនឡាញក៏បាន ឬរកមើលសៀវភៅចាស់ៗដែលធ្លាប់មានយកមកអានឡើងវិញជាមួយកូនៗ ។ ការអានសៀវភៅជាមួយកូនៗរបស់អ្នក គឺជាផ្លូវមួយជួយជំរុញល្បឿន និងភាសារបស់កុមារបានមួយកម្រិតខណៈមានការចូលរួមលើកទឹកចិត្តពីឪពុកម្ដាយឱ្យរៀនជំនាញអក្ខរកម្មដំបូង។ ឧទាហរណ៍ ឪពុកម្ដាយអាចចំណាយពេលអានសៀវភៅឱ្យកូនស្ដាប់ ដោយបញ្ចូលជាមួយសកម្មភាពតម្រៀមអក្សរខ្លះៗ ដែលជាផ្នែកមួយជួយឱ្យកូនមានភាពរីករាយ និងទទួលបានការយល់ដឹងថ្មីបន្ថែម។
ទី២. រៀនចំណាំរូបរាង និងពណ៌៖ បើតាមគេហទំព័រ Think Tank Scholar កុមារជាច្រើនបានត្រៀមខ្លួនរួចជាស្រេចដើម្បីចាប់ផ្តើមរៀនអំពីរូបរាង និងពណ៌នៅពេលដែលពួកគេមានអាយុ ១៨ខែ បើទោះបីជាកុមារម្នាក់ៗមានភាពខុសគ្នាក៏ដោយ។ ទន្ទឹមគ្នានេះ ឪពុកម្ដាយត្រូវអនុវត្តបង្ហាត់កូនៗឱ្យចំណាំរូបរាង និងពណ៌ឱ្យបានញឹកញាប់។ ការស្គាល់រាង និងពណ៌ គឺជាផ្នែកមួយដ៏សំខាន់ក្នុងការអភិវឌ្ឍជំនាញការគិតពិចារណា និងជួយផ្តល់ភាសាដល់កុមារដើម្បីចាត់ថ្នាក់ និងពណ៌នាអំពីពិភពលោកជុំវិញពួកគេ។
ទី៣. លេងហ្គេមលក្ខណៈគ្រួសារ៖ ការលេងហ្គេមលើកទឹកចិត្តឱ្យមានវេនផ្លាស់ប្ដូរម្នាក់ម្ដង ការអនុវត្តច្បាប់ ជំនាញសង្គម និងការយល់ដឹងអំពីទិសដៅ។ ហ្គេមភាគច្រើនលើកទឹកចិត្តអ្នកលេងច្រើននាក់ក្នុងពេលតែមួយ ដើម្បីសាច់ញាតិអាចចូលរួមសប្បាយបានទាំងអស់គ្នា។ ដូច្នេះ ឪពុកម្ដាយអាចជ្រើសរើសហ្គេមលេងកម្សាន្តជាមួយកូនៗរបស់ខ្លួនដូចជា ហ្គេមក្តារ (Boats Game) ជួយបង្កើតការចងចាំ តក្កវិជ្ជា និងថាមពលនៃការអភិវឌ្ឍន៍កុមារ។ ដោយឡែក ហ្គេមកាត (Cards Game) អាចបង្រៀនជំនាញគណិតវិទ្យា និងការចងចាំ ក៏ដូចជាការគិតបែបយុទ្ធសាស្ត្រ ដែលចិត្តវិទូ និងសង្គមវិទូបានលើកឡើង។
ទី៤. សួរសំណួរ ៖ បើតាមគេហទំព័រ Under5s.co.nz កុមារដែលត្រូវបានបង្រៀនឱ្យគិតតាំងពីតូចតាមរយៈសំណួរបើកចំហ គឺជាការបញ្ជ្រាបឱ្យយល់កាន់តែច្បាស់អំពីពិភពលោកជុំវិញពួកគេ ហើយភ្ជាប់ព័ត៌មានថ្មីនេះទៅនឹងបទពិសោធន៍អតីតកាល ឬបច្ចុប្បន្ន។ លើសពីនេះ សំណួរដែលឪពុកម្តាយសួរ គឺជាសំណួរបើកចំហមិនមានចម្លើយត្រឹមត្រូវ ឬខុសទេ ដើម្បីជួយពង្រីកដំណើរការគិតរបស់កុមារ អភិវឌ្ឍជំនាញនិយាយ និងភាសារបស់ពួកគេ និងបង្កើនទំនុកចិត្តលើសមត្ថភាពរបស់ពួកគេក្នុងការបញ្ចេញមតិដោយប្រើពាក្យនិយាយ។
ទី៥. នាំកូនដើរលេងកម្សាន្ត៖ ប្រសិនបើឪពុកម្ដាយចង់ផ្លាស់ប្តូរទេសភាព បរិយាកាសក្នុងផ្ទះ អាចរៀបចំផែនការធ្វើដំណើរមួយថ្ងៃ ដោយនាំកូនៗទៅលេងនៅឧទ្យានជាតិ ឆ្នេរសមុទ្រ សារមន្ទីរ ឬសួនសត្វជាដើម។ លើសពីនេះ ការផ្តល់ឱ្យកូនៗរបស់អ្នកនូវបទពិសោធន៍ផ្សេងៗគ្នានឹងផ្តល់ឱ្យពួកគេចេះនូវពាក្យពេចន៍ថ្មីៗជាច្រើន។ នេះបានបង្ហាញថា កុមារសម្របទៅនឹងបរិយាកាស និងស្ថានភាពផ្សេងៗ ហើយថែមទាំងបង្កើតទំនាក់ទំនងជាមួយសៀវភៅដែលពួកគេអានផងដែរ៕
