ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ជាទូទៅ គោលដៅនិងសកម្មភាពដែលយើងប្រព្រឹត្តិនៅពេលក្រោកពីដំណេក គឺដើម្បីពង្រឹងសុខុមាលភាព ប៉ុន្តែទម្លាប់មនុស្សម្នាក់ៗគឺមានភាពខុសៗគ្នា ដូចជា ហាត់យូហ្កា ធ្វើសមាធិ រាំកម្សាន្តតាមចង្វាក់ភ្លេង រីករាយនឹងធ្វើអាហារពេលព្រឹក ឬក៏ប្រឡែងលេង ជាមួយក្មេងៗក្នុងផ្ទះជាដើម ។ យ៉ាងណាមិញ បន្ទាប់ពីបានដឹងរាល់ សកម្មភាពដែលផ្តល់នូវភាពវិជ្ជមានហើយ ការជៀសវាងរាល់សកម្មភាពដែលមិនល្អ នៅតែមានភាពចាំបាច់ដដែល។ តាមរយៈគេហទំព័រ Cheapism បានបង្ហាញគន្លឹះ៧ចំណុច ដែលត្រូវតែជៀសវាងពេលក្រោកពីគេង ដោយមានរៀបរាប់លម្អិតដូចតទៅ ៖
១. ចុចបិទម៉ោងរោទ៍ រួចគេងបន្ត ៖ ទាញនាឡិកា ឬទូរស័ព្ទដើម្បីចុចបិទម៉ោងរោទ៍ភ្លាមៗបន្ទាប់ពីសម្លេងរំពងពេញបន្ទប់គេង ទំនងជាផ្តល់នូវសេចក្ដីសុខក្នុងការគេងបន្ត។ ប៉ុន្តែជាការបង្កើតទម្លាប់ឱ្យលង់លក់បន្តក្នុងរយៈពេលវែង ហើយការពន្យារពេលនៃការគេងទៀតសោធ ខួរក្បាលនឹងចាប់បានថា ជាការចាប់ផ្តើមចូលគេងសាជាថ្មី ដែលបណ្តាលឱ្យខកខានម៉ោងទៅធ្វើការ ឬទៅសាលាជាដើម។
២. ឆែកទូរស័ព្ទ ៖ បទពិសោធន៍ទាញទូរស័ព្ទមកឆែកពេលងើបពីដំណេក មនុស្សភាគរយច្រើនសុទ្ធតែបានជួបប្រទះ ដោយហេតុថា ក្នុងបរិបទជឿនលឿននេះ យើងត្រូវការតាមដានអ៊ីមែល អត្ថបទព័ត៌មាន និងរឿងរ៉ាវជាច្រើនក្នុងបណ្តាញសង្គម យ៉ាងណាមិញ ត្បិតថាការតាមដានស្ថានភាពប្រចាំថ្ងៃមានសារៈសំខាន់ ប៉ុន្តែសកម្មភាពទាំងនេះ មិនបានផ្តល់ផលល្អនៅពេលភ្ញាក់ពីដំណេកភ្លាមៗនោះទេ ព្រោះអាចបង្កនូវភាពតានតឹងបន្ថែម ។
៣. នៅក្នុងកន្លែងងឹត ៖ នៅពេលដែលកន្លែងគេងមានសភាពងងឹតខ្លាំង ទោះបីជាដល់ម៉ោងភ្ញាក់ហើយក៏ពិតមែន ប៉ុន្តែមិនបានធ្វើឱ្យស្មារតីមានភាពស្រស់បស់នៅឡើយទេ។ បន្ទប់គេងងងឹត បានជះឥទ្ធិពលទៅកាន់រាងកាយឱ្យលង់លក់បន្តទៀត ដោយសារតែខួរក្បាលទទួលបានសញ្ញាណថា នៅតែជាពេលយប់នៅឡើយ។ ដូច្នេះ សូមកុំនៅកន្លែងងងឹត ពេលទើបនឹងភ្ញាក់ពីគេង គួរតែបើកវាំងនងឱ្យពន្លឺជះចូលបន្ទប់ ឬក៏ដើរចេញទៅស្រូបខ្យល់អាកាសនៅក្រៅបន្ទប់។
៤. មិនញាំអាហារពេលព្រឹក ៖ អាហារពេលព្រឹកមានតួនាទីសំខាន់ក្នុងរយៈពេលពេញមួយថ្ងៃ ទោះបីជាលោកអ្នកប្រញាប់ ឬក៏ក្រោកយឺតយ៉ាងណាក៏ដោយ។ ដើម្បីបង្ហាញពីការគិតគូរដល់ខ្លួនឯង គួរឆ្លៀតពេលបន្តិចបន្តួចដើម្បីបរិភោគអាហារសម្រន់ ឬក៏ផ្លែឈើ ព្រោះអាចបង្កើនថាមពលរាងកាយបានពេញមួយថ្ងៃ។ ការដែលមិនបរិភោគអាហារពេលព្រឹក ជះឥទ្ធិពលអវិជ្ជមានទៅកាន់សុខភាព ដូចជា ជំងឺទឹកនោមផ្អែមប្រភេទ២ ឬឈឺក្រពះជាដើម។
៥. មិនទទួលទានទឹក ៖ បន្ទាប់ពីគេងអស់រយៈពេលច្រើនម៉ោង រាងកាយមនុស្សត្រូវការចាំបាច់នោះគឺជាតិទឹកចូលទៅក្នុងខ្លួន ហើយការមើលរំលងសកម្មភាពទទួលទានទឹក អាចថា ជារឿងគ្រោះថ្នាក់មួយសម្រាប់សុខភាព ទាំងក្នុងរយៈពេលខ្លី និងពេលវែង។ ត្រឹមតែទឹកមួយកែវបំពេញទៅក្នុងពោះទទេ អាចការពារជំងឺជាច្រើន ហើយផ្តល់ប្រយោជន៍ចំពោះសុខភាពទូទៅយ៉ាងអនេក ហើយទឹកក៏ជាចំណែកជួយសម្រកគីឡូបានដែរ។
៦. បង្អែបង្អង់នៅលើគ្រែយូរពេក ៖ ភ្ញាក់ពីគេង មិនប្រាកដថាក្រោកពីគេងនោះទេ មនុស្សគ្រប់គ្នាសុទ្ធតែឆ្លងកាត់នូវបទពិសោធន៍មួយនេះ ។ ពីព្រោះគ្រែគេង និងខ្នើយ ក្នុងបន្ទប់ផ្ទាល់ខ្លួន ជាកន្លែងដែលមានសុវត្ថិភាព និងភាពកក់ក្តៅក្រៃលែង។ យ៉ាងណា ការភ្ញាក់ហើយនៅបន្តគេងត្រាំត្រែងក្នុងរយៈពេលយូរ គឺអាចប៉ះពាល់ដល់ផលិតភាព នៅពេលបំពេញការងារ ដែលជាហេតុបង្ហាញឱ្យឃើញថា បង្អែបង្អង់នៅលើគ្រែយូរពេក ប៉ះពាល់ដល់ការជំរុញភាពច្នៃប្រតិដ្ឋ។
៧. ញាំអាហារមានជាតិស្ករខ្ពស់នៅពេលព្រឹក ៖ ជ្រើសអាហារដែលមានជាតិស្ករខ្ពស់ ក្នុងការទទួលទានពេលព្រឹក បណ្តាលឱ្យបង្អាក់ក្នុងការបញ្ចេញនូវថាមពល ដោយឡែកគួរជ្រើសអាហារណាដែលមានតុល្យភាពរួមបញ្ចូលដូចជា ប្រូតេអ៊ីន ខ្លាញ់ដែលមានសុខភាពល្អ អាហារមានជាតិសរសៃ ថ្វីត្បិតអាហារប្រភេទទាំងនេះមានជាតិស្ករខ្លះដែរ ប៉ុន្តែខុសគ្នាត្រង់ថា អាចរក្សាថាមពលបានយូរ៕
