ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
សុខភាពផ្លូវចិត្តរឹងមាំ មានសារៈសំខាន់ក្នុងការរស់នៅ និងជាប្រភពមួយនៃសុភមង្គលសម្រាប់យើងទាំងអស់គ្នា រួមទាំងមនុស្សចាស់ផងដែរ។ ទោះបីជាយ៉ាងណាក៏ដោយ ក្នុងប៉ុន្មានឆ្នាំថ្មីៗនេះ អ្នកជំនាញរកឃើញថា មនុស្សវ័យចំណាស់មួយចំនួនធំកំពុងជួបបញ្ហាសុខភាពផ្លូវចិត្តញឹកញាប់ជាងពេលណាទាំងអស់ ខណៈអង្គការសុខភាពពិភពលោក (WHO) រាយការណ៍ថា ១៤ភាគរយ នៃអ្នកដែលមានអាយុលើសពី ៦០ឆ្នាំ កំពុងតស៊ូជាមួយនឹងជំងឺផ្លូវចិត្ត ហើយថាមនុស្សដែលមានអាយុលើសពី ៦០ឆ្នាំ មានអត្រាធ្វើអត្តឃាតច្រើនជាងមួយភាគបួនក្នុងមួយឆ្នាំ (២៧,២%) ។
បញ្ហាប្រឈមដែលមនុស្សវ័យចំណាស់ កំពុងជួបប្រទះមានចំនួន ៤សំខាន់ៗ រួមមាន ការបាក់ទឹកចិត្ត ការថប់បារម្ភ ការប្រើប្រាស់សារធាតុញៀន និងបញ្ហាវង្វេង និងភ្លេចភ្លាំង។ បើតាមការសិក្សា មានមូលហេតុជាច្រើន ដែលនាំឱ្យមនុស្សវ័យចំណាស់ ត្រូវប្រឈមនឹងបញ្ហាផ្លូវចិត្ត ក្នុងនោះមានដូចជា ការបាត់បង់មនុស្សជាទីស្រឡាញ់ ការចូលនិវត្តន៍ ភាពឯកា ជំងឺប្រចាំកាយ និងការថយចុះមុខងារយល់ដឹង និងវែកញែកហេតុផល។ យ៉ាងណាក៏ដោយ ការស្រាវជ្រាវ បានបង្ហាញពីជំហានចំនួន ៤ ដើម្បីការពារមនុស្សវ័យចំណាស់ពីបញ្ហាផ្លូវចិត្ត។
១. រៀបចំរបៀបរស់នៅដែលនាំឱ្យមានសុខភាពល្អ ៖ ការរៀបចំ និងដឹកនាំជីវិតឱ្យមានសុខភាពល្អ ត្រូវរួមបញ្ចូលនូវធាតុសំខាន់ៗមួយចំនួន ក្នុងនោះរួមមាន របបអាហារមានតុល្យភាព មានសកម្មភាពរាងកាយទៀងទាត់ អនាម័យល្អ ចូលគេងទៀងម៉ោង កាត់បន្ថយការប្រើប្រាស់សារធាតុញៀន និងមានទម្លាប់ជួបពិគ្រោះជាមួយគ្រូពេទ្យ និងពិនិត្យសុខភាពជាប្រចាំ។
២. មានទំនាក់ទំនងសង្គម ៖ មនុស្សវ័យចំណាស់មានអារម្មណ៍ងាយស្រួល នៅពេលផ្ដាច់ខ្លួនពីសង្គម និងរស់នៅម្នាក់ឯង ក្នុងបរិយាកាសស្ងប់ស្ងាត់ ប៉ុន្តែការចូលរួម និងបង្កើតទំនាក់ទំនងក្នុងសង្គម គឺជារឿងសំខាន់បំផុតមួយ ដែលមនុស្សវ័យចំណាស់អាចធ្វើបានសម្រាប់ការលើកកម្ពស់សុខភាពខ្លួនឯង។ ការបង្កើតទំនាក់ទំនងសង្គម អាចការពារយើងពីភាពឯការ៉ាំរ៉ៃ និងពង្រឹងមុខងារយល់ដឹង និងវែកញែកហេតុផល។
៣. ពង្រឹងសុវត្ថិភាពហិរញ្ញវត្ថុ ៖ ការចូលនិវត្តន៍នឹងនាំឱ្យមានការផ្លាស់ប្ដូរដ៏ធំក្នុងការរស់នៅ ហើយការផ្លាស់ប្ដូរចម្បងនោះគឺ របៀបរស់នៅ និងរចនាសម្ព័ន្ធហិរញ្ញវត្ថុ។ ដូច្នេះ សុវត្ថិភាពហិរញ្ញវត្ថុពិតជាមានសារៈសំខានណាស់ សម្រាប់មនុស្សវ័យចំណាស់ ព្រោះវាអាចកាត់បន្ថយភាពតានតឹង និងការព្រួយបារម្ភ។
៤. មានគោលបំណងជីវិត ៖ របៀបរស់នៅដែលអំណោយផលសម្រាប់មនុស្សវ័យចំណាស់ គឺចាំបាច់ត្រូវមានទម្លាប់ និងរចនាសម្ព័ន្ធ ដែលជំរុញឱ្យមានគោលបំណង និងមានភាពសកម្មក្នុងជីវិតជាប្រចាំ។ ដើម្បីបង្កើតគោលបំណងជីវិត អាចធ្វើបានតាមរយៈការបង្កើតចំណងចំណូលចិត្តថ្មីៗ ការភ្ជាប់ទំនាក់ទំនងជាមួយមនុស្សជាទីស្រឡាញ់ និងចូលរួមកម្មវិធីផ្សេងៗក្នុងសហគមន៍ជាដើម៕
