ក្រុមអតីត​សិស្សអ៊ីធូស្ទេម ព្រះយុគន្ធរ កំពុងតែជ្រើសរើស​សិស្ស​វិទ្យាល័យជាច្រើន​នាក់ ក្នុងការ​ចូលរួម​ប្រកួតកម្មវិធីរ៉ូបូតថ្នាក់អន្តរជាតិ FIRST Global Challenge 2024 ដែលនឹងធ្វើឡើងនៅទីក្រុងអាតែន (Athens) ប្រទេសក្រិក (Greece) នៅថ្ងៃទី២៦ដល់២៩ ខែកញ្ញា ឆ្នាំ២០២៤ ខាងមុខ។

កញ្ញា ឆាយ គីមអេង អតីតសិស្សអ៊ីធូស្ទេម ព្រះយុគន្ធរ ដែលធ្លាប់ចូលរួមប្រកួតរ៉ូបូតនៅប្រទេសស្វីសនៃកម្មវិធី FIRST Global Challenge ឆ្នាំ២០២២ និងជាប្រធានក្រុម  Makerspace 105 បានប្រាប់ឱ្យដឹងថា បច្ចុប្បន្នក្រុមរបស់ខ្លួនកំពុងជ្រើសរើសសិស្សវិទ្យាល័យដើម្បីចូលរួមនៅក្នុងកម្មវិធីប្រកួតប្រជែងរ៉ូបូតថ្នាក់អន្តរជាតិ FIRST Global Challenge 2024 ដែលនឹងធ្វើឡើងនៅទីក្រុងអាតែន ប្រទេសក្រិក នាចុងខែកញ្ញា។ គីមអេង បន្តថា កម្មវិធី FIRST Global Challenge បានជ្រើសរើសបញ្ហាបរិស្ថានដែលពិភពលោកកំពុងជួបប្រទះ មកធ្វើជាប្រធានបទសម្រាប់សិស្សានុសិស្សរួមគ្នាធ្វើការជាក្រុម ដើម្បីសាងសង់រ៉ូបូតមួយដែលជាការប្រៀបប្រដូចទៅនឹងដំណោះស្រាយដល់ប្រធានបទបរិស្ថាននោះ។

ប្រធានក្រុម  Makerspace 105 រូបនេះ បន្ថែមថា Makerspace 105 គឺជាគម្រោងសហគមន៍មួយដែលផ្ដួចផ្ដើមឡើងដោយអតីតសិស្សអ៊ីធូស្ទេម ដើម្បីជំរុញឱ្យសិស្សវិទ្យាល័យនៅកម្ពុជាទទួលបានឱកាសវគ្គសិក្សាខ្លីអំពីរ៉ូបូទិក និងកម្មវិធីប្រកួតប្រជែងផ្សេងៗនៅក្នុងវិស័យស្ទេម។ កញ្ញា បន្តថា នៅក្នុងកម្មវិធី FIRST Global សម្រាប់ក្រុមកម្ពុជាឆ្នាំនេះ នឹងមានការចូលរួមពីគ្រូបង្វឹកពីអតីតក្រុមកម្ពុជា FIRST Global ទាំង៥ជំនាន់ ដែលកំពុងសិក្សានៅក្នុងជំនាញបច្ចេកវិទ្យានៅសកលវិទ្យាល័យសរុបចំនួន ៦នាក់។

កញ្ញា ឆាយ គីមអេង បញ្ជាក់ថា តាមរយៈការចូលរួមនៅក្នុងកម្មវិធីនេះ សិស្សានុសិស្សនឹងទទួលបានផលប្រយោជន៍ដូចជា ជំនាញទន់ ៖ ការធ្វើការងារជាក្រុម, ការប្រើប្រាស់គំនិតច្នៃប្រឌិតខ្ពស់ក្នុងការដោះស្រាយបញ្ហា, ការអភិវឌ្ឍខ្លួនតាមរយៈការឆ្លុះបញ្ចាំង និងទទួលយកមតិរបស់មិត្តរួមក្រុម, ការផ្លាស់ប្ដូរបទពិសោធន៍ជាមួយសិស្សវិទ្យាល័យនៅតាមបណ្ដាប្រទេសនានា។ ជំនាញរឹង ៖ ការរចនារ៉ូបតដោយការគូសរូប 3D, ការអភិវឌ្ឍខ្លួននៅក្នុងជំនាញវិស្វកម្មមេកានិច, ការឌីស្សាញរូបភាព និងកាត់តវីដេអូទាក់ទងទៅនឹងស្ទេម សម្រាប់បង្ហោះក្នុងបណ្ដាញសង្គមនានា និងការសិក្សាស្រាវជ្រាវអំពីបញ្ហាបរិស្ថាន ដើម្បីសរសេរជាអត្ថបទពន្យល់។

អតីតសិស្សអ៊ីធូស្ទេម ព្រះយុគន្ធរ ចូលរួមប្រកួតរ៉ូបូតនៅប្រទេសស្វីសនៃកម្មវិធី FIRST Global Challenge ឆ្នាំ២០២២ រូបនេះ បន្ថែមថា សម្រាប់សិស្សានុសិស្សដែលត្រូវបានជ្រើសរើសនឹងមានឱកាសបង្វឹកពីអតីតក្រុមកម្ពុជា FIRST Global និងក្រុម Makerspace 105 ផ្ទាល់ចាប់ពីខែមិថុនា រហូតដល់ចុងខែកញ្ញា។ ក្នុងនោះ កម្មវិធីនឹងជ្រើសរើសសិស្សវិទ្យាល័យចំនួន ១០នាក់សម្រាប់បណ្ដុះបណ្ដាល ហើយក្នុងចំណោម១០នាក់ នឹងជ្រើសរើសសមាជិក ៣ទៅ៥ នាក់ ដើម្បីតំណាងក្រុមកម្ពុជាទៅចូលរួមប្រកួតនៅប្រទេសក្រិក ។ គួរបញ្ជាក់ផងដែរថា សិស្សានុសិស្សដែលចូលរួមទាំងអស់ មិនត្រូវបានចំណាយថវិកាក្នុងការចូលរួមឡើយ រួមទាំងសមាជិកដែលត្រូវធ្វើដំណើរទៅកាន់ប្រទេសក្រិកផងដែរ។ កម្មវិធីនឹងរ៉ាប់រងគ្រប់ការចំណាយដល់បេក្ខជនអំឡុងពេលប្រកួត (ខែកញ្ញាថ្ងៃទី២៦ ដល់២៩) រួមមាន ការធ្វើដំណើរ ការហូបចុក និង ការស្នាក់នៅជាដើម។

សម្រាប់លក្ខខណ្ឌបេក្ខជនចូលរួម ត្រូវតែជាសិស្សកំពុងសិក្សាថ្នាក់ទី៩, ១០ ឬថ្នាក់ទី១១, សិស្សដែលមាននូវចំណេះដឹងខាងផ្នែករ៉ូបូតខ្លះៗ ឬមិនមានបទពិសោធន៍សោះអាចចូលរួមបានដូចជា, មានចំណាប់អារម្មណ៍ខាងផ្នែករ៉ូបូត ការស្រាវជ្រាវ ការគ្រប់គ្រងបណ្ដាញសង្គម និងសកម្មភាពជួយសហគមន៍។

បេក្ខជនដែលចង់ចូលរួមប្រកួតរ៉ូបូតខ្នាតអន្តរជាតិនៅប្រទេសក្រិច អាចចុះឈ្មោះតាមរយៈ https://forms.gle/vr7cmxwiKyE2qZ278។ ផុតកំណត់ទទួលពាក្យនៅថ្ងៃទី ២០ ឧសភា ២០២៤។ ស្វែងយល់បន្ថែមពី 2024 FIRST Global Athens និងសកម្មភាពក្រុមកម្ពុជាក្នុងការចូលរួម ៥ ឆ្នាំកន្លងមកនេះ៕