ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
យោងតាម WE Forum បានឱ្យបានដឹងថា ប្រទេសស៊ុយអ៊ែតកំពុងរចនាទីក្រុងធ្វើពីឈើ Stockholm Wood ដែលនឹងក្លាយជាការអភិវឌ្ឍន៍ធ្វើពីឈើធំបំផុតរបស់ពិភពលោក និងជាទីដែលមានភាពស្ងប់ស្ងាត់មួយ ។ អ្នកអភិវឌ្ឍន៍ទីក្រុង លោក Atrium Ljungberg បង្ហាញពីមូលហេតុ ដែលគម្រោងទីក្រុងនេះ ត្រូវបានគេហៅថា «ទីក្រុងឈើដ៏ធំបំផុតរបស់ពិភពលោក» ព្រោះការសាងសង់នឹងប្រើឈើច្រើនជាងគម្រោងនៅប្រទេសផ្សេងៗ។
ទីក្រុង Stockholm Wood នឹងមានការិយាល័យចំនួន ៧,០០០កន្លែង ផ្ទះ២,000ខ្នង និងគ្របដណ្តប់លើផ្ទៃដី ២៥០,០០០ ម៉ែត្រការ៉េ។ បច្ចុប្បន្ន ទីក្រុងនេះកំពុងត្រូវបានរចនាដោយស្ទូឌីយ៉ូ Henning Larsen និងក្រុមហ៊ុនស៊ុយអែត White Arkitekter ។
យោងតាមអ្នកអភិវឌ្ឍន៍ ទីក្រុងនេះនឹងត្រូវបានរចនាឡើង ធ្វើឱ្យអ្នករស់នៅមានអារម្មណ៍ដូចជានៅក្នុងឧទ្យានមួយ ។ Atrium Ljungberg លើកឡើងថា «យើងបានគិតពីការបង្កើតបរិយាកាសទីក្រុងមួយ ដែលពោរពេញទៅដោយភាពស្ងប់ស្ងាត់ក្នុងព្រៃដ៏ក្រាស់ ដែលផ្តល់នូវសោភ័ណបែបតិចនិយម (Minimalistic)» ។
ស្ថាបត្យករបានបញ្ចូលសមាសធាតុធម្មជាតិទៅក្នុងរចនាសម្ព័ន្ធសំណង់ដូចជា ដំបូលពណ៌បៃតងដែលអាចកាត់បន្ថយកម្ដៅបានច្រើន និងបង្អួចធំដើម្បីឱ្យមានពន្លឺធម្មជាតិគ្រប់គ្រាន់ ដែលបង្ហាញពីចក្ខុវិស័យនៃភាពរីកចម្រើនទីក្រុងដែលភ្ជាប់ទៅនឹងធម្មជាតិ។ ចំណុចដែលគួរចាប់អារម្មណ៍មួយទៀតនៃគម្រោងទីក្រុងនេះគឺ អគារទាំងអស់នឹងត្រូវសាងសង់ពីឈើដែលដុតមិនឆេះ។ អ្នកអភិវឌ្ឍន៍បានបញ្ជាក់ថា ឈើវិស្វកម្មបង្កើតជាស្រទាប់ការពារលើផ្ទៃ ដែលរក្សាបាននូវភាពរឹងមាំនៃរចនាសម្ព័ន្ធរបស់វា និងរួមចំណែកដល់រចនាសម្ព័ន្ធដែលមានសុវត្ថិភាពខ្ពស់។ លើសពីនេះ ឈើដែលសាងសង់អាគារទាំងនោះ អាចស្រូបយកកាបូនបានល្អ និងបញ្ចេញការបំភាយតិចកម្ដៅជាងបេតុង។
លោក Atrium Ljungberg បន្ថែមថា «សំណង់ឈើអាចកាត់បន្ថយផលប៉ះពាល់អាកាសធាតុបានច្រើន ទាំងក្នុងដំណាក់កាលសាងសង់ និងវដ្តជីវិតទាំងមូលរបស់វា។»
ការស្រាវជ្រាវក៏បានបង្ហាញឱ្យឃើញនូវអត្ថប្រយោជន៍ផ្សេងទៀតជាច្រើនផងដែរ ដូចជាការធ្វើឱ្យប្រសើរឡើងនូវសុខុមាលភាពសម្រាប់មនុស្ស និងដំណើរការសាងសង់កាន់តែលឿន និងស្ងប់ស្ងាត់ជាងមុន។ លើសពីនេះ ទីក្រុង Stockholm Wood ក៏នឹងមានថាមពល ដែលផលិតដោយខ្លួនឯងដែរ ដើម្បីរក្សាទុក និងចែករំលែកទៅតំបន់ផ្សេងៗ ប៉ុន្តែគេមិនបានបង្ហាញពីព័ត៌មានលម្អិតនៃការផលិតថាមពលរបស់គម្រោងនោះទេ។ ការអភិវឌ្ឍនេះនឹងចាប់ផ្តើមសាងសង់នៅឆ្នាំ២០២៥ ដោយគ្រោងនឹងបញ្ចប់នៅឆ្នាំ ២០២៧៕
