សាលារៀនក្នុងទីក្រុងប៉េកាំង នឹងដំណើរការវគ្គសិក្សា AI ព្រមជាមួយ​វិធីសាស្ត្របង្រៀនទៅក្នុងកម្មវិធីបឋមសិក្សា និងមធ្យមសិក្សា ចាប់ពីខែកញ្ញា ឆ្នាំ ២០២៥ នេះតទៅ ដើម្បីបណ្ដុះអ្នកជំនាញវ័យក្មេង និងជំរុញការអភិវឌ្ឍក្នុងវិស័យបច្ចេកវិទ្យាជាន់ខ្ពស់, នេះបើតាមសារព័ត៌មាន CNA ។

នៅក្នុងសេចក្ដីថ្លែងការណ៍ របស់គណៈកម្មការអប់រំក្រុងប៉េកាំង កាលពីថ្ងៃទី៧ មីនា អាជ្ញាធរអប់រំចិន បានបញ្ជាក់ថា សាលារៀននឹងបង្កើតវគ្គសិក្សា AI សម្រាប់កុមារ ស្របពេលដែល AI ត្រូវបានបញ្ចូលទៅក្នុង «សេវាកម្មសិក្សាក្រៅម៉ោង សកម្មភាពក្លឹបសិក្សា និងការស្រាវជ្រាវ» និងប្រព័ន្ធអប់រំផ្សេងទៀតនៅក្នុងឆមាសរដូវស្លឹកឈើជ្រុះ នាពេលខាងមុខនេះ។

សាលារៀនក៏មានគោលបំណងធ្វើការជាមួយសហគ្រាសធំៗ សាកលវិទ្យាល័យ ស្ថាប័នស្រាវជ្រាវ និងសមាគមន៍ឧស្សាហកម្ម ក្នុងប្រទេសចិនផងដែរ ដើម្បីបង្កើតវគ្គសិក្សា AI រួមគ្នា។

ឧបករណ៍ AI នឹងត្រូវប្រើដើម្បីស្រាវជ្រាវបង្កើតសេណារីយ៉ូថ្មីៗសម្រាប់ថ្នាក់រៀននាពេលអនាគត ដែលបច្ចេកវិទ្យានេះ នឹងត្រូវដាក់បញ្ចូលទៅក្នុងវិធីសាស្ត្របង្រៀន ដោយប្រើការស្រាវជ្រាវ និងសិក្សាដោយប្រើ AI និងជំនួយការបង្រៀន សម្រាប់ការរៀនផ្ទាល់ខ្លួន (AI learning research and teaching assistants for personalised learning)។

មន្ត្រីអប់រំចិន បាននិយាយថា សាលារៀនត្រូវតែផ្ដល់ការអប់រំ AI យ៉ាងហោចណាស់ ប្រាំបីម៉ោងក្នុងមួយឆ្នាំ ហើយអាចដំណើរការវគ្គសិក្សាដោយឯករាជ្យ ឬបញ្ចូលវាទៅក្នុងកម្មវិធីសិក្សាបច្ចុប្បន្ន ដូចជាថ្នាក់ IT និងវិទ្យាសាស្ត្រជាដើម។

ជាមួយនឹងការកើនឡើងនៃកម្មវិធី និងក្រុមហ៊ុន AI ប្រទេសចិនកំពុងឈានទៅមុខយ៉ាងឆាប់រហ័សលើមហិច្ឆតាក្នុងការអភិវឌ្ឍបច្ចេកវិទ្យា AI របស់ខ្លួន ចំពេលដែលពិភពលោកកំពុងមានការប្រកួតប្រជែងបច្ចេកវិទ្យា។

នៅក្នុងកិច្ចប្រជុំប្រចាំឆ្នាំនៃសភាប្រជាជាតិ​ (NPC) ដែលបានចាប់ផ្ដើមនៅថ្ងៃទី៥ ខែមីនា រដ្ឋាភិបាលចិន បានសន្យាថានឹងជំរុញការគាំទ្រលើការអភិវឌ្ឍ និងវិនិយោគលើបច្ចេកវិទ្យា AI ក្នុងគោលបំណងជំរុញ​ឱ្យមានភាពឈានមុខបន្ថែមទៀត ហើយធ្វើឱ្យចិនក្លាយជាប្រទេសដែលពឹងផ្អែកលើបច្ចេកវិទ្យា AI របស់ខ្លួនឯង។

នៅពេលសិស្សឈានទៅកម្រិតមធ្យមសិក្សា វគ្គសិក្សាជាក់ស្ដែង នឹងផ្ដោតលើការពង្រឹងសមត្ថភាពប្រើប្រាស់កម្មវិធី AI និងវិធីសាស្ត្រប្រើប្រកបដោយនវានុវត្តន៍។

វគ្គសិក្សាក្រមសីលធម៌ AI ក៏នឹងដាក់ដំណើរការផងដែរ ដើម្បីណែនាំសិស្សអំពីការប្រើប្រាស់ឧបករណ៍ AI តាមបែប វិទ្យាសាស្ត្រ ភាពសមហេតុផល ស្ថិរភាព និងការប្រុងប្រយ័ត្ន។

ជាមួយគ្នានេះ ផែនការការងារក៏ផ្ដោតលើការជ្រើសរើសគ្រូបង្រៀនក្នុងវិស័យ STEM ដែលរួមមាន វិទ្យសាស្រ្ត បច្ចេកវិទ្យា វិស្វកម្ម និងគណិតវិទ្យា ដើម្បីលើកកម្ពស់ការអប់រំ AI ៕