តាមរយៈរបាយការណ៍ស្រាវជ្រាវរបស់ McKinsey & Company បានបង្ហាញថា ប្រហែល ៣០ភាគរយ ទៅ៦០ភាគរយនៃអាជីពរបស់មនុស្សត្រូវជំនួសដោយកុំព្យូទ័រ ឬរ៉ូបូត។

តាមការសិក្សា​មួយ​នៅឆ្នាំ២០១៣ ដោយអ្នកស្រាវជ្រាវនៃសាកលវិទ្យាល័យ Oxford ក្រោមប្រធានបទ The Future of Employment បានកំណត់អាជីពចំនួន ៧០២ ដែលនឹងត្រូវជំនួសដោយកុំព្យូទ័រ ក្នុងនោះការងារដែលមានហានិភ័យខ្ពស់បំផុតគឺ Telemarketer, អ្នករៀបចំឯកសារពន្ធ, អាជ្ញាកណ្ដាលកីឡា, មន្ត្រីឥណទាន, អ្នកគិតលុយ, អ្នកបើកតាក់ស៊ី និងជំនួយការផ្នែកច្បាប់ជាដើម។ ប៉ុន្តែបច្ចេកវិទ្យានឹងបង្កើតអាជីពថ្មីៗ ដែលលើសចំនួនអាជីពដែលបានបាត់បង់ទៅ។

Ford ដែលជាក្រុមហ៊ុនអនាគតនិយមមួយរបស់ពិភពលោក បានចាត់ថ្នាក់ការងារ ដែលមានភាពធន់ជា២ផ្នែក។ ការងារក្នុងផ្នែកទី១ គឺជាប្រភេទការងារ ដែលតម្រូវឱ្យមានគំនិតច្នៃប្រឌិតខ្ពស់ដូចជា​ ការងារផ្នែកសិល្បៈ​ វិចិត្រករ អ្នកវិទ្យាសាស្ត្រ និងអ្នកអភិវឌ្ឍយុទ្ធសាស្ត្រអាជីវកម្មថី្មៗជាដើម ។ Ford បានកត់សម្គាល់ថា សម្រាប់ពេល​នេះ មនុស្សនៅតែមានគំនិតច្នៃប្រឌិតខ្ពស់បំផុតក្នុងផែនដី ប៉ុន្តែគេក៏អាចសន្មត់១០០ភាគរយដែរថា នៅ២០ឆ្នាំក្រោយ កុំព្យូទ័រនៅតែមិនអាចមានភាពច្នែប្រឌិតខ្លាំងជាងមនុស្សឬយ៉ាងណា ព្រោះបច្ចុប្បន្នកុំព្យូទ័រក៏អាចបង្កើតស្នាដៃសិល្បៈរួចទៅហើយ។

ការងារក្នុងផ្នែកទី២ គឺជាអាជីពដែលតម្រូវឱ្យមានទំនាក់ទំនងស្មុគស្មាញជាមួយមនុស្ស ដូចជា អ្នកមើលថែអ្នកជំងឺ និងតួនាទីមួយចំនួនក្នុងអាជីវកម្ម ដែលទាមទារឱ្យមានទំនាក់ទំនង មានភាពបត់បែនជាមួយអតិថិជនជាដើម។ ក្នុងនោះអាជីពដែលមានភាគរយតិចជាង ដែលនឹងត្រូវមានជំនួសដោយម៉ាស៊ីនមានដូចជា អ្នកជំនាញផ្នែកសុខភាពផ្លូវចិត្ត (Mental health and substance abuse social work) ឱកាសជំនួយដោយម៉ាស៊ីន ០.៣%, អ្នកជំនាញផ្នែកសុខភាព (Occupational therapist) ០.៣៥%, អ្នកឯកទេសខាងចំណីអាហារ និងអាហារូបត្ថម្ភ ០.៣៩% និងគ្រូពេទ្យវះកាត់ ០.៤២%។ល។

លោក Saadia Zahidi ប្រធានគំនិតផ្តួចផ្ដើមប្រព័ន្ធអប់រំ យេនឌ័រ និងប្រព័ន្ធការងារនៃ WE Forum បានលើកឡើងថា ប្រព័ន្ធស្វ័យប្រវត្តិកម្ម អាចនឹងធ្វើឱ្យមានវិសមភាពយេនឌ័រធ្ងន់ធ្ងរឡើង។ លោកមើលឃើញថា ស្ត្រីមិនសូវចាប់អារម្មណ៍សិក្សាជំនាញ STEM នោះទេ ខណៈដែលការងារលើវិស័យនេះនឹងមានតម្រូវការកាន់តែខ្ពស់នាពេលអនាគត ។ ប៉ុន្តែ Zahidi ក៏បានកត់សម្គាល់ឃើញដែរថា មានស្ត្រីកាន់តែច្រើននៅក្នុងវិជ្ជាជីវៈ ដែលទាក់ទងនឹងការថែទាំសុខភាព និងអប់រំ ដែលការងារប្រភេទនេះ ក៏មានហានិភ័យទាប អាចនឹងជំនួសដោយកុំព្យូទ័រផងដែរ៕