ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការប៉ះទង្គិចនៅតាមបណ្តាយព្រំដែនកម្ពុជា-ថៃ កាលពីពេលកន្លងទៅថ្មីៗនេះ បានធ្វើឱ្យមានការជម្លៀសប្រជាពលរដ្ឋ និងការបិទទ្វារសាលារៀនរាប់រយកន្លែងជាបណ្តោះអាសន្ន នៅក្នុងខេត្តដែលរងផលប៉ះពាល់។ ទន្ទឹមគ្នានេះ អង្គការទស្សនៈពិភពលោក បន្តអំពាវនាវឱ្យមានការការពារ និងថែរក្សាសុខុមាលភាពកុមារជាបន្ទាន់ក្នុងគ្រាដែលមានវិបត្តិនេះ រួមមាន ការធានាឱ្យមានលទ្ធភាពទទួលបានសេវាចាំបាច់ ដូចជា សុខាភិបាល ការអប់រំ និងការគាំទ្រផ្លូវចិត្តជាដើម។
លោក នី សុផារ៉ាន់ នាយកប្រតិបត្តិអង្គការទស្សនៈពិភពលោកអន្តរជាតិ ប្រចាំនៅកម្ពុជា មានប្រសាសន៍ថា ទោះបីស្ថានការណ៍មានភាពធូរស្រាល យើងនៅតែត្រៀមខ្លួនរួចជាស្រេច ដើម្បីឆ្លើយតបបន្ថែម ប៉ុន្តែយើងក៏មិនអាចធ្វើតែម្នាក់ឯងបាននោះដែរ។ លោក នី សុផារ៉ាន់ ក៏បានអំពាវនាវដល់ដៃគូ អ្នកឧបត្ថម្ភ និងសហគមន៍អន្តរជាតិ បន្តគាំទ្រ ដើម្បីការពារជីវិតធានាបានលទ្ធភាពទទួលបានជំនួយ និងគាំទ្រដល់អ្នករងគ្រោះផ្លូវចិត្ត ដោយសារវិបត្តិនេះ។
អង្គការទស្សនៈពិភពលោក បានចាប់ផ្តើមការឆ្លើយតបបន្ទាន់ និងសហការជិតស្និទ្ធជាមួយអាជ្ញាធរមូលដ្ឋាន និងអ្នកស្ម័គ្រចិត្តយុវជន ដើម្បីផ្តល់ជំនួយសង្គ្រោះបន្ទាន់។ លោក នី សុផារ៉ាន់ បន្តថា ក្នុងពេលមានវិបត្តិ អាទិភាពរបស់យើង គឺធានាថា កុមារគ្រប់រូបទទួលបានការគាំទ្រ ការការពារ និងគ្មានកុមារណាម្នាក់ត្រូវបានទុកចោលឡើយ។
”យើងឃើញផ្ទាល់ពីផលប៉ះពាល់ដ៏ធ្ងន់ធ្ងរទៅលើកុមារ និងគ្រួសាររបស់ពួកគេ។ កែវភ្នែករបស់កុមារដែលបង្ហាញពីភាពភ័យខ្លាចក្នុងសភាពកំពុងរត់គេចខ្លួន គឺជារឿងមួយរំឭកយើងថា ពួកគាត់ជាក្រុមដែលងាយរងគ្រោះបំផុត នៅពេលមានជម្លោះកើតឡើង”
នៅខណៈពេលនេះ អង្គការទស្សនៈពិភពលោក បាននិងកំពុងធ្វើការយ៉ាងជិតស្និទ្ធជាមួយគណៈកម្មាធិការជាតិគ្រប់គ្រងគ្រោះមហន្តរាយ ដៃគូអភិវឌ្ឍន៍ និងអង្គការមូលដ្ឋាន ដើម្បីពង្រឹកកិច្ចខិតខំប្រឹងប្រែងក្នុងការផ្តល់ការគាំទ្រផ្លូវចិត្ត និងធានាសុវត្ថិភាពសម្រាប់កុមារដែលត្រូវបានផ្លាស់ទីដោយសារជម្លោះព្រំដែន។
គួរជំរាបជូនថា គិតត្រឹមថ្ងៃទី២៩ ខែកក្កដា ឆ្នាំ ២០២៥ អង្គការទស្សនៈពិភពលោក បានផ្តល់ជំនួយជាអាហារ និងសម្ភារៈ ទឹកស្អាត និងអនាម័យ (WASH) ការការពារកុមារ និងការអប់រំ តាមរយៈការបង្កើតទីកន្លែងកុមារមេត្រីជាបណ្តោះអាសន្ន ការផ្តល់ការគាំទ្រផ្លូវចិត្ត និងសម្ភារៈអប់រំ និងកីឡាកម្សាន្តនានា នៅតាមមណ្ឌលសុវត្ថិភាពចំនួន ៥៦ ដោយនៅក្នុងនោះ ១៣នៅខេត្តសៀមរាប ២៨នៅខេត្តបន្ទាយមានជ័យ និង ១៥ នៅខេត្តព្រះវិហារ សម្រាប់គ្រួសារចំនួន ៨ ៣៧៥ គ្រួសារ ដែលមានប្រជាពលរដ្ឋចំនួន ២៩៤០០ នាក់ ក្នុងនោះមានកុមារប្រមាណ ១១៧០០នាក់៕
