ថ្លែងក្នុងពិធីបើកមហោស្រពបច្ចេកវិទ្យាមេគង្គ លើកទី៣ ឆ្នាំ២០២៥ ក្រោម​ប្រធានបទ “ការរចនាអនាគតសម្រាប់មនុស្សជំនាន់ក្រោយ” កាលពីចុងសប្តាហ៍​កន្លងទៅនេះ ឯកឧត្តម កែវ សុទ្ធិ រដ្ឋលេខាធិការក្រសួងប្រៃសណីយ៍ និងទូរគមនាគមន៍ មានប្រសាសន៍ថា មហោស្រពបច្ចេកវិទ្យាមេគង្គ គឺជាកាតាលីករជំរុញបរិវត្តកម្មឌីជីថលនៅកម្ពុជាឱ្យកាន់តែមានល្បឿនលឿនឆ្ពោះទៅមុខថែមទៀត តាមរយៈការចូលរួមរបស់យុវជនជំនាន់ក្រោយ សិស្ស និស្សិត ដែលស្រឡាញ់ចូលចិត្តបច្ចេកវិទ្យា និងនវានុវត្តន៍ឌីជីថល។

ឯកឧត្តម កែវ សុទ្ធិ បន្ថែមថា មហោស្រពបច្ចេកវិទ្យាមេគង្គ គឺជាការផ្តោតលើការរៀនដោយផ្ទាល់ ការអនុវត្តជាក់ស្ដែង និងឱកាសបង្កើតបណ្តាញទំនាក់ទំនង ហើយក៏ជាការប្រមូលផ្តុំសិស្ស និស្សិត សហគ្រិនវ័យក្មេង អ្នកជំនាញដែលមានបទពិសោធន៍ និងវិនិយោគិន ដើម្បីចែករំលែកគំនិតច្នៃប្រឌិតថ្មី នវានុវត្តន៍ និងការចែករំលែកចំណេះជំនាញលើបច្ចេកវិទ្យាឌីជីថល ជាពិសេសបច្ចេកវិទ្យាឌីជីថលឈានមុខ រួមមាន បញ្ញាសិប្បនិម្មិត វិទ្យាសាស្ត្រទិន្នន័យ ប្លុកឆេន និងរ៉ូបូត ជាដើម។

គួរជំរាបជូនថា មហោស្រពបច្ចេកវិទ្យាមេគង្គ បានប្រព្រឹត្ត​ទៅ​រយៈពេល២ថ្ងៃ គឺ​នៅ​ថ្ងៃសៅរ៍ ទី១៩ និង​ថ្ងៃអាទិត្យ ទី២០ ខែកក្កដា កន្លងទៅនេះ នៅ Factory Phnom Penh ដែលមានរៀបចំជាសន្និសីទបច្ចេកវិទ្យា ដែល​មានវាគ្មិន​ជំនាញ​​មាន​បទពិសោធន៍​ជា​ច្រើន​ឆ្នាំ មក​បក​ស្រាយ​អំពីចំណេះ ជំនាញ បទពិសោធន៍​នៅ​ក្នុង​វិស័យ​របស់ខ្លួន​ទាក់ទិន​នឹង​បច្ចេកវិទ្យាឌីជីថល និងនវានុវត្តន៍ ដែល​មាន​ប្រធាន​បទ​ផ្តោត​លើ​បរិវត្តកម្មឌីជីថល​លើ វិស័យ​អប់រំ ការផ្សព្វផ្សាយ ការ​ផលិតមាតិកា កីឡាអេឡិចត្រូនិក និង​សហគ្រិនភាព វិទ្យាសាស្រ្ត បច្ចេកវិទ្យា ការ​សរសេរកូដ ការ​សរសេរ​កម្មវិធី​ បញ្ញាសិប្បនិម្មិត បច្ចេកវិទ្យាដ្រូន នវានុវត្តន៍​បរិស្ថាន​ជាដើម។

ជាមួយ​គ្នា ក៏​មានកិច្ច​ពិភាក្សា​ដោយ​មានការ​ចូលរួម​ដោយ​តំណាង​ក្រសួង និង​ដៃគូ​សហការ​រួមមាន ក្រសួង​ប្រៃសណីយ៍ និង​ទូរគមនាគមន៍ ក្រសួង​រៀបចំដែនដី នគរូបនីយកម្ម និងសំណង់ ក្រុម​ប្រឹក្សា​អភិវឌ្ឍន៍​កម្ពុជា ក្រសួង​ការងារ និង​បណ្តុះបណ្តាល​វិជ្ជាជីវៈ ក្រសួង​ឧស្សាហកម្ម វិទ្យាសាស្រ្ត បច្ចេកវិទ្យា និង​នវានុវត្តន៍។

បន្ថែមពីនេះ នៅ​ក្នុង​អំឡុងរយៈ​ពេលពីរថ្ងៃពេញ ក៏​មានការដាក់​តាំង​បង្ហាញ​នូវ​មនុស្ស​យន្ត បច្ចេកវិទ្យា​នវានុវត្តន៍ ដែល​ជាផលិតផល និង​សេវាកម្ម​របស់កូន​ខ្មែរ, ​​​ការ​ប្រកួត​គម្រោង​យុវជន​បច្ចេកវិទ្យា​នវានុវត្តន៍​ចតុមុខ ដែល​សិស្សានុសិស្ស​​ប្រកួត​ប្រជែងស្នាដៃ​បច្ចេកវិទ្យាឌីជីថល និង​ស្នាដៃ​នវានុវត្តន៍​របស់ខ្លួន៕