ដើម្បីទទួលបានអាហារូបករណ៍សិក្សានៅសាកលវិទ្យាល័យ មិនថាក្នុង និងក្រៅប្រទេសនោះ​ទេ គឺទាមទារឱ្យបេក្ខជន និស្សិតមានការតាំងចិត្ត មានការអត់ធ្មត់ រង់ចាំពេលវេលា និងការស្រាវជ្រាវបន្ថែមអំពីអាហារូបករណ៍ ។ នេះជាការលើកឡើងរបស់លោក តាំង ថៃស៊ីង និស្សិតអាហារូបករណ៍ស្រាវជ្រាវពេញលេញនៃ MSIS Technologies Inc.(MSISLAB) នៅសាកលវិទ្យាល័យ Chungbuk National University (CBNU) ប្រទេសកូរ៉េខាងត្បូង ។

លោក តាំង ថៃស៊ីង ជានិស្សិតកម្ពុជាដែលកំពុងសិក្សាអាហារូបករណ៍ថ្នាក់បណ្ឌិត-អនុបណ្ឌិត (ថ្នាក់ Integrated Master-PhD )ជំនាញ វិស្វកម្មអេឡិចត្រូនិច

និងកុំព្យូទ័រ នៅសាកលវិទ្យាល័យជាតិ Chungbuk រយៈពេល៥ឆ្នាំ ។ លោក តាំង ថៃស៊ីង លើកឡើងថា ក្នុងការដាក់ពាក្យស្នើសុំ ឬប្រឡងអាហារូបករណ៍ សិស្ស-និស្សិតត្រូវមានការតាំងចិត្ត ភាពអត់ធ្មត់ ទាមទារពេលវេលា ការស្រាវជ្រាវបន្ថែមអំពីអាហារូបករណ៍តាមរយៈការសាកសួរសិស្សច្បង ពីបណ្ដាញសង្គម និងការប្រឹក្សាអាហារូបករណ៍នានា ។

បេក្ខភាពអាហារូបករណ៍រូបនេះបន្តថា លោកចាប់យកជំនាញវិស្វកម្មអេឡិចត្រូនិច និងកុំព្យូទ័រ នៅថ្នាក់បណ្ឌិត-អនុបណ្ឌិតនៅប្រទេសកូរ៉េនេះ ព្រោះមូលហេតុចម្បងជាច្រើនដែលជម្រុញលោក ដូចជា កត្តាបច្ចេកវិទ្យាទំនើប ជឿនលឿន ទាន់សម័យ និងក្ដីស្រមៃ ។ ជាមួយគ្នានេះសក្ដានុពល ខាងផ្នែក Integrated Circuit Design, Chip Design, Hardware/Software Development ផងដែរ ។

លោក តាំង ថៃស៊ីង បានលើកឡើងថា ដើម្បីទទួលបានអាហារូបករណ៍ថ្នាក់ឧត្ដមសិក្សា ជាពិសេសអាហារូបករណ៍ថ្នាក់បណ្ឌិត-អនុបណ្ឌិត (Integrated Master-PhD) បេក្ខជនត្រូវមានចំណុចមួយចំនួនដូចជា ការស្រាវជ្រាវអំពីព័ត៌មានអាហារូបករណ៍ ការប្រឹក្សាអាហារូបករណ៍ ពាក្យសុំចូលរៀន និងឯកសារពាក់ព័ន្ធ ។ លើសពីនេះ ក៏​ត្រូវ​ផ្ញើរជាសំណេរកថា ឬសារទៅកាន់លោកគ្រូអ្នកគ្រូតាមគ្រឹស្ថានដែលនិស្សិតចង់ទៅសិក្សាតាមប្រទេសនានាទៅតាមចំណេះជំនាញ និងត្រូវឆ្លងកាត់២ដំណាក់កាល ដូចជាការធ្វើគម្រោងខ្លីៗ និងសម្ភាសន៍ ព្រមទាំងធ្វើបទបង្ហាញពីចំណេះដឹង និងបទពិសោធន៍ដែលធ្លាប់ឆ្លងកាត់ផ្ទាល់ ។

ជាមួយ​គ្នានេះ លោក តាំង ថៃស៊ីង ក៏​បានលើកឡើងដែរថា ការសិក្សានៅសាកលវិទ្យាល័យជាតិ Chungbuk អាចផ្ដល់ឱ្យលោកជាច្រើនដូចជា ឱកាសក្នុងការស្រាវជ្រាវក្នុងមន្ទីរពិសោធន៍ ការសិក្សាមានប្រព័ន្ធអប់រំស្ដង់ដារខ្ពស់ (High Educational Standards) ។ បន្ថែមពីនេះ អាចធ្វើឱ្យលោកមានឯករាជភាព មានភាពម្ចាស់ការ មានគោលជំហរជាខ្លួនឯង រឹងមាំ តស៊ូ ហ៊ានសម្រេចចិត្តដោយខ្លួនឯង និងមានចក្ខុវិស័យវែងឆ្ងាយ ។

និយាយពីការរស់នៅ និងសិក្សានៅប្រទេសកូរ៉េកន្លងមកយុវជន ថៃស៊ីង មិនមានជួបបញ្ហាទាំងការស្នាក់នៅ និងអាហារឡើយ ព្រោះ ថៃស៊ីង ក៏ធ្លាប់មានបទពិសោធន៍សិក្សាអាហារូបករណ៍ថ្នាក់បរិញ្ញាបត្រនៅប្រទេសចិនកាលពីពេលកន្លងទៅដែរ ។

មុននឹងបញ្ចប់ការចែករំលែក លោក តាំង ថៃស៊ីង បានបន្ថែមថា លោកនឹងយកចំណេះដឹងដែលទទួលបានពីការសិក្សាទៅអភិវឌ្ឍន៍តាមរយៈការបណ្តុះបណ្តាលពីជំនាញបច្ចេកទេសខាងផ្នែក Hardware Design, Design បន្ទះឈីប និងការសរសេរកូដទៅលើបន្ទះឈីបទៅកាន់យុវសិស្សជំនាន់ក្រោយៗឱ្យ​បានសិក្សាស្រាវជ្រាវ និងយល់ដឹងពីបច្ចេកវិទ្យាឈីបដើម្បីឱ្យ​ទាន់នូវតម្រូវការនៃឧស្សាហកម្ម4.0 ជាដើម ។

ជាចុងក្រោយ លោក តាំង ថៃស៊ីង ក៏​សូមលើកទឹកចិត្តដល់សិស្សប្អូនជំនាន់ក្រោយឱ្យ​មានការអត់ធ្មត់ តាំងចិត្តមុះមត់ និងជំរុញឱ្យ​ព្យាយាមតស៊ូដើម្បីយកអាហារូបករណ៍ទៅសិក្សានៅបណ្តាប្រទេសនានា ដើម្បីលើកកម្ពស់ធនធានមនុស្សនៅកម្ពុជា ជួយសម្រួលជីវភាពគ្រួសារនិងខ្លួនឯង ៕