ម៉ាស៊ីនលាងរថយន្តគំរូដែលមានឈ្មោះថា ម៉ាស៊ីនលាងរថយន្តស្វ័យប្រវត្តិ ឬ Automatic Car Washing Machine ជាស្នាដៃរបស់អតីតនិស្សិត នៃវិទ្យាស្ថានបច្ចេកវិទ្យាកម្ពុជា (សាលាតិចណូ) ចំនួនពីររូបដែលបានរួមគ្នាបង្កើតឡើងដើម្បីបញ្ចប់ឆ្នាំសិក្សា និងទុកជាស្នាដៃគំរូសម្រាប់សិស្សប្អូនបានសិក្សាស្វែងយល់។ ម៉ាស៊ីនគំរូនេះ ជាស្នាដៃរបស់ លោក មាស លីហេង អតីតនិស្សិតជំនាញ វិស្វកម្មអគ្គិសនី និងស្វ័យប្រវត្តិកម្ម នៅមហាវិទ្យាល័យបច្ចេកទេសអគ្គិសនី និង លោក លី លាងឆេង អតីតនិស្សិតជំនាញវិស្វកម្មមេកានិច នៃដេប៉ាតឺម៉ង់ទេពកោសល្យឧស្សាហកម្ម និងមេកានិច នៃវិទ្យាស្ថានបច្ចេកវិទ្យាកម្ពុជា។

លោក មាស លីហេង បានប្រាប់ឱ្យដឹងថា ការផលិតម៉ាស៊ីននេះឡើង គឺស្ថិតនៅក្រោមហេតុផល៣យ៉ាង ទីមួយ ៖ ផលិតឡើងដើម្បីជាគម្រោងបញ្ចប់ឆ្នាំសិក្សា ទីពីរ ៖ ចង់យល់ដឹងអំពីដំណើរការ (Process) នៃម៉ាស៊ីនលាងឡានដោយស្វ័យប្រវត្តិ និង ទីបី ៖ ទុក Process នេះដើម្បីឱ្យសិស្សប្អូនគាត់បានតេស្ត និងអាចមានម៉ាស៊ីនគំរូ (Prototype) សម្រាប់តេស្តនៅពេលគាត់រៀនមេរៀន ស្វ័យប្រវត្តិកម្ម (automation)។ បើតាមលោក លីហេង ចំណុចពិសេសរបស់ម៉ាស៊ីនគំរូនេះ គឺអាចចំណាយពេលវេលាតិច ចំណេញថវិកាច្រើន ហើយលើសពីនេះ វាអាចលាងរថយន្តជាបន្តបន្ទាប់បានដោយមិនចាំបាច់រងចាំរហូតដល់លាងឡានមួយៗឱ្យរួចទាំងស្រុងនោះទេ។

លីហេង បន្តឱ្យដឹងថា ដើម្បីផលិតម៉ាស៊ីននេះបានដោយជោគជ័យ ក្រុមខ្លួនទាំងពីរនាក់ត្រូវចំណាយពេល ៥ខែដោយការផលិតនេះជួបផលលំបាកមួយចំនួន ដូចជាការស្រាវជ្រាវ និងថវិកាក្នុងការចំណាយដើម្បីផលិត ដែលត្រូវចំណាយខ្លួនឯងព្រោះមិនមានការគាំទ្រថវិកាពីខាងណាឡើយ។

សម្រាប់លោក លី លាងឆេង អតីតនិស្សិតជំនាញវិស្វកម្មមេកានិច នៅដេប៉ាតឺម៉ង់ទេពកោសល្យឧស្សាហកម្ម និងមេកានិច បានប្រាប់ឱ្យដឹងថា ទោះសិក្សាជំនាញខុសគ្នា តែក្រុមខ្លួនអាចធ្វើការចុះសម្រុងនឹងគ្នាជាខ្លាំង ព្រោះ ការផលិតឡើងនេះត្រូវការជំនាញទាំងពីរបញ្ជូលគ្នា ជាក់ស្ដែងផ្នែកអគ្គិសនីដើម្បីគ្រប់គ្រងដំណើរការនៃម៉ាស៊ីនឱ្យរលូន ចំណែកផ្នែកមេកានិច សម្រាប់ប្រើលើគ្រឿងបង្គុំផ្សេងៗសម្រាប់ប្រើប្រាស់ក្នុងម៉ាស៊ីន។

នៅក្នុងការផលិត និងDesign លីហេង និងលាងឆេង ពួកគេទាំងពីរនាក់បានប្រើប្រាស់ Software ចំនួន៣ ដូចជា  NX siemens ប្រើដើម្បី Design គ្រោងឆ្អឹង ឬគូសផ្នែកមួយៗដើម្បី Assembly (ប្រមូលផ្ដុំ ឬផ្គុំបញ្ចូលគ្នា) ឱ្យចេញជារូបរាងម៉ាស៊ីនគំរូ និងធ្វើ Simulation។ ទីពីរគឺ TIA portal ដែលប្រើប្រាស់ដើម្បីសរសេរ program control Simulation ជាមួយនឹង NX។ ទី៣ គឺ Software GX WORK2 ដើម្បីសរសេរ Program PLC ចូលក្នុង controller ។

គម្រោងម៉ាស៊ីនលាងរថយន្តស្វ័យប្រវត្តិ មិនមែនជាគម្រោងថ្មីសម្រាប់ពិភពលោកនោះទេ តែវាអាចជាគម្រោងថ្មីមួយ​សម្រាប់ប្រទេសកម្ពុជា ដែលយុវជនខ្មែរបង្កើតឡើងដោយផ្ទាល់ ។ និស្សិតទាំងពីរនិយាយថា ម៉ាស៊ីននេះអាចចំណាយពេលត្រឹមតែ៣ទៅ៤នាទីប៉ុណ្ណោះក្នុងការលាងរថយន្តមួយគ្រឿង ហើយ​សម្រាប់រថយន្ត២គ្រឿងអាចចំណាយពេលពី៤ទៅ៥នាទីព្រោះម៉ាស៊ីននេះអាចលាងរថយន្តជាបណ្ដាក់ៗគ្នាបាន។ លើសពីនេះ ប្រសិនបើមានការវិនិយោគណាមួយ សម្រាប់ការផលិតម៉ាស៊ីននេះឱ្យ​ចេញជារូបរាង យុវជនទាំងពីរ ចង់ឱ្យវាក្លាយទៅជាអាជីវកម្មមួយដែលនឹងធ្វើការលាងសម្អាតរថយន្តនៅតាមច្រកផ្លូវផ្សេងៗមុខចូលទីក្រុងភ្នំពេញ ដោយក៏អាចបំពាក់ Sensor ដែលចាប់រាងរថយន្តណាខ្លះដែលមានដីជាប់ច្រើន ឬតិចដើម្បីដឹងថា គួរសម្អាត ឬមិនត្រូវការសម្អាតមុនពេលចូលទីក្រុង ដើម្បីជួយបរិស្ថានទីក្រុងឱ្យស្អាតគ្មានធូលី។

លោក លាង លីឆេង បន្ថែមថា សម្រាប់ម៉ាស៊ីនលាងរថយន្តស្វ័យប្រវត្តិនេះ ក៏មានបំពាក់មុខងារពិសេស និងសំខាន់មួយ​ចំនួនទៀតដូចជាអាចលាងរថយន្តបន្តគ្នាដោយមិនចាំបាច់ចំណាយពេលយូរ និងអាច recycle ទឹកឡើងវិញដើម្បីប្រើប្រាស់ម្ដងហើយម្ដងទៀតដែលជាការរួមចំណែកក្នុងការកាត់បន្ថយការប្រើប្រាស់ទឹកខ្ជះខ្ជាយសម្រាប់ពិភពលោក៕