បរទេស ៖ លោក Mohamad Fairizal Jaffar បានជាប់ពន្ធនាគារលើដំបូងនៅពេលគាត់មានអាយុ ១៧ឆ្នាំ ពីបទប្រើប្រាស់គ្រឿងញៀន។ ពេលនោះ ការជាប់ឃុំឃាំងមានរយៈពេល ១៦ខែ ប៉ុន្តែមិនមានផលប៉ះពាល់ច្រើនលើក្មេងវ័យជំទង់ដែលបានបន្ដដំណើរស្វែងរកខ្លួនឯងនោះទេ។

អំឡុងរយៈពេល១៤ឆ្នាំមកទៀត Fairizal បានជាប់ទោសពីរដងបន្ថែមទៀតក្នុងពន្ធនាគារ ។ នៅអំឡុងពេលដែលជីវិតកំពុងច្របូកច្របល់ គាត់នៅតែជម្នះបន្ដការសិក្សា និងសម្រេចិត្តលើក្ដីប្រាថ្នាក្នុងអាជីពរបស់ខ្លួន ហើយទីបំផុត គាត់ទទួលបានសញ្ញាបត្រ និងកាន់តំណែងជានាយកប្រតិបត្តិក្រុមហ៊ុនដឹកជញ្ជូនមួយ។

នៅក្នុងវ័យ ៤០ឆ្នាំ លោក Fairizal បានទទួលជំនួយផ្នែកហិរញ្ញវត្ថុ ពីគម្រោង Yellow Ribbon ដែលជាគំនិតផ្តួចផ្ដើមមានគោលបំណងជួយអ្នកទោស ដើម្បីធ្វើសមាហរណកម្មទៅក្នុងសង្គមឡើងវិញ។

កាលនៅជាសិស្សអនុវិទ្យាល័យ Bukit Panjang Fairizal គាត់គឺជាគោលដៅនៃការគំរាមកំហែង និងមាក់ងាយ ពីសំណាក់មិត្តរួមថ្នាក់របស់គាត់មួយចំនួន។ គាត់លើកឡើងថា មានពេលខ្លះ នៅពេលខ្ញុំមកដល់សាលា ពួកគេនៅខាងក្រៅ រង់ចាំខ្ញុំរួចទៅហើយ។ ភាពភ័យខ្លាចក្នុងការទៅសាលារៀនជារៀងរាល់ថ្ងៃ បានធ្វើឱ្យគាត់ ចូលរួមជាមួយសមាជិកក្រុមក្មេងទំនើង នៅក្នុងសង្កាត់របស់គាត់ ហើយមិនយូរប៉ុន្មានក្រុមក្មេងទំនើបទាំងនោះ ក៏ទៅសាលា ដើម្បីនិយាយជាមួយក្រុមសិស្ស ដែលមាក់ងាយគាត់។ គាត់បន្ថែមថា បន្ទាប់មកមិត្តភក្តិនៅអនុវិទ្យាល័យ ដែលតែងតែមាក់ងាយគាត់នោះ បានចាប់ដៃខ្ញុំ ដើម្បីសម្រួលគ្នា ហើយអ្វីៗក៏បានដោះស្រាយពីពេលនោះមក។ 

ចាប់ពីពេលនោះ ធ្វើឱ្យគាត់មានអារម្មណ៍ថា គាត់អស្ចារ្យ និងស្គាល់ពីអំណាចនៃការមានក្រុម។ ទីបំផុត ដើម្បីក្លាយខ្លួនជាក្មេងទំនើបម្នាក់ពេញលេញ គាត់បានទទួលស្នាមសាក់ដំបូង នៅពេលដែលគាត់មានអាយុ ១៥ឆ្នាំ។

នៅអាយុ ២១ ឆ្នាំ Fairizal បានជាប់ពន្ធធនាគារម្ដងទៀត ដែលលើកនេះមានរយៈពេល ៥ឆ្នាំ ១ខែ ពីបទជួញដូរគ្រឿងញៀន និងត្រូវរងការពិន័យចំនួន ៥រំពាត់ផ្ដៅ។

ពន្ធនាគារបានអនុញ្ញាតឱ្យអ្នកទោសបន្តការសិក្សា ហើយលោក Fairizal បានសម្រេចចិត្តបន្តការសិក្សា រហូត​ដល់ពេលចេញក្រៅឃុំ។ ពិន្ទុប្រឡងបញ្ចប់ការសិក្សារបស់គាត់ គឺលទ្ធផលល្អណាស់ សម្រាប់ការសិក្សាកម្រិត O – Level ដែលអនុញ្ញាតឱ្យគាត់អាចចូលរៀនជំនាញពហុបច្ចេកទេស នៅក្នុងឆ្នាំ២០០៩។

ក្រោយចេញពីពន្ធធនាគារលើកទី២ ដោយហេតុថា គ្មានស្ថិរភាពហិរញ្ញវត្ថុ ហើយមកពីគ្រួសារដែលមានប្រាក់ចំណូលទាបផង Fairizal បានងាកទៅរកគម្រោង Yellow Ribbon ដើម្បីទទួលបានមូលនិធិសម្រាប់វគ្គសិក្សាសញ្ញាបត្រផ្នែក Marine and Offshore Technology នៅសាលា Ngee Ann Polytechnic ។ ខណៈពេលកំពុងបន្តការសិក្សា លោកក៏បានឆ្លៀតពេលធ្វើការក្នុងក្លិបមួយកន្លែងនាពេលយប់។ 

ពីរឆ្នាំក្រោយមក គាត់ត្រូវបានឃុំឃាំងជាលើកទី ៣ ដែលលើកនេះ ក្រោមច្បាប់ដែលអនុញ្ញាតឱ្យរដ្ឋាភិបាលឃុំខ្លួនដោយគ្មានការកាត់ទោសមនុស្ស ដែលមានទំនាក់ទំនងទៅនឹងសកម្មភាពក្រុមសង្គមងងឹត។ ពេលនោះ គាត់ត្រូវបានគេរកឃើញថា មានទោសក្នុងបទចោទប្រកាន់ចំនួន ៧ ។

ការជាប់ឃុំលើកទី៣នេះ ធ្វើឱ្យគាត់មានអារម្មណ៍ថាអស់សង្ឃឹម និងយល់ថា ការព្យាយាមអស់ពីសមត្ថភាពរបស់គាត់នៅតែមិនបានផល។ ប៉ុន្តែ ៤ឆ្នាំក្រោយមក គាត់ត្រូវបានគេដោះលែងឱ្យមានសេរីភាពឡើងវិញ។

ក្រោយដោះលែងពីពន្ធធនាគារលើកទី៣ និងជាលើកចុងក្រោយក្នុងជីវិតគាត់ Fairizal មិនដឹងថា គាត់ត្រូវសម្រេចចិត្តចូលធ្វើការក្នុងវិស័យណានោះទេ ប៉ុន្តែគាត់គ្រាន់តែដឹងថា គាត់ចង់មានការងារដែលមានស្ថិរភាពមួយ។ គាត់បានធ្វើការក្រៅម៉ោងជាអ្នកលាងចាននៅភោជនីយដ្ឋានមួយកន្លែង ខណៈពេលដែលកំពុងស្វែងរកការងារពេញម៉ោង។

មិត្តភក្ដិម្នាក់បានណែនាំគាត់ឱ្យធ្វើការនៅក្រុមហ៊ុនដឹកជញ្ជូនមួយកន្លែង ហើយនៅទីបំផុតគាត់បានជាប់ការងារជាអ្នកបើកបរ។ «បើទោះជាប្រាក់ខែទាប ប៉ុន្តែវាជាការរស់នៅដោយសុច្ចរិត។» នេះជាការលើកឡើងរបស់ Fairizal ។ 

គាត់បានធ្វើការជាមួយក្រុមហ៊ុននេះអស់រយៈពេល ៩ឆ្នាំមកហើយ និងបានឡើងឋានៈជាបន្តបន្ទាប់ពី មេកា និងជាអ្នកគ្រប់គ្រងនាពេលបច្ចុប្បន្ន។

ការធានាបាននូវការងារដែលមានស្ថេរភាព នៅតែជាឧបសគ្គសម្រាប់អតីតពិរុទ្ធជន ដូចជា Fairizal ព្រោះការមាក់ងាយពីសង្គម ទៅលើអ្នកដែលធ្លាប់ប្រព្រឹត្តបទស្មើស ជារឿយៗអាចកំណត់ពីឱកាសការងារ ហើយនាំឱ្យមានការរើសអើង ដោយនិយោជក ដែលពួកគេព្រួយបារម្ភអំពីហានិភ័យ ដែលអាចកើតឡើង និងការយល់ឃើញអវិជ្ជមានចំពោះអតីតជនល្មើស។

លោក Soh Chi Yiong ប្រធានអង្គភាព the Singapore Prison Service’s Correctional Unit

យ៉ាងណាក៏ដោយ បើតាម ASP បានឱ្យដឹងថា អ្នកដែលប្រព្រឹត្តខុសម្ដងហើយម្ដងទៀត ក្នុងប្រទេសសិង្ហបុរី នៅតែមានកម្រិតទាបបំផុត ក្នុងចំណោមប្រទេសដទៃទៀត ដោយមានប្រមាណ ២០ភាគរយ។ 

បច្ចុប្បន្ន ចំនួននិយោជក ដែលគាំទ្រគម្រោង Yellow Ribbon តាមរយៈការជួលអតីតពិរុទ្ធជនមកធ្វើការក៏បានកើនឡើងពី ១,៣៨១ ក្នុងឆ្នាំ ២០០៤ ដល់ ៦,៥១៦ កាលពីឆ្នាំមុន។ 

បន្ទាប់ពីទទួលបានជំនូយផ្នែកហិរញ្ញវត្ថុសម្រាប់ការសិក្សា និងទទួលបានសញ្ញាបត្រកាលពីប៉ុន្មានឆ្នាំមុន ឥឡូវនេះ Fairizal ចង់បន្តការសិក្សាបន្ថែមទៀត ជាមួយនឹងការសុំជំនួយពី Yellow Ribbon ។ គំនិតផ្ដួចផ្ដើមនេះ យល់ព្រមលើថ្លៃសិក្សាពាក់កណ្ដាលរបស់គាត់ សម្រាប់ការបន្តសិក្សាថ្នាក់អនុបណ្ឌិត ផ្នែកគ្រប់គ្រងពាណិជ្ជកម្ម។ ខណៈលោកកំពុងស្វែងរកសាលា ដែលសមស្របសម្រាប់ការបន្តថ្នាក់អនុបណ្ឌិតរបស់ខ្លួន។ 

ក្រៅពីកែប្រែ និងអភិវឌ្ឍខ្លួនជាបន្តបន្ទាប់ Fairizal ក៏បានក្លាយជាអ្នកលើកទឹកចិត្តម្នាក់ផងដែរ ដោយតែងតែចូលរួមវេទិកានៅតាមសាលារៀន និងពន្ធធានាគារ ព្រមទាំងបានលើកទឹកចិត្តឱ្យយុវជន និងពិរុទ្ធជនទាំងអស់ ចាកចេញពីការប្រើប្រាស់គ្រឿងញៀន៕

ប្រភព ៖ CNA