ភ្នំពេញ – ក្រសួងអប់រំ យុវជន និងកីឡា ប្រកាសប្រឡងជ្រើសរើសគ្រូបង្រៀន​កម្រិតមូលដ្ឋានឯកទេសអប់រំកាយ និងកីឡា ជំនាន់ទី៣១ ចំនួន១០០នាក់។ ក្នុងនោះ ប្រឡងជ្រើសរើសគ្រូបង្រៀនកម្រិតមូលដ្ឋានឯកទេសអប់រំកាយ និងកីឡា ១២+២ ចំនួន៧៥នាក់ និងកម្រិតបរិញ្ញាបត្រសិល្បៈមនុស្សសាស្រ្ត ឯកទេសអប់រំកាយ ១២+៤ ចំនួន ២៥នាក់ ឱ្យចូលរៀននៅវិទ្យាស្ថានជាតិអប់រំកាយ និងកីឡា។

លក្ខខណ្ឌនៃការជ្រើសរើស បេក្ខជនទាំងពីរភេទត្រូវមានសញ្ជាតិខ្មែរ និងត្រូវមានអាយុចាប់ពី១៧ឆ្នាំ (ខែឆ្នាំកំណើតត្រឹម ២២ ខែតុលា ឆ្នាំ២០០៦ មានសិទ្ធប្រឡង) ដល់ ២៥ឆ្នាំ គិតត្រឹមថ្ងៃប្រឡង។ ទន្ទឹមគ្នានេះ បេក្ខជនទាំងពីរភេទត្រូវនៅលីវរហូតដល់បញ្ចប់ការបណ្ដុះបណ្ដាល, ត្រូវមានសុខភាពល្អ កាយសម្បទាមាំមួន និងគ្រប់លក្ខណ: ។

បេក្ខជនទាំងពីរភេទត្រូវពិនិត្យកាយសម្បទាមុនពេលប្រឡងនៅនាយកដ្ឋានសុខភាពសិក្សានៃក្រសួងអប់រំយុវជននិងកីឡា (អគាររដ្ឋបាលថ្មីចៅពញាហុក)។ ចំពោះ បេក្ខនារី ត្រូវមានកម្ពស់ចាប់ពី ១,៥៥ ម៉ែត្រ ឡើងទៅ ចំណែកបេក្ខជនត្រូវមានកម្ពស់ចាប់ពី ១,៦៥ ម៉ែត្រ ឡើងទៅ។ បេក្ខជនទាំងពីរភេទត្រូវមានសញ្ញាបត្រមធ្យមសិក្សាទុតិយភូមិ ឬសញ្ញាបត្រសមមូលឡើងទៅ។

សម្រាប់វិញ្ញាសាប្រឡងរួមមាន វិញ្ញាសាសរសេរ មានដូចជា ១- វប្បធម៌ទូទៅ ២- ជីវវិទ្យា ៣- ភាសាអង់គ្លេស,  វិញ្ញាសាអនុវត្តន៍កីឡា កម្មវិធីថ្នាក់ទី១២ រយ:ពេល ១ ម៉ោង ៣០ នាទី ក្នុងនោះ ១- នារីរត់៨០ម៉ែត្រ រយ:ពេល ១ ម៉ោង ០០ នាទី និង បុរសរត់១០០ម៉ែត្រ រយ:ពេល ១ ម៉ោង ០០ នាទី ២- លោតចម្ងាយ នារី-បុរស និង៣- ចោលដុំដែក នារីទម្ងន់៣គីឡូក្រាម និង បុរសទម្ងន់៥គីឡូក្រាម។

បេក្ខជននិងបេក្ខនារីដែលចាប់អារម្មណ៍អាចដាក់ពាក្យចុះឈ្មោះប្រឡងនៅវិទ្យាស្ថានជាតិអប់រំកាយ និងកីឡា ដែលមានទីតាំងនៅផ្លូវលេខ៥៩៨ ភូមិលូ សង្កាត់ស្វាយប៉ាកខណ្ឌឬស្សីកែវ រាជធានីភ្នំពេញ រៀងរាល់ម៉ោងធ្វើការ។ កាលបរិច្ឆេទនៃការទទួលពាក្យចុះឈ្មោះប្រឡង ចាប់ពីថ្ងៃប្រកាសផ្សាយជូនដំណឹងនេះ រហូតដល់ថ្ងៃទី០៦ ខែតុលា ឆ្នាំ២០២៣ វេលាម៉ោង ១៧:០០ នាទីរសៀល។

គួរជម្រាបជូនថា ក្រសួងអប់រំមិនអនុញ្ញាតឱ្យបេក្ខជនមកពីក្រៅខេត្តរបស់ខ្លួនដាក់ពាក្យសុំចុះឈ្មោះប្រឡងឡើយ (ផ្អែកលើសញ្ញាបត្រ ឬវិញ្ញាបនបត្របណ្តោះអាសន្នមធ្យមសិក្សាទុតិយភូមិជាគោល) ។ ក្នុងនោះ បេក្ខជនទាំងអស់អាចដាក់ពាក្យសុំចុះឈ្មោះប្រឡងជ្រើសរើសបានតែមួយប្រព័ន្ធគឺ ១២+២ឬ១២+៤៕