ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
រាជរដ្ឋាភិបាលអាណត្តិថ្មី ដែលដឹកនាំដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី បានប្រកាសពីការផ្តើមធ្វើកំណែទម្រង់មុខងារសាធារណៈ ដោយនឹងរៀបចំការប្រឡងជ្រើសរើសមន្រ្តីរាជការតាមយន្តការថ្នាក់ជាតិមួយ ដែលធានាបាននូវយុត្តិធម៌ និងតម្លាភាព ឈរលើគោលការណ៍ «អ្នកចេះ គឺជាប់»។
ថ្លែងក្នុងពិធីសំណេះសំណាលជាមួយបងប្អូនកម្មករនិយោជិត នៅស្រុកសំរោងទង ខេត្តកំពង់ស្ពឺ កាលពីថ្ងៃទី៩ ខែកញ្ញា កន្លងទៅ សម្តេចធិបតី ហ៊ុន ម៉ាណែត លើកឡើងថា គោលការណ៍ នៃកំណែទម្រង់រាជរដ្ឋាភិបាលអាណត្តិថ្មី កំណែទម្រង់មុខងារសាធារណៈ ដោយក្នុងនោះ គឺការប្រឡងនឹងត្រូវរៀបចំយន្តការថ្នាក់កណ្តាល ដើម្បីធានាឱ្យបាននូវភាពត្រឹមត្រូវ តម្លាភាព យុត្តិធម៌ ពោលគឺធានាថា អ្នកចេះ គឺជាប់។
សម្តេចមានប្រសាសន៍បន្ថែមថា «ដើម្បីលុបបំបាត់ភាពអយុត្តិធម៌ក្នុងសង្គម និងមានតម្លាភាព ស្មើភាពគឺផ្ដើមចេញពីការចូលរួមរបស់យើងទាំងអស់គ្នា ដោយបង្កើតផ្នត់គំនិតប្រកួតប្រជែងដោយភាពត្រឹមត្រូវ ជាជាងការប្រកួតប្រជែងពីខាងក្រោយ… កំណែទម្រង់អាចប្រព្រឹត្តទៅបាន គឺពិតណាស់ចាំបាច់ត្រូវការចូលរួមទាំងអស់គ្នា ដោយមានផ្នត់គំនិតជាប់គឺជាប់ដោយមោទនភាព បើធ្លាក់គឺធ្លាក់ដោយការអស់ចិត្ត»។
ដើម្បីឱ្យកិច្ចការកំណែទម្រង់មានប្រសិទ្ធភាព សម្តេចនាយករដ្ឋមន្រ្តី ក៏បានធ្វើការអំពាវនាវឱ្យមានការប្តេជ្ញាធ្វើទាំងអស់គ្នា ហើយបង្ហាញឱ្យឃើញពីឆន្ទៈ និងការខិតខំប្រឹងប្រែងក្នុងការធ្វើ ហ៊ានអាកាត់ ហ៊ានវះកាត់ ហើយជាពិសេសហ៊ានអនុវត្តគោលនយោបាយដែលរាជរដ្ឋាភិបាលបានសម្រេច។
ជាមួយគ្នានេះដែរ ឯកឧត្តម ហ៊ុន ម៉ានី រដ្ឋមន្រ្តីក្រសួងមុខងារសាធារណៈ បានបង្ហាញការគាំទ្រលើគោលការណ៍នយោបាយថ្មីរបស់រាជរដ្ឋាភិបាល ក្នុងការកែទម្រង់វិស័យមុខងារសាធារណៈ តាមរយៈការប្រឡងជ្រើសរើសមន្រ្តីថ្នាក់ជាតិ។ ឯកឧត្តមមានប្រសាសន៍នៅក្នុងពិធីសំណេះសំណាលជាមួយថ្នាក់ដឹកនាំ និងមន្រ្តីរាជការសាលាភូមិន្ទរដ្ឋបាល កាលពីថ្ងៃទី១១ ខែកញ្ញា ថា កំណែទម្រង់ការប្រឡងក្របខណ្ឌមន្រ្តីរាជការ គឺ មិនចាំបាច់ត្រូវស្គាល់អ្នកធំ មិនចាំបាច់ត្រូវមានខ្សែ តែត្រូវមានសមត្ថភាព។
ឯកឧត្តមបញ្ជាក់ថា ឯកឧត្តមមានតួនាទី និងទំនួលខុសត្រូវខ្ពស់ចំពោះសម្តេចមហាបវរធិបតី នាយករដ្ឋមន្ត្រី ក្នុងនាមជារដ្ឋមន្ត្រីមុខងារសាធារណៈ នៅក្នុងការសម្រេចកិច្ចការកែទម្រង់លើការប្រឡងនេះឱ្យបានហ្មត់ចត់ជាទីបំផុត និងជាពិសេសក្នុងគោលដៅដើម្បីសមធម៌ និងយុត្តិធម៌សង្គម ឆ្ពោះទៅកាន់កំណែទម្រង់មួយដែលអាចទទួលបានទាំងអស់គ្នា។
គួរបញ្ជាក់ថា ការលើកកម្ពស់ និងការពង្រឹងភាពស្អាតស្អំ នៅក្នុងរដ្ឋបាលសាធារណៈ ត្រូវបានដាក់បញ្ចូលនៅក្នុងគោលនយោបាយបញ្ចកោណដំណាក់កាលទី១ ក្នុងគោលដៅលើកកម្ពស់ និងការអង្រឹងភាពស្អាតស្អំ, ភាពសុចរិត និងជំនឿទុកចិត្តចំពោះរដ្ឋបាលសាធារណៈ ដើម្បីរួមចំណែកដល់ការអភិវឌ្ឍសង្គម-សេដ្ឋកិច្ច ក្របដោយប្រសិទ្ធភាព, បរិយាបន្ន និងចីរភាព។
សម្រាប់ការលើកកម្ពស់ និងការពង្រឹងភាពស្អាតស្អំ នៅក្នុងរដ្ឋបាលសាធារណៈ នេះ ក្នុងនីតិកាលទី៧ នៃរដ្ឋសភា រាជរដ្ឋាភិបាលនឹងផ្តោតអាទិភាពលើ ៖
ទី១. ការរៀបចំ និងការដាក់ឱ្យអនុវត្តក្រមសីលធម៌វិជ្ជាជីវៈ និងក្រមប្រតិបត្តិ ក្នុងមុខងារសាធារណៈ ព្រមទាំងជំរុញការគោរពខ្ជាប់ខ្ជួននូវគោលការណ៍វិសមិតភាពមុខងារ និងទំនាស់ផលប្រយោជន៍ ក្នុងការបំពេញការងាររបស់មន្រ្តីសាធារណៈ។
ទី២. ការពង្រឹងប្រសិទ្ធភាព នៃការធ្វើអធិការកិច្ច និងសវនកម្ម ព្រមទាំងការរៀបចំក្របខណ្ឌ និងវិធាន នៃប្រព័ន្ធអធិការកិច្ច និងសវនកម្ម ដើម្បីធានាសុខដុមនីយកម្ម នៃមុខងារអធិការកិច្ច និងសវនកម្ម ក្នុងរដ្ឋបាលសាធារណៈ។
ទី៣. ការពង្រឹងយន្តការគ្រប់គ្រង និងផ្តល់សេវាសាធារណៈ, ការផ្តល់ការលើកទឹកចិត្ត ផ្អែកលើគុណាធិបតេយ្យ និងការចាត់វិធានការម៉ឺងម៉ាត់ តាមច្បាប់ ក្នុងការអនុវត្តតួនាទី និងភារកិច្ច ដើម្បីបង្កើនជំនឿទុកចិត្ត និងប្រសិទ្ធភាព នៃការផ្តល់សេវាសាធារណៈ។
ទី៤. ការបន្តពង្រឹង និងពង្រីកការងារអប់រំ និងបង្ការទប់ស្កាត់ជាចម្បង ព្រមទាំងការពង្រឹងការអនុវត្តច្បាប់យ៉ាងម៉ឺងម៉ាត់ ដើម្បីបង្រ្កាបបទល្មើសអំពើពុករលួយ។
ទី៥. ការពង្រឹងកិច្ចសហប្រតិបត្តិការរវាងអង្គភាពប្រឆាំងអំពើពុករលួយ និងស្ថាប័នសាធារណៈ ជាពិសេសតាមរយៈយន្តការជនបង្គោល, ទាំងការងារអប់រំ និងការងារបង្ការទប់ស្កាត់, ដើម្បីរៀបចំដាក់ឱ្យអនុវត្ត, តាមដានត្រួតពិនិត្យ និងវាយតម្លៃ ការអនុវត្តផែនការយុទ្ធសាស្រ្ត និងផែនការលើកកម្ពស់ភាពស្អាតស្អំ នៅតាមស្ថាប័នសាធារណៈ៕
