ក្រុមភ្លេងព្យុហយាត្រាកាយរឹទ្ធជាតិវិទ្យាល័យបាក់ទូក ទទួលបានជ័យលាភីលេខ១ ក្នុងការប្រកួតក្រុមភ្លេងកាយរឹទិ្ធថ្នាក់ជាតិលើកទី១ ក្រោមប្រធានបទ “ភ្លេងក្នុងសន្តិភាព” នៅពហុកីឡដ្ឋានជាតិអូឡាំពិក កាលពីពេលកន្លងទៅថ្មីៗនេះ បន្ទាប់ពីបានសម្ដែងយ៉ាងស្វាហាប់ក្នុងការលើកដាក់ឧបករណ៍តន្រ្តី។

យុជន ផល សុផានិត តំណាងក្រុមភ្លេងព្យុហយាត្រាកាយរឹទ្ធជាតិវិទ្យាល័យបាក់ទូក បានប្រាប់ឱ្យដឹងថា កត្តាដែលជំរុញឱ្យក្រុមខ្លួនទទួលបានជ័យលាភីលេខ១ ក្នុងការប្រកួតក្រុមភ្លេងកាយរឹទិ្ធថ្នាក់ជាតិលើកទី១ នេះ គឺដោយសារសមាជិកក្រុមចេះសហការគ្នា មានឆន្ទៈមោះមុត ខិតខំប្រឹងប្រែងទាំងអស់គ្នា។

តំណាងក្រុមភ្លេងព្យុហយាត្រាកាយរឹទ្ធជាតិវិទ្យាល័យបាក់ទូក បញ្ជាក់បន្ថែមថា ក្រុមរបស់ខ្លួនបានសម្ដែងឱ្យស្របទៅនឹងប្រធានបទនៃកម្មវិធីប្រកួត «ភ្លេងក្នុងសន្តិភាព» ព្រមទាំងបានធ្វើឱ្យបរិយាកាសក្នុងការប្រកួត និងការលេងភ្លេងមានភាពសប្បាយរីករាយ មានការសម្ដែង និងបច្ចេកទេសក្នុងការលេងឧបករណ៍ ភាពលេចធ្លោរខ្លាំងជាងគេ។

នៅពេលគណៈកម្មការប្រកាសថា ក្រុមរបស់ខ្ញុំបានជាប់ជ័យលាភីលេ១ ឬមេដាយមាសក្នងកម្មវិធីនេះ​ ពួកខ្ញុំមានអារម្មណ៍រំភើប និងសប្បាយរីករាយខ្លាំង ដោយសារតែកម្មវិធីនេះ ជាកម្មវិធីលើកទី១ ដែលធ្វើឡើងនៅប្រទេសកម្ពុជា។

យុជន ផល សុផានិត តំណាងក្រុមភ្លេងព្យុហយាត្រាកាយរឹទ្ធជាតិវិទ្យាល័យបាក់ទូក

យុជន ផល សុផានិត បន្ថែមថា គុណតម្លៃក្រុមភ្លេងកាយរឹទ្ធ ស្ដែងចេញពីភាពតស៊ូ ព្យាយាម សហការគ្នា ធ្វើការងារជាក្រុម រួមគ្នាជាធ្លុងមួយដើម្បីបង្កើតជាបទភ្លេងមួយបាន។ សុផានិត បន្តថា ក្រុមភ្លេងព្យុហយាត្រាកាយរឹទ្ធជាតិវិទ្យាល័យបាក់ទូក បានចាប់ផ្ដើមហ្វឹកហាត់អស់រយៈពេលជាង ៤ខែ ដោយជួបឧបសគ្គមួយចំនួនក្នុងការហ្វឹកហាត់ ប៉ុន្តែសមាជិកក្រុមមានស្មារតី និងទឹកចិត្តមោះមុត ធ្វើយ៉ាងណាចូលរួមកម្មវិធីនេះឱ្យបាន ហើយខំប្រឹងយកជ័យលាភីក្នុងចំណាត់ថ្នាក់ណាមួយឱ្យបាន។

យុជន ផល សុផានិត បន្តថា លក្ខណៈពិសេសរបស់ក្រុមខ្លួន គឺការសម្ដែងត្រង់ឈុតព្រាបសន្តិភាព ដែលជាការលើកមកសម្ដែងរួមបញ្ចូលគ្នាជាមួយចង្វាក់ប្រពៃណី ជាពិសេស ក្រុមមានតួសម្ដែងជាព្រាបសន្តិភាព ដោយតួអង្គព្រាបគឺតំណាងអត្ថន័យ ភាពសុខសាន្ត សន្តិភាព ឯករាជ្យ នៃជាតិសាសន៍របស់យើង។

តំណាងក្រុមភ្លេងព្យុហយាត្រាកាយរឹទ្ធជាតិវិទ្យាល័យបាក់ទូក បន្ថែមថា កម្មវិធីប្រកួតក្រុមភ្លេងកាយរឹទិ្ធថ្នាក់ជាតិលើកទី១នេះ ពិតជាផ្ដល់អត្ថប្រយោជន៍ច្រើនទៅដល់កាយរឹទ្ធជាតិកម្ពុជា ក៏ដូចជានឹងជួយឱ្យយល់ច្បាស់អំពីរបៀបធ្វើការងារជាក្រុម សហការគ្នា និងឆន្ទៈក្នុងការរស់នៅ ពួតដៃគ្នាធ្វើការឱ្យទទួលបានជោគជ័យ។

យុជន ផល សុផានិត តំណាងក្រុមភ្លេងព្យុហយាត្រាកាយរឹទ្ធជាតិវិទ្យាល័យបាក់ទូក ក៏បានលើកទឹកចិត្តដល់យុវជនកាយរឹទ្ធទាំងរាជធានី និងខេត្តនានា ដែលមានក្រុមភ្លេង ប្រសិនបើមានឱកាសគួរចូលរួមក្នុងកម្មវិធីមួយនេះ ព្រោះវាបានផ្ដល់ប្រយោជន៍ជាច្រើនដល់យុវជន ជាពិសេស យុវជនជាតិកម្ពុជាទាំងមូល អាចផ្ដល់ឱកាសឱ្យយុវជនអាចស្គាល់អំពីតម្លៃនៃសង្គមជាតិ ក៏ដូចជាពង្រឹងភាពក្លាហានរបស់យុវជន និងការធ្វើការងារជាក្រុម។

ជាមួយគ្នានេះ ការប្រកួតក្រុមភ្លេងកាយរឹទិ្ធថ្នាក់ជាតិលើកទី១ ក្រោមប្រធានបទ “ភ្លេងក្នុងសន្តិភាព” មាន គណៈកម្មការចំនួន៧រូប មកពីក្រសួងការពារជាតិ ក្រសួងវប្បធម៌ និងវិចិត្រសិល្បៈ ក្រសួងអប់រំ យុវជន និងកីឡា និងសហភាពសហព័ន្ធយុវជនកម្ពុជា ដាក់ពិន្ទុដោយផ្ដោតទៅលើចង្វាក់ភ្លេង ខ្លឹមសារ ការសម្ដែង ការបំបែកក្បួន ឯកសណ្ឋាន  និងការសហការក្រុម។

គួររំលឹកថា កាយរឹទ្ធិជាតិបង្កើតឡើងក្នុងឆ្នាំ២០០០ ក្រោមគំនិតផ្ដួចផ្ដើម របស់សម្ដេច ហ៊ុន សែន។ ឆ្នាំ២០០៦ ក្រុមភ្លេងកាយរឹទ្ធិ បានចាប់ផ្ដើមបង្កើតឡើងនៅរាជធានីភ្នំពេញ ខេត្តសៀមរាប កណ្ដាល តាកែវ រតនគិរី កំពង់ស្ពឺ បន្ទាយមានជ័យ ឧត្តរមានជ័យ ប៉ៃលិន និងខេត្តកោះកុង។

សូមបញ្ជាក់ថា ក្រុមកាយរឹទ្ធជាតិកម្ពុជា បានទទួលស្គាល់ជាសមាជិកពេញសិទ្ធិ នៃអង្គការពិភពលោក នៃចលនាកាយរឹទ្ធិ នៅថ្ងៃ១ ខែកក្កដា ឆ្នាំ២០០៨។ បច្ចុប្បន្នកាយរឹទ្ធិជាតិកម្ពុជា មានសមាជិក ១៧៥ ០០០នាក់៕