ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
សារ៉ានិមល បច្ចុប្បន្នកំពុងរៀននៅសាកលវិទ្យាល័យមួយក្នុងរាជធានីភ្នំពេញ, ឆ្លៀតពេលពីការសិក្សារបស់ខ្លួន នាងបានចូលរួមធ្វើជាអ្នកស្ម័គ្រចិត្តនៅក្នុងកម្មវិធីពិព័រណ៌សៀវភៅកម្ពុជាលើកទី១០ ដែលប្រព្រឹត្តទៅនៅសាលាបុរីកោះពេជ្រ ពីថ្ងៃទី១៤ ដល់ថ្ងៃទី១៧ ខែធ្នូ ឆ្នាំ២០២៣ ។ អស់រយៈពេល៤ឆ្នាំហើយ ពោលគឺចាប់តាំងពីឆ្នាំ២០១៩មកម្ល៉េះ ដែល សារ៉ានិមល បានចូលរួមធ្វើជាអ្នកស្ម័គ្រចិត្តក្នុងកម្មវិធីពិព័រណ៌សៀវភៅកម្ពុជា ព្រោះតែខ្លួនជាមនុស្សចូលចិត្តអានសៀវភៅតាំងពីតូច។
នៅមានកត្តាមួយទៀតដែលជំរុញឱ្យ កញ្ញា សារិទ្ធ សារ៉ានិមល ចូលរួមជាអ្នកស្ម័គ្រចិត្តក្នុងកម្មវិធីពិព័រណ៌សៀវភៅ គឺដោយសារតែអ្នកដែលធ្វើការស្ម័គ្រចិត្តឆ្នាំមុនៗគឺជាគំរូភាពសម្រាប់រូបនាងក្នុងការជួយសង្គមទៅលើវិស័យអានសៀវភៅទៅកាន់ក្មេងៗជំនាន់ក្រោយ ឱ្យមានចំណាប់អារម្មណ៍ចូលចិត្តអានសៀវភៅសារជាថ្មី និងមានភាពផុសផុលក្នុងការអានបានទូលំទូលាយជាងមុន។
យ៉ាងណាក៏ដោយ ក្នុងការងារជាអ្នកស្ម័គ្រចិត្តនេះ សារ៉ានិមល ទទួលបានបទពិសោធន៍ និងចំណេះដឹងជាច្រើន ដូចជា ការសាមគ្គីគ្នាធ្វើការងារជាក្រុម, ការធ្វើទំនាក់ទំនង, ការសម្របខ្លួន, ការដោះស្រាយបញ្ហា និងអាចរៀនសូត្របានច្រើនពីដំណើរការ នៃការរៀបចំកម្មវិធីជាដើម។
អ្វីដែលខ្ញុំរៀនសូត្របានគឺ ការសាមគ្គីគ្នាធ្វើការងារជាក្រុម។ នៅក្នុងសង្គមមួយបើយើងអត់ចេះធ្វើការជាក្រុមទេ គឺយើងអត់អាចចូលទៅក្នុងសង្គមហ្នឹងបានទេ។ យើងចេះសហការគ្នា យល់ពីគ្នា និងដឹងថាការរៀបចំកម្មវិធីមួយត្រូវធ្វើអ្វីខ្លះដើម្បីកុំឱ្យមានភាពរញ៉េរញ៉ៃ។
កញ្ញា សារិទ្ធ សារ៉ានិមល បច្ចុប្បន្នកំពុងរៀននៅសាកលវិទ្យាល័យ និងជាអ្នកស្ម័គ្រចិត្តក្នុងកម្មវិធីពិព័រណ៍សៀវភៅកម្ពុជាលើកទី១០
ចំណែកយុវជន ជួន ពិសិដ្ឋ បច្ចុប្បន្នជានិស្សិសសាកលវិទ្យាល័យភូមិន្ទភ្នំពេញ ក៏បានសម្រេចចិត្តចូលរួមធ្វើការងារជាអ្នកស្ម័គ្រចិត្តក្នុងពិព័រណ៍សៀវភៅកម្ពុជាលើកទី១០ផងដែរ ដោយទទួលបន្ទុកផ្នែកប្រតិបត្តិការ (Operation) ។ ពិសិដ្ឋ ឱ្យដឹងថា ការមកធ្វើជាអ្នកស្ម័គ្រចិត្តនេះ ដំបូងឡើយគឺតាមរយៈការណែនាំរបស់មិត្តប៉ុណ្ណោះ ប៉ុន្តែបន្ទាប់ពីការចូលប្រជុំការងារម្តងទៅពីរដង ទើបខ្លួនដឹងថា ការសម្រេចចិត្តនេះគឺផ្អែកលើឆន្ទៈរបស់ខ្លួនដែរ ថែមទាំងមើលឃើញពីគុណតម្លៃនៃកិច្ចការ ដែលអាចឱ្យខ្លួនទទួលបានបទពិសោធន៍ថ្មីៗបន្ថែម។
តាមរយៈការងារស្ម័គ្រចិត្ត ខ្ញុំដឹងថា ខ្ញុំទទួលបានរបស់មួយដែលថ្មី ដែលអត់ទាន់ដឹងពីមុនមក ជាពិសេសការងារក្រុម អត្ថចរិករបស់មនុស្ស ការទាក់ទងគ្នាយ៉ាងមានប្រសិទ្ធភាពអត់មានពាក្យគំរោះគំរើយដាក់គ្នា និងចេះធ្វើការពេលមានមនុស្សច្រើន
យុវជន ជួន ពិសិដ្ឋ
ពិសិដ្ឋ កត់សម្គាល់ថា នៅក្នុងការពិព័រណ៍សៀវភៅឆ្នាំ២០២៣នេះ អ្នកស្ម័គ្រចិត្តទាំងអស់រួសរាយ មានការទំនាក់ទំនងគ្នាល្អ ។ ពិសដ្ឋ យល់ថា កត្តានេះអាចមកពីអ្នកចាត់ចែងក្រុមនីមួយៗមានវិធីសាស្រ្តល្អ នេះជាអ្វីដែលលោកចាប់អារម្មណ៍និងរៀនសូត្របន្ថែម។
បើសិនជាយុវជនរបស់យើងចាប់អារ្មណ៍លើការងារស្ម័គ្រចិត្តតាំងពីនៅវិទ្យាល័យ គឺកាន់តែល្អប្រសើរ ដោយធ្វើឱ្យបទពិសោធផ្ទាល់ខ្លួនមានភាពរឹងមាំ អាចសម្របជាមួយមនុស្សបានពេលរៀននៅសាកល។ ហើយការស្ម័គ្រចិត្ត មិនចាំបាច់ទាល់តែពាក់អាវរបស់ស្ថាប័នណាមួយទេ សូម្បីតែការ គោរពច្បាប់ចរាចរណ៍ឬភ្លើងស្តុប ក៏ជាការស្ម័គ្រចិត្តមួយដែរ អាហ្នឹងជាការងាររបស់យុវជន ក្នុងសង្គមរបស់យើង។
យុវជន ជួន ពិសិដ្ឋ
យុវជន លឹម សុក្រសុក្រឹត បច្ចុប្បន្នគឺជាសិស្សថ្នាក់ទី១២ នៃវិទ្យាល័យទួលទំពូង រាជធានីភ្នំពេញ, ត្បិតជាសិស្សរៀននៅវិទ្យាល័យក៏ពិតមែន តែ សុក្រឹត ក៏មកចូលរួមធ្វើជាអ្នកស្ម័គ្រចិត្តនៅក្នុងកម្មវិធីពិព័រណ៌សៀវភៅផងដែរ ព្រោះតែរូបគេចង់ប្រើប្រាស់ពេលដែលខ្លួនមានឱ្យកើតជាប្រយោជន៍បន្ថែម ។ សុក្រឹត បានចែករំលែកនូវអ្វីដែលខ្លួនបានរៀនសូត្រពីការងារស្ម័គ្រចិត្តនេះ ដែលមានដូចជា យល់ដឹងអំពីដំណើរការងារជាក្រុម និងភាពបត់បែន ក៏ដូចជាបង្កភាពងាយស្រួល ក្នុងការសម្របខ្លួនទៅនឹងមជ្ឈដ្ឋានថ្មីៗ។
ក្រោយពីការមកចូលរួមការងារនេះ ខ្ញុំស្គាល់អំពីកម្មវិធីបន្ថែមនៃតួនាទីមួយៗ ហើយងាយស្រួលក្នុងការសម្របខ្លួនពេលចូលសង្គម ខ្ញុំស្គាល់ខាងក្រៅច្រើន ហើយស្គាល់ពីរបៀបការងារច្រើនជាងមុន
យុវជន លឹម សុក្រសុក្រឹត
សុក្រឹត បន្ថែមថា ដើមឡើយខ្លួនហាក់មានភាពរអាក់រអួលបន្តិចដែរ ដោយសារតែខ្លួននៅមានវ័យក្មេង បទពិសោធន៍ក៏តិច ចំណែកការងារសាលាវិញក៏នៅមានច្រើន ហើយកាលវិភាគត្រូវរៀបចំជាថ្មី។ ទន្ទឹមគ្នានោះ ត្រូវមកធ្វើការជាមួយមនុស្សដែលមានគំនិតនិងឥរិយាបថចម្រុះគ្នា ប៉ុន្តែជាមេរៀនល្អនោះ គឺ ពួកយើងជាអ្នកធ្វើការស្ម័គ្រចិត្តតែងទុកឱកាសឱ្យគ្នាបញ្ចេញយោបល់ម្នាក់ម្តងៗ និងសម្រេចតាមមតិមួយណាដែលមានហេតុផលសមរម្យជាងគេ ដែលជាហេតុបង្កភាពងាយស្រួលក្នុងការគិត៕
