អង្គការយូនីសេហ្វ (UNICEF) ប្រចាំកម្ពុជា កំពុងប្រឈមនឹងការខ្វះខាតថវិកាជាង ២លានដុល្លារអាមេរិក ដែលអាចប៉ះពាល់ដល់កិច្ចប្រឹងប្រែងស្តារឡើងវិញ និងនិរន្តរភាព នៃសេវាចាំបាច់សម្រាប់កុមារ ខណៈអង្គការនេះបានអំពាវនាវឱ្យរាជរដ្ឋាភិបាល ដៃគូអភិវឌ្ឍន៍ វិស័យឯកជន និងសាធារណជន បន្តរួមចំណែកវិនិយោគលើកុមារដើម្បីធានាអនាគតរបស់ប្រទេស។

ការអំពាវនាវនេះត្រូវបានលើកឡើងដោយលោកបណ្ឌិត វីល ផាកស៍ (Dr. Will Parks) ប្រធានតំណាងអង្គការយូនីសេហ្វប្រចាំកម្ពុជា ក្នុងពិធីប្រកាសតែងតាំងទូតសុឆន្ទៈយូនីសេហ្វប្រចាំកម្ពុជា និងអបអរសាទរទិវាកុមារអន្តរជាតិ ១ មិថុនា ក្រោមប្រធានបទ «រួមគ្នាដើម្បីកុមារគ្រប់រូប» ដែលរៀបចំឡើងនៅថ្ងៃទី១ ខែមិថុនា ឆ្នាំ២០២៦ ក្រោមអធិបតីភាពលោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត។

លោកបណ្ឌិត វីល ផាកស៍ បានបញ្ជាក់ថា វិបត្តិនៅតាមតំបន់ព្រំដែននាពេលថ្មីៗនេះ បានបង្កឱ្យកុមារ និងគ្រួសាររាប់ពាន់នាក់ត្រូវផ្លាស់ទីលំនៅ និងប្រឈមនឹងភាពភ័យខ្លាច ដែលធ្វើឱ្យតម្រូវការជំនួយមនុស្សធម៌កាន់តែកើនឡើង។ ទន្ទឹមនឹងនេះ ការខ្វះខាតថវិកាជាង ២លានដុល្លារ កំពុងគំរាមកំហែងដល់ការបន្តផ្តល់សេវាសំខាន់ៗ ដល់កុមារងាយរងគ្រោះ។

លោកបានអំពាវនាវឱ្យគ្រប់ភាគីពាក់ព័ន្ធ រួមមាន រាជរដ្ឋាភិបាល ដៃគូអភិវឌ្ឍន៍ វិស័យឯកជន យុវជន និងសិល្បករ បន្តគាំទ្រ និងវិនិយោគលើកុមារ ដោយលោកបានគូសបញ្ជាក់ថាការវិនិយោគលើកុមារ គឺជាការវិនិយោគលើសេដ្ឋកិច្ចដែលមានភាពធន់ និងអនាគតប្រកបដោយសន្តិភាព និងវិបុលភាពរបស់កម្ពុជា។

ក្នុងឱកាសនោះ លោកបណ្ឌិត វីល ផាកស៍ ក៏បានរំលេចពីបេសកកម្មមនុស្សធម៌រយៈពេល ៧៤ឆ្នាំរបស់យូនីសេហ្វនៅកម្ពុជា ដោយបានធ្វើការយ៉ាងជិតស្និទ្ធជាមួយរាជរដ្ឋាភិបាល ចាប់តាំងពីក្រោយរបបខ្មែរក្រហមមក។ កិច្ចសហប្រតិបត្តិការនេះបានផ្តោតលើវិស័យសុខភាព អាហារូបត្ថម្ភ ការអប់រំ បំណិនសម្រាប់សតវត្សរ៍ទី២១ ការការពារកុមារពីអំពើហិង្សា និងការកេងប្រវ័ញ្ចទាំងក្នុង និងក្រៅប្រព័ន្ធអ៊ីនធឺណិត ព្រមទាំងការពង្រីកការទទួលបានទឹកស្អាតដែលមានភាពធន់នឹងការប្រែប្រួលអាកាសធាតុ។

លោកបានបន្ថែមថា យូនីសេហ្វបន្តផ្តល់អាទិភាពដល់ក្រុមកុមារងាយរងគ្រោះបំផុត រួមមាន កុមារីវ័យជំទង់ កុមារមានពិការភាព ជនជាតិដើមភាគតិច និងគ្រួសារក្រីក្រ ដើម្បីធានាថា កុមារគ្រប់រូបទទួលបានឱកាសស្មើគ្នាក្នុងការរស់នៅ និងអភិវឌ្ឍសក្តានុពលរបស់ខ្លួន។

ដើម្បីដោះស្រាយបញ្ហាទាំងនេះ លោកជំទាវបណ្ឌិត ពេជ ចន្ទមុន្នី បានលើកទឹកចិត្តឱ្យមានការគាំទ្រថវិកាបន្ថែមដល់បេសកកម្មមនុស្សធម៌របស់ UNICEF និងបានបញ្ជាក់ជាថ្មីថា «សន្តិភាព និងស្ថិរភាព» គឺជាគ្រឹះដ៏សំខាន់បំផុតមិនអាចខ្វះបានសម្រាប់សុខុមាលភាពកុមារ៕