ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងកិច្ចប្រជុំមួយកាលពីដើមសប្តាហ៍នេះ ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានណែនាំដល់ក្រុមការងារពាក់ព័ន្ធ ផ្តើមធ្វើកំណែទម្រង់កម្មវិធីសិក្សា និងសៀវភៅសិក្សា ដើម្បីលើកកម្ពស់លទ្ធផលតេស្ត PISA។
ឯកឧត្តមបណ្ឌិតសភាចារ្យ ហង់ជួន ណារ៉ុន មានប្រសាសន៍ថា ការពង្រឹងមូលដ្ឋានគ្រឹះឱ្យបានរឹងមាំតាំងពីកម្រិតអំណានដំបូង និងគណិតវិទ្យាដំបូង គឺជារឿងចាំបាច់ ដោយត្រូវកំណត់សាលារៀនគោលដៅឱ្យបានច្បាស់លាស់ ដើម្បីឈានទៅអនុវត្តការអប់រំផ្អែកលើសមត្ថភាព (CBE) និងដកពិសោធពីសាលារៀនដែលមានស្នាដៃ ដូចជាសាលារៀនជំនាន់ថ្មី ដើម្បីចងក្រងជាសៀវភៅណែនាំគ្រូ និងវិធីសាស្ត្របង្រៀនថ្មីៗដែលផ្សារភ្ជាប់ជាមួយសំណួរបែប PISA។
រដ្ឋមន្ត្រីក្រសួងអប់រំ បន្ថែមថា ក្នុងកំណែទម្រង់កម្មវិធីសិក្សានេះ តម្រូវឱ្យមានការបញ្ជ្រាបកម្រងសំណួរវិភាគទៅក្នុងសៀវភៅសិក្សា និងការបង្រៀន ដើម្បីបង្ហាត់សិស្សឱ្យចេះវិភាគរកដំណោះស្រាយ និងពង្រឹងសមត្ថភាពគ្រូបង្រៀនឱ្យចេះប្រើប្រាស់បច្ចេកទេសសួរដេញដោល ជំរុញការគិត និងវិភាគដល់សិស្ស។
តេស្ត PISA គឺជាកម្មវិធីវាយតម្លៃអន្តរជាតិដែលរៀបចំឡើងដោយអង្គការសហប្រតិបត្តិការ និងការអភិវឌ្ឍន៍សេដ្ឋកិច្ច (OECD)។ កម្មវិធីនេះត្រូវបានរៀបចំឡើងជារៀងរាល់៣ឆ្នាំម្តង ដើម្បីវាយតម្លៃចំណេះដឹង និងជំនាញរបស់សិស្សអាយុ១៥ឆ្នាំ ក្នុងវិស័យគណិតវិទ្យា វិទ្យាសាស្ត្រ និងការអាន។ គោលបំណងចម្បងរបស់ PISA គឺដើម្បីវាយតម្លៃ និងកែលម្អប្រព័ន្ធអប់រំទូទាំងពិភពលោក ដោយផ្តោតលើការធានាថា សិស្សទាំងអស់មានសមត្ថភាពគ្រប់គ្រាន់ក្នុងការចូលរួមយ៉ាងមានប្រសិទ្ធភាពក្នុងសង្គម និងសេដ្ឋកិច្ច៕
