ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
កំពង់ស្ពឺ – សម្តេចតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា បានប្រកាសពីពិធីបើកសាងសង់លើកម្រិតគុណភាពផ្លូវជាតិលេខ៤១ ថា សម្តេចគ្រោងនឹងជួបជាមួយនឹងសិស្សនិទ្ទេស A នៃការប្រឡងសញ្ញាបត្រមធ្យមសិក្សាទុតិយភូមិ ប្រហែលជាក្នុងខែកុម្ភៈ ខាងមុខ។
ជំនួបជាមួយសិស្សនិទ្ទេស A ជាមួយសម្តេចនេះ គឺជាការលើកទឹកចិត្តដល់ពួកគេដែលបានខិតខំប្រឹងសិក្សា និងប្រឡងទទួលបាននិទ្ទេសល្អ។ តែយ៉ាងណាក៏ដោយ សម្តេចតេជោក៏លើកទឹកចិត្តបេក្ខជនដែលមិនទទួលបាននិទ្ទេស A ផងដែរ ហើយក៏អំពាវនាវកុំឱ្យមានការធ្វើអត្ថាធិប្បាយដោយយកចិត្តទុកដាក់ខ្ពស់ជ្រុលពេលមួយបញ្ហានិទ្ទេសនេះ។
សម្តេចតេជោបានបញ្ជាក់ថា គោលដៅសំខាន់បំផុតនៃការប្រឡងបាក់ឌុប គឺដើម្បីជាប់ ហើយចូលរៀននៅមហាវិទ្យាល័យ។
សម្តេចតេជោ ហ៊ុន សែន នាយករដ្ឋមន្រ្តី
“កូនៗចៅៗត្រូវក្តាប់ជាប់គោលដៅប្រឡងដើម្បីអី? ប្រឡងសំខាន់បំផុតគឺឱ្យជាប់បាក់ឌុប កាលណាជាប់បាក់ឌុបហើយ គឺយើងនឹងមានឱកាសដើម្បីឈានទៅរកការចូលមហាវិទ្យាល័យ ឯរឿងនិទ្ទេស វាជារឿងមួយ…”
សម្តេចតេជោមានប្រសាសន៍ថា ប្រព័ន្ធប្រឡងរបស់យើង គឺជាប្រព័ន្ធរបស់បារាំង ដែលយកការប្រឡងចុងក្រោយ។ ដូច្នេះពេលខ្លះ សិស្សដែលរៀនពូកែ ប៉ុន្តែនៅថ្ងៃប្រឡងគេមានបញ្ហាសុខភាពធ្វើមិនបានល្អ ក៏បណ្តាលឱ្យទទួលបាននិទ្ទេសមិនល្អ ដូច្នេះសម្តេចលើកទឹកចិត្ត ដោយថា និទ្ទេសណាក៏ដោយ គឺនៅតែជាប់បាក់ឌុបដូចគ្នា ហើយមានលទ្ធភាពចូលទៅរៀនមហាវិទ្យាល័យដូចគ្នា គ្រាន់តែនិទ្ទេស A ដែលជាសិស្សពូកែ ត្រូវទទួលការលើកទឹកចិត្ត ដោយមានការជួបជាមួយនាយករដ្ឋមន្រ្តី។
បើយោងតាមលទ្ធផល នៃការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប សម័យប្រឡង ៥ ធ្នូ ២០២២ មានសិស្សចំនួន ៩០៩៥០នាក់ បានប្រឡងជាប់ ក្នុងនោះ សិស្សទទួលបាននិទ្ទេស A មានចំនួន ១០៤៩នាក់, និទ្ទេស B មានចំនួន ៧២៣២នាក់, និទ្ទេស C ចំនួន ១៩០៥៣នាក់, និទ្ទេស D ចំនួន ៣១១៦៦នាក់ និងនិទ្ទេស E មានចំនួន ៣២៤៥០នាក់៕
