គ្រឹះស្ថាន អប់រំសាធារណៈនិងឯកជននៅភ្នំពេញនិងខេត្តចំនួនបួនត្រូវផ្អាក

ភ្នំពេញ៖ បន្ទាប់ពីបើកដំណើរការគ្រឹះស្ថានសិក្សារដ្ឋ និងឯកជនឡើងវិញនៅទូទាំងប្រទេសបានក្នុងរយៈពេលខ្លី ពេលនេះសាលារៀនទាំងអស់រាជធានីភ្នំពេញ ខេត្តកណ្ដាល ខេត្តព្រះសីហនុ (ក្រុងព្រះសីហនុ និងស្រុកស្ទឹងហាវ) ខេត្តព្រៃវែង និងខេត្តកោះកុង បានផ្អាកសកម្មភាពបង្រៀនជាបណ្តោះអាសន្នម្តងទៀតដោយសារឥទ្ធិពលជំងឺផ្លូវដង្ហើមកូវីដ-19 បន្ទាប់ពីមានព្រឹត្តិការណ៍សហគមន៍20 កុម្ភះផ្ទុះឡើងកន្លងទៅ។

ការសម្រេចផ្អាកសកម្មភាពគ្រឹះស្ថានសិក្សារដ្ឋនិងឯកជនខាងលើ ដើម្បីចូលរួមទប់ស្កាត់និងកាត់បន្ថយការរីករាលដាលជំងឺកូវីដ-19 នៅក្នុងសហគមន៍។ គ្រឹះស្ថានសិក្សាត្រូវបន្តរៀបចំកម្មវិធីសិក្សារៀងៗខ្លួនតាមប្រព័ន្ធបណ្ដុះបណ្ដាលពីចម្ងាយ ឬអនឡាញ។ ទន្ទឹមគ្នានេះ ក្រសួងការងារ និងបណ្តុះបណ្តាលវិជ្ជាជីវៈក៏សម្រេចផ្អាកទីតាំងបណ្តុះបណ្តាលវិជ្ជាជីវៈនៅតាមបណ្តាខេត្តទាំងនោះជាបណ្តោះអាសន្នផងដែរ។

ទន្ទឹមនឹងនេះផងដែរ អាជ្ញាធរខេត្តកំពង់ស្ពឺ ខេត្តមណ្ឌលគិរី ខេត្តព្រះសីហនុ ខេត្តព្រះវិហារ ខេត្តកំពង់ចាម ព្រៃវែង ស្វាយរៀង និងខេត្តឧត្តរមានជ័យ ក៏បានសម្រេចបិទការចំរៀបពិធីមង្គលការ ពីធីជប់លៀង និងពិធីជួបជុំនានារហូតដល់មានការជូនដំណឹងម្ដងទៀត៕