ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – លើកឡើងនៅក្នុងពិធីបើកការដ្ឋានសាងសង់ស្ពានឆ្លងទន្លេមេគង្គក្នុងខេត្តក្រចេះ នាថ្ងៃទី២ ខែមករា ឆ្នាំ២០២៣ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា មានប្រសាសន៍ថា កម្ពុជានៅត្រូវការកសាងនូវហេដ្ឋារចនាសម្ព័ន្ធចាំបាច់ជាច្រើនទៀត សំដៅដោះស្រាយបញ្ហាឱ្យប្រជាពលរដ្ឋមានភាពងាយស្រួលក្នុងការធ្វើដំណើរ។
បើតាមការបញ្ជាក់របស់សម្តេចតេជោ រាជរដ្ឋាភិបាលបានផ្តល់អាទិភាពចំនួន៤យ៉ាងសម្រាប់ការដោះស្រាយជូនប្រជាពលរដ្ឋ ក៏ដូចជាសម្រាប់ការវិនិយោគនៅកម្ពុជា នោះគឺ ទឹក ផ្លូវ ភ្លើង និងមនុស្ស ហើយបច្ចុប្បន្នគម្រោងនេះនៅតែបន្ត ដោយយកមនុស្សជាអាទិភាពសំខាន់មុន គឺ មនុស្ស ផ្លូវ ទឹក ភ្លើង។
ពាក់ព័ន្ធជាមួយនឹងធនធានមនុស្ស ជាពិសេសអ្នកជំនាញផ្លូវថ្នល់នៅកម្ពុជាវិញ បើតាមការបញ្ជាក់របស់ ឯកឧត្តម ហ៊ាង វុត្ថា អគ្គនាយកបច្ចេកទេស នៃក្រសួងសាធារណការ និងដឹកជញ្ជូន បានមានប្រសាសន៍ថា បច្ចុប្បន្ននៅកម្ពុជា មាននិស្សិតតែ៥ភាគរយ ដែលរៀនវិស្វករជំនាញផ្លូវថ្នល់ ដោយធនធានមនុស្សប៉ុណ្ណេះ មិនទាន់ឆ្លើយតបទៅតាមតម្រូវការទីផ្សារការងារសាងសង់ផ្លូវថ្នល់នៅឡើយនោះទេ។
ឯកឧត្តម ហ៊ាង វុត្ថា អគ្គនាយកបច្ចេកទេស នៃក្រសួងសាធារណការ និងដឹកជញ្ជូន
“មានហេដ្ឋារចនាសម្ព័ន្ធជាច្រើនទៀតដែលត្រូវអភិវឌ្ឍ និងកែសម្រួលបន្តទៀត, តាមការសង្កេតនៅប្រទេសយើង មានតែ៥ភាគរយទេដែលរៀនវិស្វករ ទីផ្សារការងារសាងសង់ផ្លូវថ្នល់ ធនធានមនុស្សមិនទាន់ឆ្លើយតបទៅតាមតម្រូវការនៅឡើយ”
សូមបញ្ជាក់ដែរថា ផ្លូវថ្នល់ក៏ត្រូវបានគេចាត់ទុកជាអាទិភាពមួយ ក្នុងចំណោមអាទិភាពទាំង៤របស់រាជរដ្ឋាភិបាលផងដែរ ព្រោះតែបានចូលរួមនៅក្នុងការកាត់បន្ថយភាពក្រីក្រ, ចូលរួមលើកស្ទួយសុខមាលភាពរបស់ប្រជាពលរដ្ឋ ដូចជាជួយឱ្យបងប្អូនប្រជាពលរដ្ឋអាចធ្វើដំណើរទៅកាន់មន្ទីរពេទ្យ ហើយការផ្តល់សេវាផ្នែកសុខាភិបាលបានលឿន។ ផ្លូវថ្នល់ក៏បានផ្តល់សេវាផ្នែកអប់រំបានល្អ ក្នុងការបណ្តុះបណ្តាលធនធានមនុស្សជាសរសរស្តម្ភក្នុងការកសាងប្រទេសជាតិ ហើយ
មួយទៀតវិស័យផ្លូវថ្នល់ ក៏បានចូលរួមនៅក្នុងការលើកកម្រិតនៅក្នុងការអភិវឌ្ឍសេដ្ឋកិច្ចផងដែរ។
បើតាមប្រសាសន៍លើកឡើងរបស់សម្តេចតេជោនាយករដ្ឋមន្រ្តី បច្ចុប្បន្នកម្ពុជាបានស្តារ និងសាងសង់នូវហេដ្ឋារចនាសម្ព័ន្ធផ្លូវថ្នល់ និងស្ពានជាច្រើន ដូចជាស្ពានឆ្លងកាត់ទន្លេមេគង្គចំនួន៤ ស្ពានឆ្លងកាត់ទន្លេសាបចំនួន២ ក៏ដូចជាស្ពានឆ្លងកាត់ទន្លេបាសាក់ជាដើម។ ប៉ុន្តែការកសាងហេដ្ឋារចនាសម្ព័ន្ធផ្លូវថ្នល់នៅកម្ពុជាមិនបញ្ចប់តែត្រឹមនេះទេ។ សម្តេចតេជោមានប្រសាសន៍ថា នៅក្នុងដំណើរទស្សនកិច្ចរបស់សម្តេចទៅកាន់ប្រទេសចិននៅពេលខាងមុខនេះ វាច្បាស់ណាស់ថា នឹងមានគម្រោងថ្មីជាច្រើនទៀត រាប់ទាំងផ្លូវល្បឿនលឿនទី២ ដែលតភ្ជាប់ភ្នំពេញ ទៅកាន់ព្រំដែនប្រទេសវៀតណាមផងដែរ៕
