ភ្នំពេញ – ក្រសួងអប់រំ យុវជន និងកីឡា បានកំណត់យកថ្ងៃទី០២ ខែតុលា ឆ្នាំ២០២៣ ជាសម័យប្រឡងសញ្ញាបត្រមធ្យមសិក្សាបឋមភូមិ ខណៈ​ការ​​ប្រកាស​លទ្ធផល​នឹងធ្វើ​ឡើង​នៅ​ថ្ងៃ​ទី ៩ ខែ​វិច្ឆិកា ឆ្នាំ២០២៣។ នេះបើតាមសេចក្ដីណែនាំស្ដីពីការរៀបចំ និងការប្រព្រឹត្តទៅនៃការប្រឡងនៅតាមគ្រឹះស្ថានមធ្យមសិក្សាចំណេះទូទៅសាធារណៈ និងឯកជន សម្រាប់ឆ្នាំសិក្សា ២០២២-២០២៣។

បើតាមសេចក្ដីណែនាំរបស់ក្រសួងអប់រំ ការប្រឡងសញ្ញាបត្រមធ្យមសិក្សា​បឋមភូមិ នឹងមានរយៈពេល ២ថ្ងៃ គឺនៅថ្ងៃទី០២ ខែតុលា ឆ្នាំ២០២៣ ដោយ​មានវិញ្ញាសាប្រឡងនៅពេលព្រឹក រួមមាន តែងសេចក្ដី គីមីវិទ្យា ផែនដីនិងបរិស្ថានវិទ្យា, ពេលរសៀល វិញ្ញាសាប្រឡង រួមមាន រូបវិទ្យា ភូមិវិទ្យា និងសីលធម៌-ពលរដ្ឋវិជ្ជា។ នៅថ្ងៃទី០៣ ខែតុលា ឆ្នាំ២០២៣ ពេលព្រឹកវិញ្ញាសាប្រឡង រួមមាន គណិតវិទ្យា ការសរសេរតាមអាន, ក្នុងនោះ ពេលរសៀល​ មានវិញ្ញាសាប្រឡង រួមមាន ជីវវិទ្យា ប្រវត្តិវិទ្យា និងភាសាបរទេស។

បើតាមការ​បញ្ជាក់របស់ក្រសួងអប់រំ ការ​ប្រឡង​សញ្ញាបត្រមធ្យមសិក្សា​បឋមភូមិ​សម្រាប់ឆ្នាំសិក្សា​២០២២-២០២៣ ក្រសួងបន្ត​ប្រគល់សិទ្ធិអំណាច និង​ការ​ទទួល​ខុសត្រូវ​ទាំងស្រុង ជូនគ្រឹះស្ថាន​មធ្យមសិក្សា​នីមួយៗរៀបចំការ​ប្រឡង​ចាប់តាំង​ពី​ការ​រៀបចំវិញ្ញាសា ដំណើរការ​សំណេរ កំណែ ស្រង់បូកពិន្ទុ និង​ប្រកាសលទ្ធផល​នៅ​តាមគ្រឹះស្ថាន​មធ្យមសិក្សា​នីមួយៗ។

សម្រាប់ការប្រឡងនេះទៀតសោត ក្រសួងអប់រំបានណែនាំ​ឱ្យគ្រឹះស្ថាន​មធ្យមសិក្សា​នីមួយៗ​ត្រូវ​ប្រើប្រាស់​បុគ្គលិកអប់រំ​នៅ​ក្នុង​គ្រឹះស្ថាន​មធ្យមសិក្សា​របស់ខ្លួនផ្ទាល់ធ្វើជាមេប្រយោគប្រឡង ហើយ​មន្ទីរ​អប់រំ យុវជន និង​កីឡា មានភារកិច្ចបញ្ជូន​មន្រ្តីជំនាញ​ដើម្បីត្រួតពិនិត្យ​តាមមណ្ឌល​ប្រឡង​មួយ​ចំនួន​ក្នុងករណីចាំបាច់ និង​មានភារកិច្ច​ចេញ​វិញ្ញាបនបត្រ​បណ្តោះអាសន្ន​មធ្យមសិក្សា​បឋមភូមិជូន​ដល់បេក្ខជន​ទាំងអស់​ដែលប្រឡងជាប់។

គួរ​រំលឹក​ថា កាលពី​ឆ្នាំ​សិក្សា២០២១-២០២២ កន្លងទៅ ការប្រឡងសញ្ញាបត្រមធ្យមសិក្សាបឋមភូមិ ក្រសួង​អប់រំ យុវជន និង​កីឡា បាន​រៀបចំធ្វើ​ឡើងនៅ​ថ្ងៃ​ទី ២៤ ខែ​វិច្ឆិកា ឆ្នាំ២០២២ ដូច្នេះនៅ​ឆ្នាំសិក្សា​២០២២-២០២៣នេះ ការ​ប្រឡង​សញ្ញាបត្រមធ្យមសិក្សា​បឋមភូមិគឺធ្វើ​លឿនជាងឆ្នាំមុន៕