ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ឯកឧត្តម ហ៊ុន ម៉ានី ឧបនាយករដ្ឋមន្រ្តី និងជារដ្ឋមន្រ្តីក្រសួងមុខងារសាធារណៈ បានព្រលយឱ្យដឹងថា ចាប់ពីពេលនេះទៅថ្ងៃខាងមុខ គ្រូបង្រៀនបឋមសិក្សា គឺចាំបាច់ទាល់តែមានកម្រិតបរិញ្ញាបត្រ។ ការកំណត់គុណវុឌ្ឍិរបស់គ្រូបង្រៀនបឋមសិក្សានេះ គឺជាការគិតគូររបស់រាជរដ្ឋាភិបាល ដើម្បីលើកកម្ពស់គុណភាពអប់រំកម្ពុជា។
ក្នុងសន្និបាតបូកសរុបលទ្ធផលការងារឆ្នាំ២០២៥ និងលើកទិសដៅការងារឆ្នាំ២០២៦ របស់ក្រសួងមុខងារសាធារណៈ កាលពីចុងសប្តាហ៍កន្លងទៅនេះ ឯកឧត្តម ហ៊ុន ម៉ានី មានប្រសាសន៍ថា ការលើកកម្ពស់គុណវុឌ្ឍិគ្រូបង្រៀន ពិតជាមានសារសំខាន់ ព្រោះគ្រូបង្រៀនមានសមត្ថភាពទាំងចំណេះដឹង និងចំណេះធ្វើ នឹងអាចផ្តល់ការអប់រំមួយប្រកបដោយគុណភាព។
លោកបណ្ឌិត យង់ ពៅ អគ្គលេខាធិការរាជបណ្ឌិត្យសភាកម្ពុជា គាំទ្រចំពោះការកំណត់គុណវុឌ្ឍិគ្រូបង្រៀនបឋមសិក្សានេះ ដោយថា កម្ពុជាដល់ពេលដែលត្រូវគិតគូរលើបញ្ហានេះហើយ ដោយថា គុណភាពមនុស្ស គឺផ្តើមចេញពីគុណភាពក្នុងការអប់រំ។ តែយ៉ាងណា លោកបណ្ឌិតគិតថា មិនមែនសញ្ញាបត្របរិញ្ញាបត្រណា ក៏អាចទៅធ្វើជាគ្រូបឋមសិក្សាបានទេ ពោលគឺគួរតែជាបរិញ្ញាបត្រដែលមានចិត្តគរុកោសល្យសម្រាប់គ្រូបឋមសិក្សា ទើបអាចទៅបង្រៀនកុមារ ឬក្មេងបាន។ “ការអប់រំល្អ គឺវាទៅទាំងព្រម ទាំងគ្រូដែលមានចិត្តគរុកោសល្យច្បាស់លាស់ ទាំងបរិស្ថានសាលារៀន ទាំងបរិស្ថានសង្គម”។
កន្លងមកក្រសួងមុខងារសាធារណៈ អនុវត្តប្រព័ន្ធជ្រើសរើសមន្ត្រី តាមរយៈនិយាមនីតិវិធីប្រតិបត្តិនៃការប្រឡង ឈរលើអភិក្រម «ជាប់ដោយមោទនៈ ធ្លាក់ដោយអស់ចិត្ត» និង «រើសឱ្យចំ បំពេញឱ្យត្រូវ រក្សាឱ្យនៅ» ក្នុងនោះក្រសួងមុខងារសាធារណៈ បានដឹកនាំ និងសម្របសម្រួលរៀបចំការប្រឡងជ្រើសរើសមន្ត្រីរាជការស៊ីវិលចំនួន ៥៣លើក សម្រាប់ ១០ក្រសួង ស្ថាប័ន ដោយជ្រើសរើសបានមន្ត្រីសរុប ៧ ៩៤៥នាក់ រួមទាំងការចាប់ផ្តើមអនុវត្តប្រព័ន្ធ «និយោជន៍» ដោយបានជ្រើសរើសគ្រូបង្រៀនផ្អែកលើកិច្ចព្រមព្រៀងការងារ ដើម្បីផ្ដល់យុត្តិធម៌ និងឱកាសស្មើៗគ្នា ដល់យុវជនវ័យក្មេង ដែលមានសមត្ថភាព និងឆន្ទៈពិតប្រាកដ ក្នុងការចូលរួមបម្រើការងារជាមន្ត្រីរាជការ។ ការជ្រើសរើសគ្រូបង្រៀនផ្អែកលើកិច្ចព្រមព្រៀងការងារ បានជួយដោះស្រាយបញ្ហាខ្វះ និងលើសគ្រូ, បញ្ហាគ្រូបង្រៀនថ្នាក់២វេន និងថ្នាក់គួប នៅតាមសាលាបឋមសិក្សាសាធារណៈ៕
