ឧស្សាហកម្មវប្បធម៌ និងច្នៃប្រតិដ្ឋ ជំរុញឱ្យមនុស្សបង្ហាញពីស្នាដៃចម្រុះសម្បូរបែប និងជាតម្រូវការសំខាន់នៃប្រទេសនីមួយៗ ជាពិសេសសង្គមដែលកំពុងតែឆ្ពោះទៅរកភាពជឿនលឿន និងការពង្រឹងផ្នែកសេដ្ឋកិច្ច។ ដោយហេតុថា វិស័យច្នៃប្រតិដ្ឋ បង្ហាញពីសក្តានុពលរបស់ប្រជាជននៅក្នុងមជ្ឈដ្ឋានមួយ តាមរយៈការបញ្ចេញទេព​កោសល្យរៀងៗខ្លួន។ នៅកម្ពុជា ឧស្សាហកម្មវប្បធម៌ និងច្នៃប្រតិដ្ឋ​ គឺជាការប្រកបមុខរបរនៅក្នុងសេដ្ឋកិច្ចក្រៅប្រព័ន្ធ ដែលមានចំនួនច្រើន និងស្ថិតក្នុងវិស័យផ្សេងៗគ្នា។

ឯកឧត្តម ហាប់ ទូច រដ្ឋលេខាធិការប្រចាំការក្រសួងវប្បធម៌ និងវិចិត្រសិល្បៈ មានប្រសាសន៍ថា ក្រសួងវប្បធម៌ និងវិចិត្រសិល្បៈបានប្រមូលធាតុចូល ពីសហគមន៍ច្នៃប្រតិដ្ឋសរុបចំនួនប្រាំពីរវិស័យ ក្នុងនោះរួមមាន សិប្បកម្ម សិល្បៈ តម្បាញ ចម្លាក់ តន្រ្តី ម្ហូបអាហារ និងភាពយន្ត ដើម្បីកំណត់ទិសដៅយុទ្ធសាស្រ្ត លើវិស័យ វប្បធម៌ និងសេដ្ឋកិច្ចនៅកម្ពុជា រួមទាំងដើម្បីបង្កើតទស្សនវិស័យអំពីឧស្សាហកម្មច្នៃប្រតិដ្ឋនៅកម្ពុជា និងបង្កើតមជ្ឈមណ្ឌលកម្ពុជាដើម្បីឧស្សាហកម្មវប្បធម៌ និងច្នៃប្រតិដ្ឋ។ 

ឯកឧត្តម ហាប់ ទូច លើកឡើងថា ការពិគ្រោះយោបល់ជាមួយសិល្បករ និងប្រតិបត្តិករវប្បធម៌ ​ជាកត្តាចាំបាច់មួយ ជួយបង្កើនសំឡេងរបស់ពួកគាត់ ឱ្យក្រសួងបានដឹង និងអាចលើកមកពិចារណា អនុវត្ត និងសហការគាំទ្រទៅតាមលទ្ធភាពដែលអាចសម្រេចបាន រួមទាំងផ្តល់ការគាំទ្រតួនាទីរបស់សង្គមស៊ីវិលក្នុងវិស័យសិល្បៈ និងវប្បធម៌ គឺជាកិច្ចការមួយ ដែលក្រសួងវប្បធម៌ យកចិត្តទុកដាក់ដើម្បីអភិវឌ្ឍវិស័យវប្បធម៌ និងច្នៃប្រតិដ្ឋ។ 

រដ្ឋលេខាធិការ ប្រចាំការក្រសួងវប្បធម៌ និងវិចិត្រសិល្បៈ បន្ថែមថា សេដ្ឋកិច្ចក្រៅប្រព័ន្ធបានចូលរួមចំណែកយ៉ាងសំខាន់ ក្នុងការពង្រីកវិសាលភាពមុខរបរនិងការងារ និងជាប្រភពចំណូល របស់ប្រជាជននៅតាមបណ្តាប្រទេសនៅលើសកលលោកជាពិសេសប្រទេសកំពុងអភិវឌ្ឍ ។ ឯកឧត្តមក៏បានបញ្ជាក់ដែរថា អ្នកប្រកបមុខរបរនៅក្នុងសេដ្ឋកិច្ចក្រៅប្រព័ន្ធក្នុងប្រទេសកម្ពុជាមានចំនួនច្រើន ថែមទាំងស្ថិតនៅក្នុងវិស័យជាចម្រុះគ្នា ហើយក្នុងនោះមាន វិស័យសិល្បករ និងវិចិត្រសិល្បៈផងដែរ។

ខ្ញុំសូមសំណូមពរ ឱ្យសិល្បករចូលរួមអនុវត្តន៍ចុះឈ្មោះក្នុងបណ្តាញសេដ្ឋកិច្ចក្រៅប្រព័ន្ធ ដើម្បីបង្កភាពងាយស្រួលក្នុងការធ្វើការរួមគ្នា និងគាំទ្រ ពលរដ្ឋដែលស្ថិតក្នុងសេដ្ឋកិច្ចក្រៅប្រព័ន្ធទាំងអស់ និងបង្កភាពងាយស្រួលដល់ រដ្ឋាភិបាល ក្នុងការដាក់ចេញនូវគោលនយោបាយថ្មីៗ ដើម្បីជួយលើសេដ្ឋកិច្ចក្រៅប្រព័ន្ធ និងសហគ្រាសធុនតូចនិងមធ្យមនៅកម្ពុជា។

ឯកឧត្តម ហាប់ ទូច រដ្ឋលេខាធិការប្រចាំការក្រសួងវប្បធម៌ និងវិចិត្រសិល្បៈ

អ្នកស្រី អុន សុខនី អនុប្រធានគណៈកម្មការនាយកនៃសមាគមស៊ីកាដា បានបង្ហាញនូវ​ការ​ពេញចិត្តនឹងកិច្ចសហការពីសំណាក់ក្រសួងវប្បធម៌ និងវិចិត្រសិល្បៈ ក្នុងការផ្តល់យោបល់ និងណែនាំកន្លងមកដើម្បីឱ្យសម្រេចបំណងរួមមួយរបស់ប្រទេសជាតិកម្ពុជាទាំងមូល ក្នុងវិស័យឧស្សាហកម្មច្នៃប្រតិដ្ឋ។ និយាយ តំណាងឱ្យសមាគមស៊ីកាដា អ្នកស្រីក៏បានបង្ហាញសេចក្ដីដឹងគុណ ទៅកាន់អង្គការយូណេស្កូ ដែលបានរួមចំណែកផ្តល់ជាថវិកា និងស្មារតីក្នុងការពន្លឿនកិច្ចការ ឱ្យកាន់តែមានប្រសិទ្ធភាព និងនិរន្តភាព។ 

ខ្ញុំសង្កេតឃើញថា ការធ្វើកិច្ចសហការរបស់សហគមន៍សិល្បៈ តាមរយៈសកម្មភាពដូចជាការចូលរួមជាសមាជិកភាព ការផ្តល់ទិន្នន័យមកកាន់គម្រោងទាក់ទងនឹងការស្រាវជ្រាវ និងការចូលរួមជាសិក្ខាសិលា ពិគ្រោះយោបល់ រួមទាំងការចូលរួមកន្លងមករបស់សហគមន៍សិល្បៈ បានជំរុញខ្ញុំផ្ទាល់ និងក្រុមការងារទាំងអស់ កាន់តែមានទឹកចិត្តក្នុងការបន្តកិច្ចការនេះបន្ថែមទៀត។

អ្នកស្រី អុន សុខនី អនុប្រធានគណៈកម្មការនាយកនៃសមាគមស៊ីកាដា

អ្នកស្រី ធីប៊ូតូ ហ្កាប្រ៊ីយែល ប្រធានឯកទេសកម្មវិធីវប្បធម៌ អង្គការយូណេស្កូ ប្រចាំនៅកម្ពុជា បានឱ្យដឹងថា អ្នកសិល្បៈមានគុណតម្លៃលើសពីការបញ្ចេញទេកោសល្យ ក្នុងការផលិតនូវស្នាដៃដើម្បីប្រជាប្រិយភាព ឬការទាក់ទាញចំណាប់អារម្មណ៍។ ដោយហេតុថា ពួកគាត់គឺជាចំណែកយ៉ាងសំខាន់ក្នុងការប្រើប្រាស់សិល្បៈទៅលាតត្រដាងបញ្ហាប្រឈមនានាដែលកើតមាន ថែមទាំងជាការបង្កើតភាសាសន្ទនាដែលមានភាពច្នៃប្រតិដ្ឋជំរុញឱ្យសង្គមមានភាពនៃសាមគ្គី និងការអភិវឌ្ឍ។

ប្រធានឯកទេសកម្មវិធីវប្បធម៌ អង្គការយូណេស្កូ ប្រចាំនៅកម្ពុជា បន្តថា ការបង្កឱ្យ​មាន​ភាពងាយស្រួលចំពោះអ្នកសិល្បៈ ទាំងសេរីភាពនៃការផលិតនិងបង្ហាញ រួមទាំងលក្ខខណ្ឌល្អរបស់សង្គមនិងសេដ្ឋកិច្ច ជាកត្តារួមចំណែកទៅកាន់អ្នកសិល្បៈឱ្យមានឱកាសបង្កើនសមត្ថភាព ទំនុកចិត្ត និងលទ្ធភាពក្នុងការបន្តភារកិច្ច និងពន្លឿនសង្គមឱ្យរីកចម្រើនតាមរយៈការអភិវឌ្ឍឧស្សាហកម្មច្នៃប្រតិដ្ឋ។

អភិវឌ្ឍបន្ថែមទៅលើទេពកោសល្យច្នៃប្រតិដ្ឋ តាមរយៈបង្កើនឱកាសការងារ និងផ្តល់ជីវភាពសមរម្យសម្រាប់សិល្បករ និងអ្នកមានជំនាញខាងវប្បធម៌ ជាកត្តាបំផុសសក្តានុពលឧស្សាហកម្មច្នៃប្រតិដ្ឋ និងការអភិវឌ្ឍប្រកបដោយចីរភាពនៅកម្ពុជា។

អ្នកស្រី ធីប៊ូតូ ហ្កាប្រ៊ីយែល ប្រធានឯកទេសកម្មវិធីវប្បធម៌ អង្គការយូណេស្កូ ប្រចាំនៅកម្ពុជា

អ្នកស្រី ធីប៊ូតូ ហ្កាប្រ៊ីយែល បញ្ជក់បន្ថែមថា ការរួមចំណែករបស់សង្គមស៊ីវិល ចំពោះការបង្កើតច្បាប់ថ្មី ឬក៏ការចូលរួមពិភាក្សាកំណែទម្រង់នៃក្របខ័ណ្ឌច្បាប់ដែលមានស្រាប់ ធ្វើយ៉ាងណាបង្ហាញអំពីស្ថានភាពជាក់ស្ដែងក៏ដូចជាតម្រូវការរបស់សិល្បករ គឺជាត្តាផ្តល់ភាពងាយស្រួលទៅកាន់អ្នកតាក់តែងគោលនយោបាយ ឬតួអង្គដែលពាក់ព័ន្ធធ្វើកិច្ចសហការទាំងឡាយ អាចធ្វើច្បាប់ដែលឆ្លើយតបនឹងស្ថានការណ៍ មានស្តង់ដាជាតិ និងអន្តរជាតិ ដើម្បីធានាថា អ្នកប្រកបកិច្ចការក្នុងវិស័យច្នៃប្រតិដ្ឋ មិនថាសិល្បករ និងអ្នកជំនាញវប្បធម៌ អាចទទួលបានអត្ថប្រយោជន៍សមស្របនឹងកម្លាំងពលកម្ម រួមទាំងទទួលបានការគាំពារដ៏រឹងប៉ឹងពីសំណាក់អ្នកពាក់ព័ន្ធ៕