ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភាពអៀនខ្មាសនៃការសួរនាំអំពីសុខភាពបន្តពូជ និងសុខភាពផ្លូវភេទ បានបង្កឱ្យយុវជនមួយចំនួន មិនមានចំណេះគ្រប់គ្រាន់ក្នុងការរក្សាអនាម័យសុខភាព ។ ដើម្បីដោះស្រាយនូវបញ្ហានេះ គម្រោងបង្កើនលទ្ធភាពទទួលបានព័ត៌មាន និងសេវាសុខភាពបន្តពូជ (SRHR) បានបង្កើតនូវកម្មវិធីទូរស័ព្ទមួយដែលមានឈ្មោះថា អេបសុខភាពយុវជន ក្នុងការជួយដោះស្រាយបញ្ហាមួយនេះសម្រាប់យុវជន។
កញ្ញា កៅ រីណា ជាអ្នកសម្របសម្រួលគម្រោង នៅ Child Helpline Cambodia បានឱ្យដឹងថា អេបសុខភាពយុវជន មានគោលបំណងចង់ឱ្យយុវជន ទទួលបានឱកាសស្វែងយល់អំពីសុខភាពផ្លូវភេទ ការមករដូវ ការលូតលាស់នៃរាងកាយ ការបម្រែបម្រួលសុខភាព រួមទាំងព័ត៌មានមួយចំនួនទៀតនិយាយអំពីការអភិវឌ្ឍរបស់យុវជន ឬក៏យុវនារី ក្នុងសង្គមរបស់យើង។
យុវជនដែលមាន អេបសុខភាពយុវជន នៅក្នុងដៃឬក្នុងទូរស័ព្ទ បានផ្តល់ភាពងាយស្រួលក្នុងការបង្កើនចំណេះដឹងទាក់ទងនឹងសុខភាពបន្តពូជ ទោះបីជាកំពុងមានភាពខ្មាសអៀនក៏ដោយ ទោះគាត់ មិនបានសួរគ្រូ ឬអ្នកជំនាញ និងអាណាព្យាបាលក្ដី គឺគាត់នៅតែអាច ស្វែងយល់ពីរបៀបក្នុងការថែទាំខ្លួនឯង។
កញ្ញា កៅ រីណា ជាអ្នកសម្របសម្រួលគម្រោង នៅ Child Helpline Cambodia
កញ្ញា រីណា បន្តថា ចំពោះអ្នកដែលមានបញ្ហានៅក្នុងគ្រួសារ ឬក៏ទាក់ទងនឹងអំពើហិង្សា ការរំលោភបំពាន តាមអនឡាញក្ដី ដោយផ្ទាល់ក្ដី ពួកគាត់អាចស្វែងរកជំនួយបន្ថែមបានគ្រប់ពេល តាមរយៈលេខ ១២៨០ ដែលជាសេវាមួយគាំទ្រផ្នែកផ្លូវចិត្ត និងជាផ្នែកមួយនៃអេបផងដែរ។
នៅក្នុង អេបសុខភាពយុវជន(Youth Health) មានដាក់បញ្ចូលនូវចំណេះដឹងអំពីសេវាសុខភាព និងការកំសាន្តចម្រុះគ្នាដូចជា ការបន្តពូជ, មធ្យោបាយពន្យារកំណើត, ចំណង់ផ្លូវភេទ, ភាពផ្សេងគ្នានៃផ្លូវភេទ, សិទ្ធិទំនាក់ទំនងផ្លូវភេទនិងសិទ្ធិបន្តពូជ, ការព្រមព្រៀងនិងការបង្ខំរួមភេទ, ជំងឺកាមរោគ, ការយល់ដឹងពីមេរោគអេដស៍/ជំងឺអេដស៍, ការធ្វើតេស្តមេរោគអេដស៍/ជំងឺអេដស៍, ការព្យាបាលមេរោគអេដស៍/ជំងឺអេដស៍, ការយល់ដឹងពីច្បាប់បង្ការនិងទប់ស្កាត់, សុខភាពផ្លូវភេទ យេនឌ័រ និងនិន្នាការភេទ, ការស្វែងរកសេវាពិគ្រោះ និងគាំទ្រផ្លូវចិត្ត, ព័ត៌មានជំនួយដល់ការសម្រេចចិត្ត, សេវាសុខភាពបន្តពូជ និងគ្លីនិកសុខភាព, ព័ត៌មានដែលតែងសាកសួរទាក់ទងនឹង និងមេរោគអេដស៍/ជំងឺអេដស៍ រួមទាំងវីដេអូអប់រំ និងកំសាន្តដទៃទៀត។
សូមបញ្ជាក់ដែរថា កម្មវិធីម៉ូបាលអ៊ែប «សុខភាពយុវជន» ត្រូវបានផ្តួចផ្តើមឡើងដោយក្រុមប្រឹក្សាជាតិអភិវឌ្ឍន៍យុវជនកម្ពុជា និងក្រសួងអប់រំ យុវជន និងកីឡា ដែលគម្រោងនេះអនុវត្តដោយបណ្តាញទូរស័ព្ទជំនួយកុមារកម្ពុជា (Child Helpline Cambodia) និងអ៊ែបវិស្វករ Kawsang ដែលជាផលិតផលរួមគ្នាក្រោមកម្មវិធីដែលគាំទ្រដោយមូលនិធិ UNFPA និងរាជរដ្ឋាភិបាលជប៉ុន៕
