ការបង្កើតទម្លាប់មួយៗ ត្រូវការប្តេជ្ញាចិត្តចេញពីបុគ្គលម្នាក់ៗ និងស្គាល់ពីគុណតម្លៃនៃការផ្លាស់ប្តូររបៀបរស់នៅ។ តាមរយៈគេហទំព័រ Inc បានបង្ហាញគន្លឹះ៣ដើម្បីអនុវត្តន៍សម្រាប់ទាញយកអត្ថប្រយោជន៍ក្នុងរយៈពេលវែង ក៏ដូចជាជួយបំបែកទម្លាប់អវិជ្ជមានក្នុងការរស់នៅ។

១. រស់នៅដោយភាពស្មោះត្រង់ ៖ ការរស់នៅ និងការប្រកបកិច្ចការដោយភាពស្មោះត្រង់ជាការជំរុញបាននូវអត្ថប្រយោជន៍ ទាំងអាជីពវិជ្ជាជីវៈ និងជីវិតផ្ទាល់ខ្លួន។ នៅពេលអ្នកមានដំណើររស់នៅដោយទទួលយកភាពជាក់ស្ដែង និងស្មោះត្រង់ នោះចំនួនមនុស្សដែលជឿជាក់ក៏មានការកើនឡើង។ ដោយសារតែពួកគេបានដឹងថា អ្នកជាបុគ្គលគួរឱ្យទុកចិត្ត មានភាពជាមនុស្ស ហើយមិនផ្តល់ជាមន្ទិលសង្ស័យក្នុងការរាប់អាន។ ភាពជាក់លាក់ ឬភាពស្មោះត្រង់ បានពង្រឹងទំនាក់ទំនងឱ្យកាន់តែរឹងមាំជាមួយមិត្តរួមអាជីព អតិថិជន និងតម្រូវការសេវាកម្មការងារ។ មិនត្រឹមតែប៉ុណ្ណោះ បានបង្កើននូវ ការរក្សាអ្វីដែលកំពុងមាននាពេលបច្ចុប្បន្ន និងបើកទូលាយចំពោះឱកាសថ្មីៗដល់ខ្លួនឯង រួមទាំងវិសាលភាពអាជីពវិជ្ជាជីវៈ។

២. បង្កើនភាពឈ្លាសវៃរៀងរាល់ថ្ងៃ ៖ ចាប់ផ្តើមដោយការរក្សាទម្លាប់ចូលគេងឱ្យបានទៀងទាត់ ក៏ជាចំណែកក្នុងការពង្រឹងភាពឈ្លាសវៃ ពីព្រោះការអនុវត្តបែបនេះបានទៀងទាត់អាចចាត់ទុកថា ជាជំហានឈានទៅរកភាពជោគជ័យ។ ជាឧទាហរណ៍ ការអានសៀវភៅឱ្យ​បានទៀងទាត់ ឬការរៀនសូត្រដើម្បីអភិវឌ្ឍន៍ស្មារតី គឺជាការផ្លាស់ប្តូរទៅរកភាពវិជ្ជមានក្នុងដំណើរជីវិត។

៣. រក្សាទម្លាប់សាមញ្ញ ៖ ភាពសាមញ្ញ ការរស់នៅសាមញ្ញ អាចជំរុញឱ្យទទួលបាននូវភាពជោគជ័យក្នុងរយៈពេលវែង និងសុវត្ថិភាពផ្នែកហិរញ្ញវត្ថុ។ ជំនួយឱ្យការប្រើប្រាស់ថវិកាទៅលើរបស់ដែលមិនចាំបាច់ ឬការចូលអន្ទាក់វ័ណ្ឌករនឹងបំណុល ចាំបាច់គិតអំពីការវិនិយោគ និងការបង្កើតតារាងកាលវិភាគលើរបស់ប្រើប្រាស់ប្រចាំថ្ងៃដោយការវិភាគយ៉ាងហ្មត់ចត់។ មនុស្សដែលមានភាពជោគជ័យ តែងតែមានទម្លាប់ប្រើប្រាស់ធនធានដែលខ្លួនមានបានល្អ​ ដោយការរស់នៅមានរបៀបសាមញ្ញ​ៗ។ ដែលជារួមបង្ហាញឱ្យឃើញថា ការទទួលស្គាល់ការពិត និងភាពសាមញ្ញ ​គឺជាការវិនិយោគក្នុងរយៈពេលវែង និងការសន្សំសំចៃដើម្បីអនាគត៕