មានការលើកឡើងជាច្រើន អំពីវិធីសាស្ត្រ ដែលមានលក្ខណៈវិទ្យាសាស្ត្រសម្រាប់បង្កើនផលិតភាពការងារ និងរបៀបយកឈ្នះការពន្យារពេល។ មានវិធីសាស្ត្រ និងបច្ចេកទេសជាច្រើន ដែលអាចផ្លាស់ប្ដូរទម្លាប់មិនល្អរបស់អ្នក មកជាល្អវិញបាន។ ខណៈការបង្កើតទម្លាប់ថ្មី គឺពិបាក, ការរៀបចំរបៀបធ្វើការថ្មី គឺពិបាកហើយការផ្លាស់ប្ដូរទូទៅ គឺរឹតតែពិបាក ។ ច្បាប់រយៈពេល ២នាទី នឹងជួយអ្នកឱ្យផ្លាស់ប្ដូរទម្លាប់ដែលបានរៀបរាប់នេះ ត្រឹមពេល ២នាទី។ ហើយមិនខ្វល់ថា អ្នកជាអ្នកណា ឬរវល់យ៉ាងណានោះទេ យើងគ្រប់គ្នាសុទ្ធតែមានពេល ២ នាទី ដើម្បីអនុវត្តច្បាប់នេះ។

គ្រាន់តែ​ធ្វើ​កិច្ចការនោះ (Just do it)

ច្បាប់រយៈពេល ២នាទី គឺជាមូលដ្ឋានគ្រឹះដែលជួយឱ្យអ្នកអាចរស់នៅក្នុងរយៈពេល ២៤ម៉ោងរបស់អ្នក ប្រកបដោយប្រសិទ្ធភាព ។ ក្នុងពេលជាមួយគ្នានេះ អ្នកនឹងដឹងថា ផលិតភាពការងាររបស់អ្នក ក៏កើនឡើង នៅពេលដែលអ្នកចាប់ផ្ដើមអនុវត្តច្បាប់នេះ។ ច្បាប់រយៈពេល ២នាទី ត្រូវបានបែងចែកជាពីរផ្នែក៖

ផ្នែកទី១ ៖ ប្រសិនបើអ្នកចង់បញ្ចប់កិច្ចការអ្វីមួយក្នុងរយៈពេល ២នាទី ឬតិចជាងនេះ សូមធ្វើវាឥឡូវនេះ និយាយទៅគឺធ្វើវាភ្លាមៗតែម្ដង។ មានកិច្ចការងាយៗ និងសាមញ្ញជាច្រើន ដែលអ្នកអាចបញ្ចប់វាក្នុងរយៈពេល ២នាទី ដូចជា ត្រូវលាងចានរបស់អ្នកភ្លាមៗក្រោយពីញ៉ាំអាហាររួច, ពាក់សំលៀកបំពាក់ទៅលើស្មារព្យួរខោអាវភ្លាមៗ, ប្រមូលសំរាមចោល ឬឆ្លើយតបសារទៅកាន់អ្នកណាម្នាក់ភ្លាមៗជាដើម។ គ្មាននរណាម្នាក់រវល់រហូតមិនមានពេលសូម្បីតែ ២នាទី ដើម្បីបញ្ចប់ការងារសាមញ្ញ ដែលបានរៀបរាប់នេះភ្លាមៗនោះទេ។ មុននឹងចាប់ផ្ដើមធ្វើកិច្ចការផ្សេងៗទៀត អ្នកអាចចាប់ផ្ដើម បំពេញកិច្ចការសាមញ្ញៗទាំងនេះសិន។  

ចាប់ផ្ដើមពីការធ្វើការងារតូចៗ

ផ្នែកទី២ នៃច្បាប់រយៈពេល ២​នាទី គឺជាជំហានបន្ទាប់ នៅពេលដែលអ្នកបានអនុវត្ត ផ្នែកទី១ បានជោគជ័យជាប់ៗគ្នាជាច្រើនថ្ងៃ។ ផ្នែកទី២ គឺអ្នកត្រូវគិតអំពីការបង្កើតទម្លាប់ថ្មី។

នៅពេលអ្នកចាប់ផ្ដើមបង្កើតទម្លាប់ថ្មី ត្រូវប្រាកដថា ទម្លាប់នោះចំណាយពេលត្រឹមតែពីរនាទី ឬតិចជាងនេះ ដើម្បីបញ្ចប់ ។ យ៉ាងណាក៏ដោយ មិនមែនទម្លាប់ទាំងអស់ អាចបញ្ចប់ទៅក្នុងរយៈពេលពីរនាទីនោះទេ ភាគច្រើន គឺមិនអាច។

ប៉ុន្តែទិចនិចនៅក្នុងច្បាប់នេះ គឺបង្កើតទម្លាប់ក្នុងការបំពេញការងាររយៈពេលពីរនាទី ដើម្បីនាំអ្នកទៅរកការបង្កើតទម្លាប់ធំៗ ដែលជាគោលដៅរបស់អ្នក។ ការបំពេញកិច្ចការតូចៗជោគជ័យ ក្នុងរយៈពេល ២នាទីយ៉ាងជាប់លាប់ នឹងធ្វើឱ្យអ្នកមានភាពងាយស្រួលក្នុងការចាប់ផ្ដើមទម្លាប់ធំ ដែលត្រូវចំណាយពេលច្រើនជាងនេះ៕