យើងពិតជាធ្លាប់លឺឈ្មោះ ChatGPT ដែលគេតែងនាំគ្នានិយាយអំពីភាពវៃឆ្លាតរបស់វា, កាលពីពេលថ្មីៗនេះ Chat GPT ក៏ត្រូវគេដាក់ឱ្យដំណើរការនៅក្នុងប្រទេសកម្ពុជាផងដែរ, សម្រាប់អ្នកដែលធ្លាប់ប្រើប្រាស់ Chat GPT អាចជាផ្នែកមួយនៃការជំរុញឱ្យសម្រេចបានលទ្ធផលការងារបានលឿនជាងមុន ដើម្បីសម្រួលឯកសារ តាមដាន ផ្ទៀងផ្ទាត់ និងបង្កើតផែនការជាដើម។
ត្បិតថា កម្មវិធី ChatGPT ផ្តល់ចម្លើយតាមរយៈការកំណត់សមត្ថភាពរបស់អ្នកជំនាញសរសេរកូដ ប៉ុន្តែយ៉ាងណាក៏ដោយ វាក៏ឆ្លើយតបនឹងតម្រូវការ មិនថាជំនាញសរសេរ ការជជែកពិភាក្សាដែលពាក់ព័ន្ធនឹងការរស់នៅសាមញ្ញៗប្រចាំថ្ងៃ ដែលកម្មវិធីនេះ មានសមត្ថភាពក្នុងការជំរុញបន្ថែមអំពីផលិតភាព ការដោះស្រាយបញ្ហា និងការសម្រួចរកចំណុចសំខាន់ៗនៃប្រភេទការងារនីមួយ។ យោងតាមគេហទំព័រ zdnet បានបង្ហាញប្រាំវិធី នៃកម្មវិធី ChatGPT ដែលជួយសន្សំពេលវេលារបស់អ្នក ៖
១. សរសេរសេចក្ដីព្រាងសម្រាប់ប្រើក្នុងអ៊ីមែល ៖ ការសរសេរអ៊ីមែល អាចជាកិច្ចការមួយដែលមានភាពស្មុគស្មាញ ហើយនឹងត្រូវការពេលជាច្រើនក្នុងការគិត កំឡុងពេលបំពេញកិច្ចការងារ។ ដូច្នេះ ប្រើប្រាស់កម្មវិធី ChatGPT ដើម្បីជំនួយក្នុងការក្នុងស្ថានភាពដែលប្រញាប់ ឬក្នុងស្ថានភាពដែលត្រូវបំពេញការងារឯទៀតជាច្រើនក្នុងពេលតែមួយ វាជាវិធីមួយជួយឱ្យអ្នកអាចបញ្ចប់កិច្ចការទាន់ពេលវេលា។ អ្នកអាចប្រើបានទាំងអ្នកធ្វើអាជីវកម្ម អ្នកស្រាវជ្រាវ អ្នកសិក្សា និងផ្នែកផ្សេងៗជាច្រើនទៀត ដោយគ្រាន់តែប្រើប្រាស់សំណួរ និងពាក្យគន្លឹះឱ្យបានត្រឹមត្រូវទៅតាមគោលដៅតែប៉ុណ្ណោះ។ ក្នុងករណីអ្នកមានជំនាញបញ្ជូន អំពីតម្រូវការបានត្រឹមត្រូវបែបណា លោកអ្នកនឹងទទួលបានចម្លើយកាន់តែល្អទៅតាមនោះដែរ។
២. រៀបចំផែនការសម្រាប់ការងារសំខាន់ៗ ៖ ជាអ្នកបំពេញការងារ ការសិក្សា ឬការបង្កើតអាជីវកម្មមានការងារជាច្រើនដែលត្រូវទទួលខុសត្រូវ ហើយពេលខ្លះទៀត ក៏មានកិច្ចការបន្ទាន់ៗ តម្រូវឱ្យធ្វើជាចាំបាច់ផងដែរ។ ដូច្នេះហើយ ការជ្រើសយកកម្មវិធី ChatGPT ដើម្បីគាំទ្រដល់ការធ្វើផែនការ ក៏ដូចជាការត្រៀមខ្លួនទុកជាមុន គឺជាកត្តាសំខាន់មួយជួយឱ្យអ្នកអាចសម្រេចកិច្ចការបានទាន់ពេលវេលា ។ ជាឧទាហរណ៍ នៅពេលដែលលោកអ្នកមានកាតព្វកិច្ចក្នុងការធ្វើបទបង្ហាញអ្វីមួយ លោកអ្នកគ្រាន់តែបំផុសជាសំណួរទៅកាន់កម្មវិធី ChatGPT ដើម្បីជួយជំរុញ និងលើកទឹកចិត្តលោកអ្នកឱ្យកាន់តែមានកម្លាំងចិត្តក្នុងសម្រេចកិច្ចការ ឬក៏សួរអំពីរបៀបចាប់ផ្តើម ដែលវាអាចជួយឱ្យអ្នកមានការផ្តោតអារម្មណ៍ និងដឹងថា ត្រូវចាប់ផ្តើមពីចំណុចមួយណាមុន ថែមទាំងមានការត្រៀមខ្លួនបានល្អជាដើម។ ការពិតទៅ យើងក៏អាចសួរទៅកាន់កម្មវិធី Google មិត្តភ័ក្រ អ្នកមានបទពិសោធន៍ជាងយើង ឬមនុស្សសិទ្ធស្នាល និងសមាជិកគ្រួសារក៏បានដែរ ប៉ុន្តែមិនប្រាកដថា ពួកគាត់ទាំងអស់សុទ្ធតែមានពេលសម្រាប់ផ្តល់ជំនួយឱ្យអ្នកបានគ្រប់ពេល គ្រប់វេលានោះទេ ចំណែកកម្មវិធី Google វារឹតតែមានភាព ទូលំទូលាយណាស់ ដែលតម្រូវឱ្យលោកអ្នកត្រូវចំណាយពេលយ៉ាងច្រើនក្នុងការចាប់យក។ ដូច្នេះការជ្រើសរើស និងប្រើកម្មវិធីនេះ ជាជម្រើសមួយឆ្លើយតបនឹងពេលវេលាដ៏តិចតួចស្តួចស្តើង ក៏ដូចជាពេលដែលត្រូវការ ប្រភេទការងារលឿនៗ។
៣. ជំនួយក្នុងការធ្វើបញ្ជីរាយនាម ឬលំដាប់មាតិកា ៖ ប្រសិនបើលោកអ្នក ជាមនុស្សដែលមានទម្លាប់ធ្វើអ្វីមួយដោយការសរសេរជាចំណុចៗទុកមុន រៀងរាល់ពេលចាប់ផ្តើមធ្វើអ្វីមួយ នោះការជ្រើសយកម្មវិធីនេះជាចំណែកសំខាន់ ជួយឱ្យលោកអ្នកដឹងពីតម្រូវការសំខាន់ៗ ដែលគ្រោងនឹងចាប់ផ្តើមធ្វើ។ ឧទាហរណ៍ ប្រសិនបើអ្នកចង់ទៅផ្សារទិញសម្ភារៈផ្ទះបាយសំខាន់ៗទុកសម្រាប់ប្រើ ប៉ុន្តែមិនដឹងថាមានអ្វីខ្លះដែលចាំបាច់ ព្រោះពេលទៅផ្សារមានទំនិញ និងរបស់របរជាច្រើនសម្រាប់តាំងលក់ ហើយគ្រប់យ៉ាងនឹងក្លាយជាទំនិញសំខាន់ទាំងអស់តែម្តង។ ដូច្នេះលោកអ្នក គ្រាន់តែសួរទៅកាន់ ChatGPT អំពីប្រភេទសម្ភារៈសំខាន់ទាំងនោះជាមុន គ្រាន់នឹងបានជាគំនិតខ្លះៗ ហើយយើងអាចសម្រួចសម្រួលទៅតាមស្ថានភាពជាក់ស្តែងនៃកម្រិតថវិកា និងទីតាំងជាក់ស្ដែងដែលលោកអ្នកកំពុងរស់នៅ។ ការកត់ត្រាបញ្ជីរាយនាម មុននឹងទៅទិញទំនិញ វាជួយកាត់បន្ថយភាពភ្លេចភ្លាំង ឬការប្រើខួរក្បាលចងចាំរឿងដែលមិនចាំបាច់ ហើយអ្វីដែលសំខាន់នោះគឺនាំឱ្យចំណេញពេលវេលាផ្ទាល់ខ្លួនយ៉ាងច្រើន។
៤. ជាជំនួយដើម្បីបង្កើតយុទ្ធសាស្រ្តទីផ្សារលើបណ្តាញសង្គម ៖ មិនថាអ្នកបង្កើតមាតិកាសម្រាប់ការងារផ្ទាល់ខ្លួន ឬក៏វិជ្ជាជីវៈនោះទេ ការសាកសួរទៅកាន់កម្មវិធី ChatGPT អំពីប្រភេទប្រធានបទ ការស្វែងរកចំណងជើងដែលថ្មី ទាន់សម័យកាលសង្គមក្នុងការសេរជាអត្ថបទ វាជារឿងដែលមានភាពលំបាក ព្រោះមិនមែនគ្រប់ពេលមនុស្សយើងសុទ្ធតែមានគំនិតផុសចេញមករហូតនោះទេ។ ការសាកសួរ ChatGPT ដើម្បីប្រមូលយកជាគោលគំនិត វាបានពាំនាំនូវប្រយោជន៍ ជាច្រើននិងចំណេញវេលារបស់អ្នក។ ជាឧទារហណ៍សាមញ្ញមួយ លោកអ្នកបានថតរូបមួយហើយត្រូវផុសក្នុងបណ្តាញសង្គម ប៉ុន្តែគ្មានគំនិតក្នុងការសរសេរអ្វីទាល់តែសោះក្នុងពេលមួយរំពេចនោះ ក្នុងករណីនេះហើយ វាជាពេលដែលកម្មវិធីប្រើជាជំនួយបាន។ ទន្ទឹមគ្នានោះ វាបានបង្កើតឱ្យមានច្រើនជម្រើសទៅកាន់លោកអ្នកទៀតផង។ យើងមិនបាច់យកគំនិតតាមកម្មវិធីទាំងស្រុងនោះទេ ប៉ុន្តែអ្នកអាចនឹងមានគំនិតប្លែកៗថ្មីៗ ក្នុងការសរសេរចេញដែលមានទម្រង់ដូចនឹងចម្លើយរបស់ ChatGPT ដែលបានបង្ហាញប្រាប់ជាគោល។
៥. ពន្លឿនផែនការផ្ទាល់ខ្លួន ៖ ក្រៅតែពីការបំពេញកិច្ចការងារវិជ្ជាជីវៈក្នុងរយៈពេលច្រើនម៉ោង យើងក៏នៅមានកិច្ចការក៏ដូចជាកាតព្វកិច្ចផ្ទាល់ខ្លួនជាច្រើនក្នុងការរស់នៅប្រចាំថ្ងៃដើម្បីបំពេញន័យឱ្យជីវិត ឬការធ្វើឱ្យមានតុល្យភាពរវាងការងារ គ្រួសារ ការជួបជុំមិត្ត និងសកម្មភាពថែទាំខ្លួនជាច្រើនទៀត។ ភាពមមាញឹកទាំងនេះហើយ ធ្វើឱ្យពិបាកក្នុងការបែងចែកផែនការប្រចាំថ្ងៃ រហូតដល់ពេលខ្លះរកតែកំណត់ពេលហាត់ប្រាណបែបណាឱ្យមានប្រសិទ្ធភាពស្ទើរតែពុំបានសោះឡើយ ហេតុនេះហើយ កម្មវិធី ChatGPT អាចជាចំណែកមួយក្នុងការដោះស្រាយបញ្ហាទាំងនេះបាន ស្របពេលនឹងឆ្នាំថ្មីត្រូវបានចាប់ផ្តើមគឺវារឹតតែសំខាន់ក្នុងប្រើប្រាស់ជាជំនួយ ដោយលោកអ្នកអាចសរសេរពីតម្រូវការ នៃការបង្កើតផែនការឱ្យចេញជាលទ្ធផល បើទោះមិនបានដូចចិត្តមួយរយភាគរយ ប៉ុន្តែយ៉ាងហោចណាស់វាបានបង្ហាញអំពីតម្រូវការមួយចំនួន ដែលយើងអាចយកមកកែតម្រូវនឹងប្រើប្រាស់បាន៕