ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
លោកស្រី ឡុង លាបសុជាតា ជាគ្រូបង្រៀនភាសាអង់គ្លេសនៅវិទ្យាល័យព្រះសីហនុ ខេត្តកំពង់ចាម និងជាអ្នកនិពន្ធឯករាជ្យម្នាក់ បានទទួលជ័យលាភីលេខ១ និងក្លាយជាម្ចាស់ពានរង្វាន់អក្សរសិល្ប៍ពុទ្ធសាសនបណ្ឌិត្យ លើកទី៦ ឆ្នាំ២០២៣កាលពីពេលថ្មីៗនេះ តាមរយៈស្នាដៃរឿងខ្លីមានចំណងជើងថា «ត្រល់ខ្លឹមត្នោត » ។ ការដែលស្នាដៃរឿងខ្លី «ត្រល់ខ្លឹមត្នោត » ជាប់ជាស្នាដៃឆ្នើម ក៏ព្រោះតែនៅក្នុងរឿងនេះ អ្នកនិពន្ធបានផ្តល់ការអប់រំដល់មនុស្សក្នុងសង្គមសព្វថ្ងៃឱ្យចេះថែរក្សាកេរ្តិ៍តំណែលខ្មែរដែលមានតាំងពីដើមមក។ លើសពីនេះ អ្នកនិពន្ធក៏បានបង្រៀនឱ្យមនុស្សដឹងថា ក្នុងនាមជាអ្នកជំនាន់ក្រោយត្រូវតែមានសាមគ្គីភាពគ្នា និងមានការភ្ញាក់រលឹកដឹងកំហុសហើយប្រែមកធ្វើរឿងដែលត្រឹមត្រូវវិញ។
ម្ចាស់ជ័យលាភីពានរង្វាន់អក្សរសិល្ប៍ វ័យ៣៧ឆ្នាំរូបនេះ បានប្រាប់ឱ្យដឹងថា ការដែលលោកស្រីចូលរួមប្រកួតស្នាដៃសរសេររឿងខ្លីនេះ ព្រោះដោយសារតែការស្រឡាញ់ការសរសរ និងស្រឡាញ់ផ្នែកអក្សរសាស្រ្តខ្មែរ ហើយសង្ឃឹមថាអាចចូលរួមជាផ្នែកមួយនៅក្នុងការចែករំលែកចំណេះដឹង ចែករំលែកការគិតផ្ទាល់ខ្លួនទៅកាន់ពិភពលោក។
លោកស្រី ឡុង លាបសុជាតា បន្ថែមថា ប្រធានបទ «ការលោភលន់នាំមកនូវសេចក្ដីវិនាស» បានធ្វើឱ្យលោកស្រីចាប់អារម្មណ៍ខ្លាំងទៅលើរឿងរ៉ាវរបស់សង្គម អំពីការលោភលន់តាមរយៈការកេងប្រវ័ញ្ចកម្លាំងញើសឈាមរបស់មនុស្សនៅក្នុងសង្គម។ លោកស្រីបន្តថា រឿងវិជ្ជមានមួយចំនួនត្រូវបានមនុស្សមើលរំលងអំពីការអភិរក្សមុខរបរតម្បាញហូលផាមួងខ្មែរកុំឱ្យបាត់បង់ ដែលវាគឺជាឱកាសសម្រាប់លោកស្រីសរសេរស្នាដៃមួយនេះឡើង ដើម្បីផ្សព្វផ្សាយ និងបង្ហាញការយល់ឃើញរបស់ខ្លួនក្នុងការដោះស្រាយបញ្ហាសង្គមតាមរយៈស្នាដៃប្រកួតមួយនេះ។
«ការជាប់ជ័យលាភីឆ្នើមនេះ លើសពីអ្វីដែលរំពឹងទុក ព្រោះខ្ញុំមិនធ្លាប់គិតថាអាចទទួលបានជ័យលាភីលេខ១ ព្រោះបេក្ខជនដដៃទៀតសុទ្ធមានស្នាដៃល្អៗ»
លោកស្រី ឡុង លាបសុជាតា
តាមការសរសេរឿងខ្លីនេះ លោកស្រី ឡុង លាបសុជាតា ក៏ជួបនូវបញ្ហាប្រឈមក្នុងការសរសេរផងដែរ ដោយសារលោកស្រីមានកិច្ចការមមារញឹកជាច្រើន រួមទាំងកត្តាគ្រួសារ កត្តាពេលវេលាមិនសូវមានច្រើន ប៉ុន្តែដោយសារក្ដីស្រឡាញ់ទើបមានតែការឆ្លៀតពេលប៉ុណ្ណោះទើបអាចសម្រេចបានស្នាដៃមួយបាន។ លោកស្រីបន្តថា រាល់ឆ្នាំលោកស្រីចំណាយពេលពីមួយសប្ដាហ៍ទៅដប់ថ្ងៃដើម្បីសរសេររឿងមួយ ប៉ុន្តែក្នុងឆ្នាំនេះ ដោយសារមានការមមារញឹកខ្លាំង និងមានអារម្មណ៍ស្ទាក់ស្ទើរក្នុងការសាក់ស្នាដៃប្រកួតផង ហើយនៅសល់ពេលតែមួយថ្ងៃផុតកំណត់ដាក់ស្នាដៃ ទើបលោកស្រីមានគំនិតពិសេសម៉្យាងមកជំរុញឱ្យសរសេរស្នាដៃនោះចេញជារូបរាងសម្រាប់ដាក់ប្រកួត។
ម្ចាស់ជ័យលាភីពានរង្វាន់លេខ១ រូបនេះ លើកទឹកចិត្តយុវជនទាំងអស់ប្រសិនបើស្រឡាញ់ការតែងនិពន្ធ ត្រូវព្យាយាមប្រើពេលវេលាណាមួយក្នុងពេលប្រចាំថ្ងៃ ធ្វើនូវអ្វីដែលខ្លួនឯងស្រឡាញ់ ព្រោះបើយើងនិយាយថាស្រឡាញ់ ហើយយើងមិនដែលធ្វើវាសោះ គ្រាន់តែស្រមៃគឺមិនអាចទៅរួចនោះទេ ព្រោះរាល់ក្ដីស្រឡាញ់ទាំងអស់ទាមទារឱ្យមានសកម្មភាព។
គួរជម្រាបជូនថា លោកស្រី ឡុង លាបសុជាតា ធ្លាប់ចូលរួមប្រកួតសរសេររឿងខ្លីពានរង្វាន់ព្រះនាងឥន្ទ្រទេវី ឆ្នាំ២០២០ ជាប់ជ័យលាភីលេខ៥ និងឆ្នាំ២០២១ ជាប់ជ័យលាភីលេខ៣។ ក្រោយទទួលបានជ័យលាភីពានរង្វាន់លេខ១ អក្សរសិល្ប៍ពុទ្ធសាសនបណ្ឌិត្យលើកទី៦ លោកស្រីនៅតែបន្តសរសេរស្នាដៃបន្ថែមដើម្បីចែករំលែកចំណេះដឹងដល់អ្នកជំនាន់ក្រោយ ៕
