ក្រុមយុវជនដែលមានសមាជិក៥នាក់ មកពីវិទ្យាល័យហ៊ុន សែន កំពង់ចាម ខេត្តកំពង់ចាម បានបន្តទៅវគ្គផ្ដាច់ព្រ័ត្រ នៃកម្មវិធីជជែកចេញដោលយុវជនថ្នាក់ជាតិ ២០២៤។ លទ្ធផលល្អនេះ បានមកពីការខិតខំប្រឹងប្រែងរួមគ្នាក្នុងការនាំយកកិត្តិយសជូនខ្លួនឯង សាលារៀន និងខិតខំប្រឹងប្រែងទៅវគ្គបន្ត។

មុធី សុមន្តថៃ ជាបេក្ខជនម្នាក់ក្នុងចំណោម៥នាក់ មកពីវិទ្យាល័យហ៊ុន សែន កំពង់ចាម សាលារៀនជំនាន់ថ្មី បានប្រាប់ឱ្យដឹងថា ការសហការជាក្រុម ជាកត្តាជំរុញឱ្យក្រុមទទួលបានភាពជោគជ័យ ធ្វើការចុះសម្រុងគ្នា គ្មានជម្លោះ និងការងារដំណើរការដោយរលូន ហើយប្រសិនបើមានជម្លោះជាមួយគ្នា នឹងមិនអាចឱ្យកិច្ចការដែលខំប្រឹងប្រែងជាមួយគ្នាដំណើរការទៅមុខបានឡើយ។ ដូច្នេះសមាជិកក្រុមត្រូវចេះជួយគ្នាទៅវិញទៅមក និងបំពេញបន្ថែមរាល់ចំណុចខ្វះខាតឱ្យគ្នាទៅវិញទៅមក។

បេក្ខជនមកពីវិទ្យាល័យហ៊ុន សែន កំពង់ចាម សាលារៀនជំនាន់ថ្មី បន្ថែមថា ក្រុមរបស់គេពិតជាមានអារម្មណ៍ថាសប្បាយចិត្តចំពោះលទ្ធផលមួយនេះ ដែលបានមកពីការខំប្រឹង ពេលខ្លះដាច់បាយ ដាច់ទឹកក៏មាន និងមានមោទកភាពចំពោះខ្លួនឯង ដែលអាចនាំកិត្តិយសដល់សាលារៀនក្នុងខេត្តកំពង់ចាម ព្រោះជាលើកទី១ ដែលមកដល់វគ្គនេះ។

សិស្សថ្នាក់ទី១១ នៃវិទ្យាល័យហ៊ុន សែន កំពង់ចាម សាលារៀនជំនាន់ថ្មី រូបនេះ បញ្ជាក់ថា ចំណុចពិសេសរបស់ក្រុមដែលអាចឱ្យឈានមកដល់វគ្គផ្ដាច់ព្រ័ត្រនេះ គឺអំណះអំណាងរបស់ក្រុម និងភាពពិសេសរៀងៗខ្លួនរបស់សមាជិកក្រុម។ ក្នុងនោះ ការនិយាយលើកដាក់សម្លេងបានល្អ បច្ចេកទេសបកស្រាយបានល្អ ការគោរពពេលវេលា ការសួរឆ្លើយ មានសំណួរសួរទៅក្រុមផ្សេង និងអាចឆ្លើយតបសំណួរបានល្អ។

ជាមួយគ្នានេះ បេក្ខជន សុមន្តថៃ ក៏បានប្ដេជ្ញាចិត្តថា នឹងយកពានរង្វាន់ជជែកដេញដោលយុវជនថ្នាក់ជាតិ ជូនខេត្តកំពង់ចាមឱ្យបាន ព្រោះជាលើកដំបូងសម្រាប់ខេត្ត និងជាឱកាសដែលត្រូវខំប្រឹងជំនះ ទោះបីជាមិនធ្លាប់ទទួលបានជ័យលាភី២ ទៅ៣លើក ក៏ចាត់ទុកជាបទពិសោធន៍ ដែលធ្វើឱ្យយើងរឹងមាំជាងមុន មិនបាក់ទឹកចិត្ត និងត្រូវខិតខំឱ្យយកជ័យជំនះឱ្យបាននៅថ្ងៃមុខ។

កញ្ញា សាន មុន្នីរ័ត្ន ជាបេក្ខជនមួយ​រូបទៀតមកពី វិទ្យាល័យហ៊ុន សែន កំពង់ចាម សាលារៀនជំនាន់ថ្មី លើកឡើងដែរថា សម្រាប់បញ្ហាប្រឈមក្នុងការប្រកួតវិញ គឺត្រូវជួបសម្ភាសន៍អ្នកជំនាញ សិក្សាស្រាវជ្រាវផ្ដោតលើប្រធានបទ ដោយមានពេលវេលាត្រឹមតែមួយសប្ដាហ៍ប៉ុណ្ណោះសម្រាប់ត្រៀមក្នុងការប្រកួត។ ទន្ទឹមគ្នានេះ សមាជិកក្រុម ក៏មានបញ្ហាសុខភាព ដូចជា ផ្ដាសាយ ជាដើមដែលត្រូវការសម្រាកឱ្យបានច្រើន ។ កញ្ញា មុន្នីរ័ត្ន បន្តថា សម្រាប់កម្លាំងចិត្តរបស់ក្រុម គឺឆន្ទៈ និងគោលដៅ ធ្វើយ៉ាងណាឱ្យជាប់វគ្គពាក់កណ្ដាលផ្ដាច់ព្រ័ត្រ និងបន្តទៅវគ្គផ្ដាច់ព្រ័ត្រឱ្យបាន។ សម្រាប់ការបន្តទៅវគ្គបន្ទាប់ គឺជាកិតិ្តយសសម្រាប់ខ្លួនឯង គ្រួសារ និងសាលារៀន។ ក្នុងនោះ សមាជិកក្រុមទាំងអស់ ដាក់គោលដៅមួយថា នឹងសម្រេចឱ្យបានលទ្ធផលល្អ ដោយទម្លាក់ចោលភាពអាត្មានិយម និងភាពខ្ជិលច្រអូស។

ខ្ញុំតែងតែរំពឹងទុកថា ប្រសិនបើក្រុមរបស់យើងធ្វើបានអស់ពីសមត្ថភាពនោះនឹងទទួលបានលទ្ធផលល្អ»។

កញ្ញា សាន មុន្នីរ័ត្ន ជាបេក្ខជនមកពី វិទ្យាល័យស៊ុន សែន កំពង់ចាម សាលារៀនជំនាន់ថ្មី

កញ្ញា សាន មុន្នីរ័ត្ន និយាយថា រូបគេមានអារម្មណ៍រំភើប និងសប្បាយចិត្តនៅពេលដែលខ្លួនអាចសម្រេចគោលបំណងក្រុមក្នុងការឈានមកដល់វគ្គផ្ដាច់ព្រ័ត្រនៃកម្មវិធីជជែកដេញដោលយុវជនថ្នាក់ជាតិ ឆ្នាំ២០២៤នេះ។ កញ្ញា សាន មុន្នីរ័ត្ន បន្តថា ការឈានមកដល់វគ្គនេះ បាននាំយកកិត្តិយសមួយសម្រាប់វិទ្យាល័យហ៊ុន សែន កំពង់ចាម សាលារៀនជំនាន់ថ្មី ក្នុងការបណ្ដុះបណ្ដាលសិស្សចូលរួមកម្មវិធីជជែកដេញដោលយុវជនថ្នាក់ជាតិ។

លោកគ្រូ ផាត ភឿក ជាគ្រូប្រឹក្សាអាជីព និងជាគ្រូដឹកនាំយុវជនចូលរួមប្រកួតជជែកដេញដោលថ្នាក់ខេត្ត នៃវិទ្យាល័យហ៊ុន សែន កំពង់ចាម សាលារៀនជំនាន់ថ្មី មានប្រសាសន៍ថា សិស្សមួយក្រុមនេះ សុទ្ធតែជាសិស្សឆ្នើមប្រចាំសាលា និងសិស្សដែលពូកែក្នុងការសិក្សារៀនសូត្រ ស្រាវជ្រាវ ហើយដោយសារពួកគាត់មានលក្ខខណៈសម្បត្តិគ្រប់គ្រាន់ក្នុងការជជែកដេញដោលយុវជនថ្នាក់ជាតិ សាលាក៏សម្រេចបញ្ជូនសិស្សទាំង៥រូបមកចូលរួមប្រកួត។

គ្រូដឹកនាំយុវជនចូលរួមប្រកួតជជែកដេញដោល រូបនេះ បញ្ជាក់បន្ថែមថា កម្មវិធីជជែកដេញដោលយុវជនថ្នាក់ជាតិនេះ ត្រូវការយុវជនដែលមានទាំងសមត្ថភាពក្នុងការស្រាវជ្រាវ មានថ្វីមាត់ និងភាពក្លាហានក្នុងការនិយាយជាសាធារណៈទៅលើបញ្ហាសង្គម និងចូលរួមដោះស្រាយបញ្ហាសង្គមដោយវិជ្ជមាន ។

លោកគ្រូ ផាត ភឿក បន្ថែមថា លោកពិតជាមានមោទភាព និងសប្បាយចិត្តចំពោះលទ្ធផលមួយនេះ ព្រោះជាគោលដៅដែលសាលាចង់សម្រេចឱ្យបានក្នុងការបញ្ជូនសិស្សមកប្រកួតក្នុងកម្មវិធីជជែកដេញដោលយុវជនថ្នាក់ជាតិ ដល់ទៅ៣ដង ចាប់តាំងពីឆ្នាំ២០២២មក ដែលអាចធ្វើបានត្រឹមវគ្គជម្រុះជុំទី៣។ ដោយឡែកឆ្នាំ២០២៤នេះ ជាលទ្ធផលថ្មីមួយទៀតសម្រាប់ប្អូនៗដែលអាចឡើងមកដល់វគ្គផ្ដាច់ព្រ័ត្រ គឺជាមោទនភាពសម្រាប់ខ្លួនឯង និងសាលារៀនផ្ទាល់។

បើតាម លោកគ្រូ ផាត ភឿក ទឹកចិត្តជាគ្រូបង្រៀន គ្មានអ្វីក្រៅពីចង់ឃើញកូនសិស្សបានល្អ និងក្លាយជាបុគ្គលម្នាក់មានសមត្ថភាពពេញលេញ ពូកែ មានសីលធម៌ក្នុងការរស់នៅល្អ និងចង់ឃើញសិស្សសម្រេចជោគជ័យទៅថ្ងៃខាងមុខ ពិសេស លោករំពឹងថា សិស្សរបស់ខ្លួននឹងជាប់ជ័យលាភីលេខ១ ក្នុងការប្រកួតខាងមុខនេះ។ លោកគ្រូ ផាត ភឿក បន្តថា រូបលោកបានខិតខំអស់ពីសមត្ថភាពហើយដើម្បីជួយសិស្សឱ្យសម្រេចបានលទ្ធផលល្អ ហើយលោកមិនចង់បានអ្វីតបស្នងនោះឡើយឱ្យតែសិស្សអាចសម្រេចគោលបំណងរបស់ខ្លួននាពេលខាងមុខ។

គួរជម្រាបជូនថា ការ​ប្រកួត​វគ្គផ្តាច់ព្រ័ត្រ នៃកម្មវិធីជជែកដេញដោលយុវជន​ថ្នាក់ជាតិ​រដូវកាលទី៥ ឆ្នាំ​២០២៤ ​នឹងប្រព្រឹត្ត​ទៅនៅ​ថ្ងៃទី១២ ខែសីហា ឆ្នាំ​២០២៤ ខាងមុខ ដោយ​បេក្ខជន​មក​ពីវិទ្យាល័យ​ហ៊ុនសែនកំពង់ចាមសាលារៀនជំនាន់ថ្មី នឹងប្រកួតគ្នាបកស្រាយប្រធានបទជាមួយក្រុមបេក្ខជន​មក​ពីសាលាប៊ែលធីអន្តរជាតិ ក្រោមប្រធានបទ «ការបង្កើនសាលារៀនគំរូ គឺជាមាគ៌ាអាទិភាពក្នុងការលើកកម្ពស់គុណភាពអប់រំនៅកម្ពុជា»៕