ដើម្បីសម្រេចចិត្តជ្រើសរើសមុខជំនាញសិក្សាណាមួយ ចាំបាច់ត្រូវការព័ត៌មានជាច្រើនរួមបញ្ចូល ដោយ​ធ្វើ​ការប្រៀបធៀបពីស្ថានភាព ជីវភាពនិងបរិបទក្នុងសង្គមជាដើម។ ការជ្រើសរើសជំនាញដែលឆ្លើយតបនឹងតម្រូវការ ជាពិសេសនៅសាកលវិទ្យាល័យ ឬក្រោយចប់វិទ្យាល័យ អាចជាការសម្រេចចិត្តដ៏ហ្មតចត់មួយក្នុងដំណើរនៃការសិក្សា ហើយជម្រើសក្នុងដំណាក់កាលនេះ គឺជាការសម្រួចជំនាញ និង​ឱកាសការងារនាពេលអនាគត ដូច្នេះ ការឆ្លុះបញ្ចាំងពីចំណូលចិត្ត និងភាពខ្លាំង អំឡុងពេលក្នុងការសម្រេចចិត្តអាចថា វាបង្កើនភាពលើសលប់រំខានផ្នែកអារម្មណ៍ ស្រ្តេស និងប្រើប្រាស់ថាមពលច្រើនក្នុងការស្វែងយល់ពីជំនាញនីមួយៗ។

តែយ៉ាងណាតាមរយៈ Husson University បានបង្ហាញចំណុចមួយចំនួនដែលសិស្សានុសិស្ស​ត្រូវដឹង មុននឹងសម្រេចចិត្តជ្រើសជំនាញសិក្សា ដោយមានរៀបរាប់លម្អិតដូចតទៅ ៖

១. ចំណុចចាប់ផ្តើមនិងសារៈសំខាន់នៃការជ្រើសរើស ៖ ការទុកចន្លោះ និងការផ្ទៀងផ្ទាត់ការសម្រេចចិត្តជ្រើសយកជំនាញ មានភាពភាពសំខាន់នៅត្រង់ថា ជំនាញដែលរៀន ឬមុខវិជ្ជាដែលរៀន ក៏អាចឆ្លុះបញ្ចាំងការងារនាពេលអនាគត ប្រសិនបើជ្រើសរើសប៉ះចំមុខវិជ្ជាដែលខ្លួនចាប់អារម្មណ៍ គឺកាន់តែពង្រីកវិសាលភាពក្នុងការអភិវឌ្ឍខ្លួនចូលទៅក្នុងវិស័យដែលបានរៀននោះ។ ជាងនេះទៅទៀត ការជ្រើសរើសបាននូវជំនាញត្រូវ មិនមែនឆ្លើយតបតែពេលអនាគតប៉ុណ្ណោះទេ ប៉ុន្តែក៏បង្កើតបាននូវភាពរីករាយកំឡុងពេលសិក្សាផងដែរ ព្រោះបានជួបមនុស្សក្នុងរង្វង់ចំណូលចិត្តស្រដៀងគ្នា និងងាយស្រួលក្នុងការបង្កើនភាពចុះសម្រុង ក៏ដូចជាការប្រមូលផ្តុំគ្នា។ ជាងនេះទៅទៀត បទពិសោធន៍ដែលបានពីការជ្រើសជំនាញ ក៏មានភាពប្រទាក់ក្រឡាគ្នាទៅនឹងក្រុមមនុស្សដែលត្រូវទំនាក់ទំនងគ្នា ងាយស្រួលក្នុងការពង្រីកបណ្តាញ។

២. អ្វីដែលគួរពិចារណាជាទូទៅ ៖ នៅពេលដែលចាំបាច់ក្នុងការសម្រេចចិត្តជ្រើសរើសជំនាញនៅមហាវិទ្យាល័យ គួរឆ្លុះបញ្ចាំងទៅលើចំណាប់អារម្មណ៍ផ្ទាល់ខ្លួន និងចំណុចខ្លាំង ហើយនឹងការងារក្នុងក្ដីស្រមៃ។ បន្ថែមពីនោះ ក៏គួពិចារណាលើជំនាញដែលមានភាពពាក់ព័ន្ធ អំពីចំណាប់អារម្មណ៍ដែលមាន និងប្រភេទកម្មវិធីដែលមានផ្តល់ជូនពីសាលា ថា តើបានឆ្លើយតបនឹងទីផ្សារកម្រិតណា?

៣. ដឹងដោយរបៀបណាថាមុខវិជ្ជានោះត្រូវជាមួយខ្លួនឯង ៖ ជ្រើសរើសជំនាញ គឺជាដំណើរផ្ទាល់ខ្លួនមួយ ដែលតម្រូវឱ្យសិស្ស ឬបុគ្គលម្នាក់ៗសង្កេត និងសាកល្បង​ឱ្យបានច្រើនវិធីសាស្រ្ត។ ហើយអ្វីដែលនៅតែសង្កត់ធ្ងន់នៅត្រង់នេះ គឺការស្វែងយល់ពីភាពខ្លាំង និងចំណាប់អារម្មណ៍នៅតែជាគោលសំខាន់ៗ ទន្ទឹមគ្នានោះ ក៏ត្រូវប្រមូលព័ត៌មាន និងទិន្នន័យបន្ថែម ពាក់ព័ន្ធនឹងបទពិសោធន៍ជាក់ស្តែងពីអ្នករៀនជំនាញនីមួយៗ ព្រោះចំណូលចិត្ត ហើយនឹងមានព័ត៌មាន គឺជាកត្តាសម្រួលដល់ការវិភាគ និងរុញទៅឱ្យដល់ចំណុចពីរ គឺភាពជោគជ័យក្នុងការសិក្សា និងថាមពលក្នុងការចាប់យកការងារតាមការរំពឹងទុក៕