ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
បច្ចុប្បន្ននេះ ទាំងក្នុងរង្វង់អ្នកសិក្សា និងក្នុងវិស័យការងារ ភាពចម្រុះនៃការទំនាក់ទំនង ឆ្លងភាសានិងវប្បធម៌មានការកើនឡើង! មិនថាភាសាក្នុងតំបន់ឬសាកល របៀបនៃការនិយាយស្តី និងការអធិប្បាយនានា សុទ្ធតែត្រូវការជំនាញនៃការប្រាស្រ័យទាក់ទងមួយដែលមានប្រសិទ្ធភាពដើម្បីជំរុញមនុស្សបង្កើនការសហការគ្នា។
ជំនាញទំនាក់ទំនងជាមួយមនុស្ស ដែលមកពីវប្បធម៌ខុសគ្នាកាន់តែសំខាន់ ដោយសារតែរបត់នៃការធំធាត់របស់មនុស្សម្នាក់ៗ មានភាពខុសគ្នា រួមទាំងភាសា វប្បធម៌ ភូមិសាស្រ្ត និងជីវភាពមានភាពខុសគ្នា រឹងរឹតតែត្រូវការគន្លឹះបន្ថែមក្នុងការអនុវត្តដើម្បីផ្តល់ទំនុកចិត្តខ្លួនឯងនៅពេលប្រាស្រ័យទាក់ទងជាមួយក្រុមណាមួយ ឬក៏បុគ្គលណាម្នាក់។
តាមរយៈ Chrysos មានគន្លឹះមួយចំនួន ដែលអាចផ្សារភ្ជាប់មនុស្ស ឱ្យអាចប្រាស្រ័យទាក់ទងជាមួយគ្នាបានគឺ ការប្រកាន់ភ្ជាប់នូវសីលធម៌ ការគោរពគ្នា ជៀសវាងការប្រើភាសាតាមតំបន់ ការនិយាយមួយៗច្បាស់ៗ ការប្រើប្រាស់ពាក្យសាមញ្ញៗ ការអនុវត្តវិធីសាស្រ្តស្តាប់ដោយយកចិត្តទុកដាក់ ការអត់ធ្មត់រង់ចាំឱ្យទាល់តែដល់វេនខ្លួនឯងសឹមនិយាយ ការជៀសវាងនូវសំណួរបិទ ប្រើប្រាស់ប្រយោគដោយភាពប្រុងប្រយ័ត្ន និងការគោរពភាពចម្រុះនៃភាសាជាដើម។
សីលធម៌ ៖ មិនថាកើតមកក្នុងបរិបទណាទេ ការប្រកាន់ភ្ជាប់សីលធម៌នៅពេលនិយាយស្ដីជាមួយមនុស្សជុំវិញខ្លួន គឺជាការបណ្តុះបរិយាកាសមួយដែលផ្តល់ផាសុកភាព ទៅកាន់ខ្លួនឯង និងមនុស្សជុំវិញខ្លួន។ សីលធម៌ទៀតសោត ក៏មានភាពខុសគ្នាពីតំបន់មួយ ទៅតំបន់មួយ។ ដូច្នេះមុននឹងជួបនរណាម្នាក់ ឬក្រុមមនុស្សណាមួយ ចាំបាច់ត្រូវសិក្សាស្វែងយល់បន្ថែមអំពីបរិបទ ដែលពួកគាត់រស់នៅ ដើម្បីជៀសវាងនូវការប្រើប្រាស់ប្រយោគដែលប៉ះពាល់ដល់សេចក្ដីថ្លៃថ្នូរដោយប្រការណាមួយ។
ការប្រើភាសាក្នុងតំបន់ ៖ ការប្រើពាក្យពេចន៍ ដោយផ្អែកលើតំបន់ដែលខ្លួនរស់នៅច្រើនពេក ជាពិសេសនៅពេលនិយាយភាសា ដែលមិនមែនជាភាសាដើមកំណើត។ ការប្រើប្រាស់ពាក្យក្នុងតំបន់ច្រើន វាផ្តល់ផលលំបាកឱ្យភាគីម្ខាងទៀតមិនយល់អំពីអ្វីដែលខ្លួនបាននិយាយ ដូច្នេះប្រសិនបើមានពាក្យរួមគ្នា ឬពាក្យដែលមនុស្សប្រើជាទូទៅ គួរព្យាយាមប្រើពាក្យសាមញ្ញៗឱ្យបានច្រើន។ គួរចាំដែរថា ការប្រាស្រ័យទាក់ទងគ្នា ត្រូវការយល់ពីគ្នាជាគោល! មិនមែនជាទីលានប្រកួតពាក្យប្លែកៗនោះទេ។
និយាយយឺតៗ ៖ ក្នុងករណីនិយាយជាមួយមនុស្សដែលមកពីមជ្ឈដ្ឋានខុសគ្នា និងត្រូវប្រើភាសាណាមួយរួមគ្នា ដូចជាភាសាអង់គ្លេស! ការនិយាយក្នុងល្បឿនធម្មតាទៅតាមធម្មជាតិ ពុំត្រូវបានលើកទឹកចិត្តនោះទេ ដោយសារតែទម្លាប់នៃការឮសម្លេងបញ្ចេញវោហារមានភាពខុសគ្នា ទើបតម្រូវឱ្យអ្នកនិយាយ ចាំបាច់ត្រូវបន្ថយល្បឿនឱ្យខុសពីសព្វមួយដង ដែលផ្តោតសំខាន់ទៅលើភាពច្បាស់ៗ នៃការបញ្ចេញសម្លេង និងតម្រឹមខ្លឹមសារកុំឱ្យវែងពេក ជាមួយគ្នានោះ ប្រសិនបើស្តាប់អ្នកដទៃមិនបាន គួរសួរត្រឡប់បញ្ជាក់ទៅវិញភ្លាមៗ ដើម្បីជៀសវាងការសន្ទនាដែលមានភាពយល់ច្រឡំក្នុងរយៈពេលវែង៕
