ក្នុងពិធីបើកសន្និបាតបូកសរុបការងារអប់រំ យុវជន និងកីឡាឆ្នាំសិក្សា២០២៣-២០២៤ និងទិសដៅឆ្នាំសិក្សា ២០២៤-២០២៥ នាព្រឹកថ្ងៃទី២៤ ខែកុម្ភៈ ឆ្នាំ២០២៥ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្ត្រីក្រសួងអប់រំ យុវជន និងកីឡា មានប្រសាសន៍ថា ក្រសួងអប់រំ យុវជន និងកីឡា រំពឹងថា លទ្ធផលនៃកម្មវិធីរង្វាយតម្លៃលទ្ធផលសិក្សារបស់សិស្សជាអន្តរជាតិ (PISA) របស់កម្ពុជានៅឆ្នាំ២០២៥ អាចនឹងកើនឡើងក្នុងរង្វង់ ១០ពិន្ទុ លើបំណិនទាំង៣ រួមមាន អំណាន គណិតវិទ្យា និងវិទ្យាសាស្ត្រ។

កម្មវិធីរង្វាយតម្លៃលទ្ធផលសិក្សារបស់សិស្ស (PISA – Programme for International Student Assessment) គឺជាកម្មវិធីវាយតម្លៃអន្តរជាតិដែលរៀបចំឡើងដោយអង្គការសហប្រតិបត្តិការ និងការអភិវឌ្ឍន៍សេដ្ឋកិច្ច (OECD)។ កម្មវិធីនេះត្រូវបានរៀបចំឡើងជារៀងរាល់៣ឆ្នាំម្តង ដើម្បីវាយតម្លៃចំណេះដឹង និងជំនាញរបស់សិស្សអាយុ១៥ឆ្នាំ ក្នុងវិស័យគណិតវិទ្យា វិទ្យាសាស្ត្រ និងការអាន។ គោលបំណងចម្បងរបស់ PISA គឺដើម្បីវាយតម្លៃ និងកែលម្អប្រព័ន្ធអប់រំទូទាំងពិភពលោក ដោយផ្តោតលើការធានាថា សិស្សទាំងអស់មានសមត្ថភាពគ្រប់គ្រាន់ក្នុងការចូលរួមយ៉ាងមានប្រសិទ្ធភាពក្នុងសង្គម និងសេដ្ឋកិច្ច។

ឯកឧត្តមបណ្ឌិតសភាចារ្យ ហង់ជួន ណារ៉ុន មានប្រសាសន៍ថា ដោយសារការចូលរួមអនុវត្តតេស្តអន្តរជាតិ PISA នឹងធ្វើឡើងនៅក្នុងខែមិថុនា ឆ្នាំ២០២៥ ខាងមុខ ក្រសួងបានដាក់ចេញសេចក្តីណែនាំស្តីពីការពង្រឹងការអនុវត្តតេស្តស្តង់ដាតាមលំនាំតេស្តស្តង់ដាកម្រិតអន្តរជាតិ PISA នៅតាមគ្រឹះស្ថានមធ្យមសិក្សាសាធារណៈ ក្នុងគោលបំណងលើកកម្ពស់ចំណេះដឹង និងបំណិនផ្នែកអំណាន គណិតវិទ្យា និងវិទ្យាសាស្ត្រ របស់សិស្សនៅមធ្យមសិក្សា ព្រមទាំងជំរុញការបង្រៀននិងរៀនតាមលំនាំសំណួរតេស្តស្តង់ដាកម្រិតអន្តរជាតិ PISA។

រដ្ឋមន្ត្រីក្រសួងអប់រំ បញ្ជាក់បន្ថែមថា ការអនុវត្តកម្មវិធីនេះ គឺផ្តោតលើ ទី១. ការផ្តល់ជូនគំរូសំណួរតេស្តអន្តរជាតិ PISA ផ្នែកអំណាន គណិតវិទ្យា និងវិទ្យាសាស្ត្រ, ទី២.ការចុះបង្វឹកការធ្វើតេស្តស្តង់ដាតាមលំនាំសំណួរតេស្តអន្តរជាតិ PISA ទី៣.​ ការជំរុញការតាក់តែងសំណួរតេស្តស្តង់ដាតាមលំនាំសំណួរតេស្តអន្តរជាតិ PISA បន្ថែមថ្មីជាប្រចាំ និងបញ្ចូលទៅក្នុង App ទី៤. ការចុះគាំទ្រសាលារៀន និងគ្រូបង្រៀនជាទៀងទាត់ និងមានផែនការច្បាស់លាស់ ដោយផ្តោតលើដំណើរការហ្វឹកហាត់សំណួរតេស្តអន្តរជាតិ PISA និងទី៥. ការចុះគាំទ្រ និងជំរុញការអនុវត្តស្តង់ដាសាលារៀនគំរូ។

គួរជម្រាបជូនថា ប្រទេសកម្ពុជាបានចូលរួមអនុវត្តលើកដំបូង នៃកម្មវិធីរង្វាយតម្លៃលទ្ធផលសិក្សារបស់សិស្ស (PISA) នៅឆ្នាំ២០២២​ ក្នុងនោះ លទ្ធផលគណិត សិស្សកម្ពុជាទទួលបានពិន្ទុមធ្យម ៣៣៦ កើនឡើង១១% ប្រៀបធៀប នឹង​ពិន្ទុ PISA-D ប៉ុន្តែពិន្ទុមធ្យមភាគរបស់កម្ពុជា នៅទាបជាង OECD មានពិន្ទុមធ្យម ៤៧២ និងប្រទេសអាស៊ានមានពិន្ទុមធ្យម ៤១៨ ។ ចំណែក លទ្ធផលវិទ្យាសាស្រ្ត សិស្សកម្ពុជាទទួលបានពិន្ទុជាមធ្យម ៣៤៧ កើន ១៧ពិន្ទុ ប៉ុន្តែពិន្ទុមធ្យមនៅទាបជាង OECD ៤៨៥ និងអាស៊ាន ៤២៤។ សិស្សកម្ពុជា ១០,៤% ស្ថិតក្នុងកម្រិតសមត្ថភាពពីរ និងខ្ពស់ជាងនេះ កើន ៥%។

យ៉ាងណាក៏ដោយ លទ្ធផលនេះបានផ្ដល់បទពិសោធន៍ និងភស្ដុតាងសំខាន់ៗមួយចំនួនដល់ ក្រសួងអប់រំ យុវជន និងកីឡា ក្នុងការស្វែងយល់ពីសមត្ថភាពសិស្សអាយុ១៥ឆ្នាំ នៅកម្ពុជាធៀបនឹងបរិបទអប់រំសកល និងបញ្ហាប្រឈមមួយចំនួនក្នុងប្រព័ន្ធអប់រំកម្ពុជា៕