ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការមានទម្លាប់រក្សាផ្នត់គំនិតវិជ្ជមានឱ្យបានជាប់លាប់ បូករួមទាំងការប្តេជ្ញាចិត្តអនុវត្តន៍សកម្មភាពដែលនាំជាប្រយោជន៍បានប្រចាំ គឺជាឥទ្ធពលយ៉ាងសំខាន់ជួយឱ្យយុវជន និងបុគ្គលកំពុងស្វែងរកខ្លួនឯង រួមទាំងអ្នកដែលកំពុងបំពេញបេសកកម្មជិវិត ឱ្យរឹងរឹតតែទទួលបាននូវសមិទ្ធផលមួយជាទីគាប់ចិត្ត។ នេះជាការលើឡើងរបស់លោក Steven Cheam អ្នកផលិតមាតិកាកម្សាន្តដ៏ល្បីល្បាញ ក្នុងវេទិកានិយាយជាសាធារណៈ នៃកម្មវិធី RYL Talks 12។
លោក Steven Cheam បន្តថា អ្វីក៏ដោយគឺទាក់ទងនឹងការមានផ្នត់គំនិតវិជ្ជមាន ការប្រតិបត្តិ សកម្មភាពមួយនៅថ្ងៃនេះ ពេលនេះ ហើយអ្នកទាំងអស់គ្នា នឹងអាចអភិវឌ្ឍន៍ខ្លួនឯងនៅថ្ងៃស្អែកបាន។ ប្រសិនបើ ថ្ងៃនេះ ធ្វើបានសកម្មភាពមួយ ថ្ងៃស្អែកធ្វើបានពីរ ហើយថ្ងៃបន្ទាប់នឹងធ្វើបានកាន់តែច្រើនជាងនេះទៅទៀតដែលបង្ហាញពីឥទ្ធិពលនៃផ្នត់គំនិតវិជ្ជមាន និងការប្រឹងប្រែងជាប្រចាំ ។
ស្រមៃមើល ប្រសិនបើ ៧ ទៅ ៨ ឆ្នាំមុន ខ្ញុំអត់បានយកពាក្យទៅដាក់នៅសាលាពេទ្យ តើខ្ញុំអាចក្លាយជាទន្តបណ្ឌិត ហើយអាចកែប្រែស្នាមញញឹមជូនអ្នកជំងឺខ្ញុំបានរាល់ថ្ងៃឬអត់? គឺអត់ទេ! ប្រសិនបើប្រាំឆ្នាំមុន ខ្ញុំអត់លើក កាមេរ៉ា មកថត តើខ្ញុំអាចក្លាយជាអ្នកបង្កើតមាតិកាឬក៏វិឌេអូទេ? គឺអត់ទេ។ អ៊ីចឹងយើងត្រូវបង្កើតឱកាសដោយខ្លួនឯង ផ្តើមពីជំហានដំបូងសិន ទើបយើងដឹងថាយើងស្រឡាញ់វាឬអត់ និងទៅមុខបានអត់។
លោក Steven Cheam មានតួនាទីជាទន្តបណ្ឌិត និងអ្នកផលិតមាតិកាកម្សាន្ត
លោកសង្កត់ធ្ងន់ថា ប្រសិនជាយើង ចង់អភិវឌ្ឍន៍ខ្លួនឯង យើងចង់ធ្វើអ្វីមួយ ដែលជោគជ័យ និងការសម្រេចគោលដៅណាមួយ ការដើរផ្លូវតែមួយនៅមិនទាន់គ្រប់គ្រាន់នៅឡើយទេ។ ក្នុងស្ថានភាពខ្លះ មានផ្លូវជាច្រើនដែលគួរសម្លឹងមើលឱ្យបានច្រើនជ្រុង ជាមុនសិន សឹមយើងបន្តដើរទៅមុខ។ យើងមិនអាចបិទខ្លួនឯងមិនឱ្យដើរនោះទេ ពីមួយជំហាន ទៅមួយជំហាន យើងត្រូវការរកផ្លូវផ្សេងៗ ដើម្បីឈានទៅដល់គោលដៅរបស់យើង។ កុំអស់សង្ឃឹម ហើយព្យាយាមឱ្យខ្លាំង ដើម្បីសម្រេចគោលដៅ។
លោក Steven Cheam រំលេចបន្ថែមថា សមត្ថភាពរបស់យើង អត់មានព្រំដែនទេ ឱ្យតែយើងដាក់ចិត្តរៀនសូត្រពីជំនាញអ្វីមួយ ការស្វែងរកផ្លូវដើរដែលមានភាពចម្រុះ រៀនសូត្រពីមជ្ឈដ្ឋានដទៃ និងមនុស្សជុំវិញខ្លួន ទាំងនេះសុទ្ធសឹងតែ ជាកត្តាអាចអភិវឌ្ឍន៍ខ្លួនឯងបាន។ កុំបោះបង់ចោលការអភិវឌ្ឍខ្លួនឯង កុំបោះបង់ការខិតខំប្រឹងប្រែងក្នុងការសម្រេចគោលដៅ៕
