ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការរៀបចំកញ្ចប់ថវិកា ឬចំណូលចំណាយ ដែលឆ្លើយតបនឹងតម្រូវការជាក់ស្តែងផ្ទាល់ខ្លួន បានរួមចំណែកដល់ការកាត់បន្ថយស្រេ្តសពាក់ព័ន្ធនឹងការចាយវាយ ឬការរស់នៅប្រចាំថ្ងៃ និងជាការពង្រឹងសុខភាពផ្លូវចិត្តទៀតផង ព្រោះការសន្សំ អាចជួយដោះស្រាយហានិភ័យ ហើយកាត់បន្ថយភាពស្លន់ស្លោមួយចំនួនដូចជា កើតមានគ្រោះថ្នាក់ដែលមិនដឹងមុន ផ្គត់ផ្គង់ការចំណាយនៅពេលមានវ័យជរា កាត់ផ្តាច់ការចំណាយដែលមិនចាំបាច់ ការគ្រប់គ្រងថវិការដែលខ្លួនមានបានល្អ មានទម្លាប់ចំណាយដែលស្របនឹងលទ្ធភាពដែលខ្លួនមាន ពង្រឹងសុខុដុមរមនាក្នុងគ្រួសារ រួមទាំងអាចកាត់បន្ថយអាការស្រេ្តសពាក់ព័ន្ធនឹងការចាយវាយបានមួយផ្នែក ហើយជំរុញឱ្យសុខភាពផ្លូវចិត្តមានភាពល្អប្រសើរជាងមុន។ ប៉ុន្តែតើអ្នកត្រូវមានគន្លឹះមូលដ្ឋានគ្រឹះបែបណាខ្លះ ក្នុងការគ្រប់គ្រងកញ្ចប់ថវិកាផ្ទាល់ខ្លួនឱ្យមានប្រសិទ្ធភាព?
តាមរយៈ In charge បានបង្ហាញគន្លឹះចំនួន៣ ជួយអ្នកក្នុងការគ្រប់គ្រងថវិកាផ្ទាល់ខ្លួន ៖
ការប្រមូលទិន្នន័យ ឬរបាយការណ៍ ៖ បើចង់សល់លុយ គឺចាយកុំឱ្យលើសចំណូល! នេះជាប្រយោគដែលសាមញ្ញៗងាយយល់ និងឮស្ទើតែគ្រប់កន្លែង ប៉ុន្តែដំណាក់កាលអនុវត្តវិញ ត្រូវការពេលវេលា ត្រូវការវិធីសាស្រ្តបំបែកភាពស្មុគស្មាញ និងការគណនាមួយ ដែលមានភាពច្បាស់លាល់ និងការកត់ត្រា ឬការប្រមូលឯកសារពាក់ព័ន្ធនឹងទិន្នន័យឱ្យបានគ្រប់ជ្រុងជ្រោយ។
ដើម្បីឱ្យការសន្សំមានរយៈពេលយូរ ជាដំបូងៗគឺត្រូវប្រមូលទិន្នន័យពាក់ព័ន្ធនឹងការចាយវាយទាំងអស់ មិនថាឯកសារពាក់ព័ន្ធនឹងប្រភពចំណូល ប្រភពចំណាយ ប្រាក់កម្ចី បំណុល លំហូរសាច់ប្រាក់ វិក្កយបត្រដែលត្រូវបង់សង ការសន្សំ រួមទាំងការវិនិយោគជាដើម! ត្រូវប្រាកដថា បានប្រមូលទិន្នន័យអំពីចំណាយ និងចំណូលបានពីគ្រប់ប្រភព ហើយជាកិច្ចបន្ទាប់ គឺគណនាអំពីចំណូលដែលទទួលបាន មិនថាជាចំណូលពីការងារទៀងទាត់ប្រចាំខែ ឬបានពីគម្រោងណាមួយនោះទេ។
បន្ទាប់ពីមានទិន្នន័យហើយ សរសេរ រាយនាមឱ្យលម្អិតអំពីការចំណាយប្រចាំខែ មិនថាថ្លៃស្នាក់នៅ ថ្លៃចំណីអាហារ ថ្លៃទឹកឬភ្លើង ថ្លៃធ្វើដំណើរ ការថែទាំសុខភាព និងការកម្សាន្តឬធ្វើដំណើរជាដើម។ បន្ទាប់មកបំបែកនូវប្រាក់ចំណូល និងប្រាក់ចំណាយដាច់ដោយឡែកពីគ្នា នោះលោកអ្នកនឹងរកឃើញថា តើចំណូល និងចំណាយកន្លងមកមានតុល្យភាព ឬសមាមាត្រគ្នាដែរទេ ឬថា តើចំណាយកន្លងមកឆ្លើយតបនឹងចំណូលដែលទទួលបានឬយ៉ាងណា?
គន្លឹះដើម្បីបង្កើនប្រសិទ្ធភាពកំឡុងពេលធ្វើផែនការសន្សំ ឬរបៀបចំកញ្ចប់ថវិកា ៖ ស្ថិតក្នុងដំណាក់កាលនៃការធ្វើឱ្យទម្លាប់នៃការគ្រប់គ្រងចំណូលចំណាយ ចាំបាច់ត្រូវសិក្សា និងកត់សម្គាល់បន្ថែមឱ្យលម្អិតអំពីសម្ភារៈដែលមានភាពចាំបាប់ និងសម្ភារៈដែលមានភាពប្រណិតៗ ឬសម្ភារៈនិយម ហើយការកត់សម្គាល់បែបនេះ គឺដើម្បីជួយសម្រួលក្នុងការសម្រេចចិត្តឱ្យបានត្រឹមត្រូវ មុននឹងទិញសម្ភារៈណាមួយមកបន្ថែមក្នុងការរស់នៅប្រចាំថ្ងៃ។ គួរទុកចន្លោះដើម្បីវិភាគមុននឹងបញ្ជាទិញសម្ភារៈណាមួយដាក់ក្នុងផ្ទះ ហើយជៀសវាងការទិញលឿនពេក។ វីធីមួយទៀតគឺ ប្រើប្រាស់ការចំណាយណាដែលមានភាពស្មុគស្មាញ (សាច់ប្រាក់) ដើម្បីទប់ចិត្ត កុំឱ្យបង្កើនការចំណាយដែលមានភាពលឿនរហ័សពេក ។
ប្រឹក្សាជាមួយអ្នកជំនាញ ៖ ប្រសិនបើអនុវត្តហើយនៅតែមិនមានប្រសិទ្ធភាព ឬក៏ត្រូវការសន្សំក្នុងគោលដៅមួយដែលមានភាពជាក់លាក់នឹងលក្ខណៈធំដំ ស្ថិតក្នុងកាលៈទេសៈនេះ គឺជាពេលមួយ ដែលត្រូវស្វែងរកអ្នកជំនាញក្នុងការប្រឹក្សាបន្ថែម ហើយស្វែងរកអ្នកប្រឹក្សាណាដែលមានជំនាញទៅលើហិរញ្ញវត្ថុយ៉ាងពិតប្រាកដ៕
