ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
បន្ទាប់ពីដឹងលទ្ធផលប្រឡងបាក់ឌុបរួច ក៏ជាពេលដែលប្អូនៗសិស្សានុសិស្សស្វះស្វែងរកជំនាញសិក្សាបន្តនៅសាកលវិទ្យាល័យ ឬសាលាបណ្ដុះបណ្ដាលបច្ចេកទេស ក៏ដូចជាការត្រៀមខ្លួនមកបន្តការសិក្សានៅរាជធានីភ្នំពេញជាដើម។ សម្រាប់សិស្សនៅតាមបណ្ដាខេត្ត ការឡើងមកបន្តការសិក្សានៅទីក្រុង អាចជារឿងថ្មីស្រឡាងរបស់ពួកគេ ដូច្នេះតើសិស្សានុសិស្សទាំងនោះ គួរត្រៀមខ្លួនយ៉ាងដូចម្ដេចខ្លះ?
លោក ជក់ សុភា បច្ចុប្បន្នជាគ្រូបង្រៀនមុខវិជ្ជាអក្សរសាស្រ្តខ្មែរ នៅសាលារៀនជំនាន់ថ្មី នៃវិទ្យាល័យព្រែកលៀប និងជាអតីតនិស្សិតជំនាញអក្សរសាស្រ្តខ្មែរ នៃសាកលវិទ្យាល័យភូមិន្ទភ្នំពេញ មានប្រសាសន៍ថា ការឡើងមកសិក្សានៅទីក្រុង ជាដំបូងត្រូវគិតពីការជ្រើសរើសជំនាញបន្តការសិក្សានៅសាកលវិទ្យាល័យ ប្អូនៗសិស្សានុសិស្សត្រូវតែរៀនជំនាញណាដែលខ្លួនចូលចិត្ត និងជាទេពកោសល្យរបស់ខ្លួន ទើបអាចទទួលបានជោគជ័យនៅពេលខាងមុខ។ លើសពីនេះ ប្អូនៗសិស្សានុសិស្សកុំរៀនជំនាញណាមួយតាមមិត្តភក្ដិ ឬតាមចិត្តគ្រួសារ ប្រសិនជាជំនាញដែលប្អូនៗមិនស្រឡាញ់ចូលចិត្ត អាចនាំឱ្យយើងខាតពេល។ «ប្អូនៗត្រូវសួរខ្លួនឯងមានទេពកោសល្យអ្វី និងចូលចិត្តមុខវិជ្ជាអ្វីខ្លះកាលរៀននៅថ្នាក់វិទ្យាល័យ ដើម្បីភ្ជាប់ជាមួយជំនាញរៀននៅសាកលវិទ្យាល័យ។ ឧទាហរណ៍ ផ្នែកច្បាប់ គ្រូបង្រៀន ផ្នែករដ្ឋបាល សំណង់ស៊ីវិល ស្ថាបត្យករ សិល្បៈ បុរាណវិទ្យាជាដើម»។
គ្រូបង្រៀនមុខវិជ្ជាអក្សរសាស្រ្តខ្មែររូបនេះ បន្ថែមថា ការជ្រើសរើសមុខជំនាញ ត្រូវគិតពីទីផ្សារការងារផងដែរ ដើម្បីដឹងច្បាស់ថា ក្រោយរៀនចប់រយៈពេល៤ឆ្នាំ ជំនាញដែលយើងរៀននៅតែមានទីផ្សារការងារ។ លោក ជក់ សុភា បន្តថា ប្អូនសិស្សានុសិស្សក៏អាចជ្រើសរើសជំនាញណាមួយដែលមិនសូវមានអ្នករៀនច្រើន ទើបមានឱកាសការងារច្រើន ដូចជា ផ្នែកបច្ចេកទេស ការជួសជុលយានយន្ត ម៉ាស៊ីនត្រជាក់ ទូទឹកកកជាដើម។ បច្ចេកទេសទាំងអស់នេះ ពិតជាសំខាន់ ហើយកំពុងមានតម្រូវការច្រើននៅប្រទេសកម្ពុជាសព្វថ្ងៃ។
អតីតនិស្សិតរូបនេះ លើកឡើងទៀតថា ប្រសិនបើគ្រួសារមិនមានលទ្ធភាពគ្រប់គ្រាន់សម្រាប់ជំនាញដែលប្អូនៗសិស្សានុសិស្សចង់រៀន យើងក៏អាចស្វែងរកការប្រឡងយកអាហារូបករណ៍នៅតាមក្រសួង ស្ថាប័ន ក៏ដូចជានៅតាមសាកលវិទ្យាល័យនានា ដើម្បីជួយគាំទ្រការសិក្សារយៈពេល៤ឆ្នាំ។ លោក ជក់ សុភា បន្តថា សម្រាប់ការជ្រើសរើសសាកលវិទ្យាល័យវិញ រឹតតែសំខាន់សម្រាប់ប្អូនៗ ដើម្បីជួយឱ្យការសិក្សាមានគុណភាព ដោយសារមានកម្មវិធីសិក្សាស្តង់ដា និងឱកាសអាហារូបករណ៍ ឬការផ្លាស់ប្ដូរការសិក្សាទៅក្រៅប្រទេសជាដើម ។ លើសពីនេះ ប្អូនៗត្រូវជ្រើសរើសសាកលវិទ្យាល័យដែលមានអាយុកាលយូរឆ្នាំ សញ្ញាប័ត្រទទួលស្គាល់ទាំងពេលបច្ចុប្បន្ន និងនៅពេលអនាគត ទើបធ្វើឱ្យតម្លៃ នៃការសិក្សា និងតម្លៃសញ្ញាប័ត្រមានគុណភាពយូរអង្វែង។
កញ្ញា សេង ធារ៉ា ជាបុគ្គលិកធនាគារ និងជាអតីតនិស្សិតដែលឡើងមកពីខេត្តមកសិក្សានៅភ្នំពេញបានចែករំលែកបទពិសោធន៍ថា សម្រាប់ប្អូនៗសិស្សានុសិស្សដែលទើបប្រឡងបាក់ឌុបរួច ពេលឡើងមកភ្នំពេញដំបូងៗត្រូវ ស្វែងរកកន្លែងស្នាក់នៅជិតសាកលវិទ្យាល័យដែលខ្លួនបន្តការសិក្សា មានសុវត្ថិភាព និងមានកន្លែងដាក់ម៉ូតូ ឬកង់។ កញ្ញា សេង ធារ៉ា បន្តថា ការជ្រើសរើសកន្លែងស្នាក់នៅជិតសាកលវិទ្យាល័យ នឹងផ្ដល់ភាពងាយស្រួលដល់ប្អូនៗជាសិស្សថ្មីមិនទាន់ស្គាល់ទីតាំងភូមិសាស្រ្តនៅទីក្រុងភ្នំពេញច្បាស់ ងាយស្រួលធ្វើដំណើរ និងមិនវង្វេងផ្លូវ។
កញ្ញា សេង ធារ៉ា បញ្ជាក់បន្ថែមថា ពេលមករៀននៅទីក្រុងភ្នំពេញ ប្អូនៗមកបន្តការសិក្សានៅសាកលវិទ្យាល័យឆ្នាំទី១ ប្រៀបដូចជាអ្នកចំណូលថ្មី ងាយនឹងភ្លើតភ្លើនទៅនឹងរឿងថ្មីៗមិនធ្លាប់ជួបពេលនៅខេត្ត ដូច្នេះ ពេលរស់នៅទីក្រុងភ្នំពេញ ត្រូវតែចេះរៀបចំចំណូល និងចំណាយរបស់ខ្លួនឯងឱ្យបានច្បាស់លាស់។ កញ្ញា សេង ធារ៉ា បន្តថា ចំណាយចាំបាច់សម្រាប់និស្សិត គឺទៅលើការហូបចុក ជាអាហារបីពេល ក៏ដូចជាការចំណាយលើសម្ភារៈសិក្សាជាដើម។ ចំណែក ការទិញសម្លៀកបំពាក់ថ្មីៗ ទៅមើលកុន ឬទៅដើរលេងជាមួយមិត្តភ័ក្ដិញឹកញាប់ គួរកាត់បន្ថយបើមិនចាំបាច់។ ឧទាហរណ៍ ឪពុកម្ដាយផ្ញើលុយមកក្នុងមួយខែ ១០០ដុល្លារ ប្អូនៗត្រូវចេះរៀបចំគម្រោងចំណាយក្នុងមួយខែៗឱ្យបានត្រឹមត្រូវ ដើម្បីកុំឱ្យខ្វះខាតពេលចុងខែ ទម្រាំតែអ្នកផ្ទះផ្ញើមកបន្ថែម ឬរកចំណូលដោយខ្លួនឯងបាន។
អតីតនិស្សិតរូបនេះបន្ថែមថា សម្រាប់ការសិក្សានៅសាកលវិទ្យាល័យ នាងលើកទឹកចិត្តឱ្យប្អូនសិស្សានុសិស្សអង្គុយនៅតុខាងមុខ ឬយ៉ាងច្រើនត្រឹមជួរទី៣ ឬទី៤ កុំអង្គុយតុខាងក្រោយគេ ពីព្រោះការអង្គុយតុខាងមុខ នឹងជួយឱ្យសិស្សានុសិស្សផ្ចង់អារម្មណ៍ទៅលើការពន្យល់របស់លោកគ្រូ អ្នកគ្រូបានច្រើន និងមិនមានសំឡេងរំខាននៅក្នុងថ្នាក់។ កញ្ញា ធារ៉ា បន្តថា ប្រសិនជាប្អូនៗរៀនមិនយល់ ឬមិនចេះច្បាស់ចំណុចណាមួយ ត្រូវសួរសិស្សច្បងជំនាន់មុន ចេះស្រាវជ្រាវតាមប្រព័ន្ធអ៊ីនធឺណិត ឬជួបមិត្តភ័ក្ដិដើម្បីបង្កើតជាក្លឹបសិក្សា និងចូលអានសៀវភៅនៅបណ្ណាល័យ ទើបធ្វើឱ្យការសិក្សាទទួលបានលទ្ធផលល្អ។
ជាមួយគ្នានេះ ធារ៉ា ក៏បានលើកទឹកចិត្តសិស្សានុសិស្សទាំងអស់ដែលទើបនឹងឡើងមករៀននៅសាកលវិទ្យាល័យ ថែរក្សាសុខភាពឱ្យល្អ ខិតខំសិក្សារៀនសូត្រដើម្បីទទួលជោគជ័យនៅក្នុងការសិក្សា និងទទួលបានការងារដែលប្អូនៗប្រាថ្នាចង់បាននាពេលអនាគត៕
