បោះចោលទម្លាប់ចាស់ៗ រើសរុះរបស់របរចាស់ៗ ផ្លាស់ដោយការគិតថ្មី និងការរៀបចំជាថ្មី ទាំងនេះ ជាសកម្មភាពដ៏ពេញនិយម ដើម្បីអបអរឆ្នាំថ្មី ឬការចាប់ផ្តើមឆ្នាំថ្មី ក្នុងការពន្លឿនភាពរីកចម្រើន។ ហើយដើម្បីភាពរីកចម្រើនទៀតសោធ គេមិនមែនប្តូរតែរបស់របប្រើប្រាស់ ឬសម្ភារៈថ្មីនោះទេ គឺត្រូវការផ្លាស់ប្តូរទម្លាប់មិនល្អ មានរបៀបរស់នៅល្អ និងការគិតវិជ្ជមាន ទាំងនេះគឺជាចំណែកសំខាន់ ពាក់ព័ន្ធនឹងការអភិវឌ្ឍខ្លួនឯង ព្រោះបានជួយគាំពារទៅដល់សុខភាពផ្លូវចិត្ត។ យ៉ាងណា ដើម្បីស្ថិរភាពនៃការផ្លាស់ប្តូរទម្លាប់ល្អសម្រាប់ឆ្នាំថ្មី គេហទំព័រ HER ​AGENDA បានប្រាប់ពីសកម្មភាព ៥ចំណុច ដើម្បីដោះលែងចិត្តឱ្យមានភាពធូរស្រាល មុនពេលចាប់ផ្តើមឆ្នាំថ្មី។

១. ដោះលែងភាពតានតឹង ៖ ការរំសាយភាពតានតឹង ការជម្រះចិត្តឱ្យស្រឡះ ជួយឱ្យការគិតមានភាពស្រឡះដូចគ្នា។ ក្រៅពីនោះ គួរទុកចន្លោះពីការងារ ដើម្បីមានពេលឆ្លុះបញ្ចាំងខ្លួនឯង ទៅកន្លែងដែលមានធម្មជាតិដើម្បីបន្ធូរបន្ថយអាការតានតឹង។

២. សមាធិចិត្ត ៖ អប់រំចិត្តខ្លួនឯងតាមរយៈការទៅទីកន្លែងមានខ្យល់បរិសុទ្ធដកដង្ហើម ដោយការអង្គុយ ឬដេកក្នុងទីធ្លាដែលសុវត្ថិភាព និងស្ងប់ស្ងាត់ ដើម្បីផ្តោតចំពោះការគិតខ្លួនឯងឱ្យកាន់តែមានប្រសិទ្ធភាព និងកាត់បន្ថយភាពច្របូកច្របល់។

៣. កាត់បន្ថយទំនាក់ទំនងគ្មានផាសុកភាព ៖ ដើម្បីទទួលបានទំនាក់ទំនងមួយ មានគុណភាព គឺត្រូវរកឱ្យឃើញថា តើឥរិយាបថក្នុងទំនាក់ទំនងដែលគ្មានផាសុកភាពគឺជាអ្វី? បន្ទាប់ពីរកឃើញហើយ ត្រូវកត់សម្គាល់ពីដំណោះស្រាយដើម្បីជៀសវាង និងការដាក់ដែនកំណត់ចំពោះទំនាក់ទំនងមិនល្អ។ ការប្រាស្រ័យទាក់ទង ត្រូវរួមបញ្ចូលនូវការគោរព ការយល់ និងរក្សាបច្ចុប្បន្នភាពសុខទុក្ខគ្នាឱ្យបានទៀងទាត់។

៤. ប្រមូលឥវ៉ាន់ដែលមិនចាំបាច់ចេញពីកន្លែងរស់នៅ ៖ ឆ្នាំថ្មី គួរតែមានអ្វីថ្មីៗ សូម្បីការរៀបចំគេហដ្ឋានសម្រាប់នៅក៏ដូចគ្នាដែរ ប៉ុន្តែហេតុអ្វីត្រូវរុះរើសរបស់ចាស់ៗចោល? ការរុះរើនេះ បានរួមចំណែកដល់ភាពងាយស្រួលក្នុងការរៀបចំថ្មីៗ និងការកែលម្អសោភ័ណភាពផ្ទះឡើងវិញ។

៥. រក្សាទូរស័ព្ទនូវមួយឡែក ៖ ខួរក្បាលពុំអាចសម្រាកបានទេ ប្រសិនបើដៃនៅតែកាន់ទូរស័ព្ទជាប់រហូត ការសម្រាកពីស្គ្រីនទូរស័ព្ទ ឬអេក្រង់ជំរុញឱ្យផ្តោតទៅលើសកម្មភាពផ្សេងៗបានពេញលេញ និងការគ្រប់គ្រងពេលវេលា មានប្រសិទ្ធភាព៕