រដូវកាលចូលឆ្នាំប្រពៃណីខ្មែរ ជាឱកាសដ៏ពិសេសដែលប្រជាជនកម្ពុជា និងប្រទេសដទៃទៀតនៅតំបន់អាស៊ីអាគ្នេយ៍ដូចជា មីយ៉ាន់ម៉ា ឡាវ និងថៃ អាចជួបជុំ គ្រួសារ ញាតិមិត្ត បងប្អូន និងមិត្តភក្តិ ដើម្បីអបអរទទួលទេវតាឆ្នាំថ្មី។ វេលានេះបង្កើតឱ្យមានសកម្មភាពរីករាយជាច្រើនដូចជា ការយកចង្ហាន់ទៅវត្ត លេងល្បែងប្រជាប្រិយ ការធ្វើដំណើរកម្សាន្ត ការញ៉ាំអាហារឆ្ងាញ់ៗ និងទទួលទានស្រាជាដើម។

ទន្ទឹមនឹងនេះ នៅក្នុងថ្ងៃចូលឆ្នាំ គឺពេលវេលាស្ថិត​នៅ​ក្នុងរដូវក្តៅ ហេតុនេះ មាន​ពលរដ្ឋមួយ​ចំនួនបានជ្រើសរើស​ទទួលទានភេសជ្ជៈត្រជាក់ៗ ដូចជាស្រាបៀ ឬស្រាជាដើម ដោយគិតថា វាធ្វើឱ្យមានអារម្មណ៍ស្រស់ស្រាយ និងបង្កើតបរិយាកាសរីករាយក្នុងពេលជួបជុំ ។ យ៉ាងណាមិញ ការទទួលទានភេសជ្ជៈមានជាតិអាល់កុល ខណៈអាកាសធាតុកំពុងក្ដៅខ្លាំងដូចបច្ចុប្បន្ន គួរតែត្រូវធ្វើដោយមានទំនួសខុសត្រូវ ស្ថិតក្នុងបរិមាណដែលអាចគ្រប់គ្រងបាន និងបម្រុងប្រយ័ត្នខ្ពស់ ដើម្បីជៀសវៀងវិបត្តិ និងគ្រោះថ្នាក់ដែលអាចកើតឡើងដោយចៃដន្យ។

យោងតាមការស្រាវជ្រាវរបស់ UnityPoint Health បង្ហាញថា ការទទួលទានស្រា ខណៈពេលអាកាសធាតុកំពុងក្ដៅខ្លាំង អាចបង្កជាហានិភ័យចំនួន ៣សំខាន់ៗចំពោះសុខភាព៖

១. ដាច់សរសៃរឈាមខួរក្បាល (Heat Stroke)៖ ការរួមបញ្ចូលគ្នារវាងជាតិអាល់កុល និងអាកាសធាតុក្ដៅ នឹងធ្វើឱ្យសីតុណ្ហភាពក្នុងរាងកាយប្រែប្រួល និងពិបាកគ្រប់គ្រងរហូតដល់ដាច់សរសៃរឈាមក្នុងខួរក្បាលតែម្ដង។ ដំណាក់កាលដំ​បូង អ្នកអាចជួបបញ្ហារមួលក្រពើ ដោយសារការបាត់បង់ជាតិអាល់កាឡាំង និងសូដ្យូមក្នុងខ្លួន ។ បន្ទាប់មក វានឹងធ្វើឱ្យអ្នកខ្សោះខ្លួន និងអស់កម្លាំង ដោយសារកង្វះជាតិទឹក។ នៅដំណាក់កាលចុងក្រោយ អ្នកអាចដាច់សរសៃឈាមខួរក្បាល ដោយសារកម្ដៅក្ដៅខ្លាំងទាំងក្នុង និងក្រៅរាងកាយ។

២. កង្វះជាតិទឹក (Dehydration)៖ ឥទ្ធិពលនៃកម្ដៅព្រះអាទិត្យ និងជាតិអាល់កុល គឺបង្កើតឱ្យមានបញ្ហាកង្វះជាតិទឹកក្នុងរាងកាយ។ ការញ៉ាំជាតិអាល់កុលនឹងធ្វើឱ្យអ្នកនោមញឹក ចំណែកព្រះអាទិត្យធ្វើឱ្យអ្នកបែកញើស ដើម្បីទប់ទល់នឹងភាពក្ដៅនៃបរិយាកាសខាងក្រៅ។ ម្ល៉ោះហើយ ប្រសិនបើអ្នកទទួលទានស្រាក្រោមកម្ដៅថ្ងៃ អ្នកនឹងបាត់បង់ជាតិទឹកលឿនជាងមុន ២ដង។

៣. សរសៃរឈាមរីកធំ (Dilated Blood Vessels)៖ ការឈរ ឬផឹកស្រាក្រោមសីតុណ្ហភាពក្ដៅខ្លាំង អាចធ្វើឱ្យអ្នកដួលសន្លប់ភ្លាមៗបាន។ បន្ទាប់ពីចំណាយពេលនៅក្រោមពន្លឺថ្ងៃ រាងកាយរបស់អ្នកនឹងចាប់ផ្ដើមឡើងកម្ដៅ ហើយសរសៃរឈាមរបស់អ្នកនឹងចាប់ផ្ដើមរីកធំជាងមុន ដែលបង្កឱ្យអ្នកងាយដួលសន្លប់ ឬដាច់ខ្យល់តែម្ដង ប្រសិនបើរាងកាយខ្វះជាតិទឹកខ្លាំង។

សរុបមក ការអបអរក្នុងឱកាសពិសេសៗក្នុងការរស់នៅ ជាពិសេសពិធីបុណ្យចូលឆ្នាំខ្មែរ ជាទង្វើដែលយើងទាំងអស់គ្នាគួរធ្វើ។ យ៉ាងណាមិញ ទន្ទឹមនឹងភាពរីករាយ យើងក៏ត្រូវមានការប្រុងប្រយ័ត្ន និងមានទំនួសខុសត្រូវខ្ពស់ចំពោះសកម្មភាពខ្លួនឯងផងដែរ។ ជាពិសេស គឺការទទួលទានស្រាតែម្ដង ដែលយើងគួរទទួលទានក្នុងបរិមាណមួយដែលអាចគ្រប់គ្រងខ្លួនឯងបាន និងគួរជៀសវៀងការទទួលទានក្រោមអាកាសធាតុក្ដៅខ្លាំង ព្រោះវាអាចបង្កឱ្យមានបញ្ហា ដាច់សរសៃឈាមខួរក្បាល កង្វះជាតិទឹកក្នុងរាងកាយ និងសរសៃរឈាមរីកធំជាដើម៕