“គ្មាននរណាអាចគិតពីយើង ជាងយើងគិតពីខ្លួនឯងនោះទេ ! រីឯសុខភាពផ្លូវចិត្តរបស់យើងម្នាក់ៗក៏ដូច្នេះដែរ ព្រោះគ្មាននរណាម្នាក់អាចជួយឱ្យសុខភាពផ្លូវចិត្តរបស់យើងល្អប្រសើរជាងយើងខ្លួនឯងឡើយ” ។ នេះជាពុំនោលមួយបង្ហាញពីសារៈសំខាន់ នៃសុខភាពផ្លូវចិត្ត កើតចេញពីការគ្រប់គ្រងចិត្តខ្លួនឯងបានត្រឹមត្រូវ ។ តាមការចុះផ្សាយរបស់ weforum បានបង្ហាញបន្តថា ការអភិវឌ្ឍន៍គំនិតវិជ្ជមានជាប្រចាំជួយឱ្យបុគ្គលគ្រប់គ្រងស្ថានភាពផ្លូវចិត្តរឹងមាំ ។

១. បង្កើតគំនិតវិជ្ជមាន ៖ វាអាចជារឿងងាយស្រួល ប្រសិនបើគ្រាន់តែនិយាយថា “គិតវិជ្ជមាន” តែវាអាចជារឿងលំបាកនៅពេលអនុវត្តគំនិតវិជ្ជមានទាំងនោះ ។ ការបង្កើតគំនិតវិជ្ជមានអាចជួយឱ្យមនុស្សមើលវិជ្ជមានគ្រប់ទិដ្ឋភាពដែលខ្លួនបានជួប ។ គុណសម្បត្តិនៃការបង្កើតគំនិតវិជ្ជមានធ្វើឱ្យមនុស្សមើលឃើញឧបសគ្គតិចបំផុត ហើយពេលខ្លះអាចចាត់ទុកឧបសគ្គជាឱកាសសម្រាប់ខ្លួនទៅវិញ ។ ការបង្កើតគំនិតវិជ្ជមានជួយដល់សុខុមាលភាពផ្លូវចិត្តយ៉ាងខ្លាំង ។   

២. ស្គាល់ពីសមត្ថភាពផ្ទាល់ខ្លួន ៖ ស្គាល់ច្បាស់ពីខ្លួនឯងនឹងជួយឱ្យបុគ្គលរៀបចំដំណើរការគិតរបស់ខ្លួនស្របតាមលំដាប់លំដោយ មានន័យថា ខ្លួនឯងដឹងច្បាស់ពីសមត្ថភាពផ្ទាល់ខ្លួន ព្រមទាំងស្គាល់ពីចំណុចខ្លាំង និងចំណុចខ្សោយរបស់ខ្លួន ។ បុគ្គលស្គាល់ច្បាស់ពីខ្លួនឯងនឹងឱ្យសុខភាពផ្លូវចិត្តមានថាមពលផ្លូវចិត្តជានិច្ច ។

៣. ជីវិតមានគោលដៅជីវិតច្បាស់លាស់ ៖ គោលដៅជីវិតសំខាន់ខ្លាំងណាស់សម្រាប់យុវជន ។ ដើម្បីសម្រេចគោលដៅអ្វីមួយ មិនមែនជារឿងងាយស្រួលឡើយ ហើយពេលខ្លះទម្រាំសម្រេចគោលដៅ មនុស្សអាចនឹងជួបរឿងស្មុគស្មាញជាច្រើនក្នុងដំណើរជីវិត ។

គោលដៅរបស់មនុស្សម្នាក់ៗអាចមានគោលដៅរយៈពេលខ្លី និងគោលដៅរយៈពេលវែង ។ កាលៈទេសៈខ្លះ តាមរយៈរឿងរ៉ាវស្មុគស្មាញ អាចធ្វើឱ្យមនុស្សវង្វេងគោលដៅ ហើយសុខភាពផ្លូវចិត្តក៏ចុះថយជាលំដាប់ ។ ដូច្នេះការកំណត់គោលដៅច្បាស់លាស់នឹងជួយដល់សុខភាពផ្លូវចិត្តផ្ទាល់ខ្លួន និងមិនព្រមបោះបង់បំណងប្រាថ្នារបស់ខ្លួន ។

៤. ក្លាហានសុំជំនួយគំនិតអ្នកដទៃ ៖ កុំមានចិត្តរារែកឱ្យសោះ ប្រសិនបើមានបំណងសុំជំនួយពីអ្នកដទៃ រាល់ពេលដែលអ្នកមានបញ្ហា ឬត្រូវការជំនួយគាំទ្រការសម្រេចចិត្ត ។ ការសុំជំនួយពីអ្នកដទៃជារឿងល្អបំផុត ខណៈសម្ពាធផ្លូវចិត្ត ឬដោះស្រាយបញ្ហាអ្វីមួយមិនចេញ ។

សម្ពាធផ្លូវចិត្តនឹងធ្វើឱ្យមនុស្សមានវិបត្តិផ្លូវចិត្តកាន់តែធ្ងន់ធ្ងរ (ស្ត្រេស) ព្រមទាំងអាចបង្កើតឱ្យមានជំងឺផ្លូវចិត្ត ។ សុំជំនួយ គឺសុំគំនិតពីអ្នកដទៃមកបូកផ្សំនិងគំនិតផ្ទាល់ខ្លួនដើម្បីដោះស្រាយបញ្ហា មិនមែនមានន័យថា អ្នកជាមនុស្សអន់ថយប្រាជ្ញាស្មារតីឡើយ ។ 

ជារួមមកវិញ សុខភាពផ្លូវចិត្តរបស់មនុស្សម្នាក់ៗ មានតែបុគ្គលខ្លួនឯងផ្ទាល់តែប៉ុណ្ណោះអាចគ្រប់គ្រង អ្នកដឹកនាំ និងដោះស្រាយ ។ បើទោះបីអ្នកជំនាញសុខភាពផ្លូវចិត្តក៏អះអាងដែរថា ការផ្តល់ប្រឹក្សាសុខភាពផ្លូវចិត្តគ្រាន់តែជាការស្តាប់ និងផ្តល់ដំណោះស្រាយសមស្របសម្រាប់បុគ្គលតែប៉ុណ្ណោះ ប៉ុន្តែចំណុចសំខាន់បំផុតគឺបុគ្គលខ្លួនឯងទទួលស្គាល់បញ្ហារបស់ខ្លួន ព្រមទាំងដោះស្រាយបញ្ហាអ្វីមួយទៅតាមដំណាក់កាលនីមួយៗ ៕