ជារៀងរាល់ឆ្នាំ យុវជនជាច្រើនបានសម្រេចចិត្តបន្តការសិក្សានៅថ្នាក់ឧត្តមសិក្សា ហើយការសម្រេចចិត្តនេះ គឺជារបត់ដ៏ធំមួយក្នុងជីវិត ដែលពួកគេត្រូវប្រាកដក្នុងចិត្តថា ពួកគេពិតជាបានសម្រេចចិត្តត្រឹមត្រូវ ។ នៅក្នុងអត្ថបទននេះ យើងនឹងបង្ហាញជាសំណួរសំខាន់ៗចំនួន ៤ ដែលយុវជនត្រូវសួរខ្លួនឯងសិន មុនសម្រេចចិត្ត ដាក់ពាក្យចូលរៀនសាកលវិទ្យាល័យ។

១. តើគួរចាប់ផ្ដើមរៀននៅពេលណា?

សម្រាប់ការសិក្សាថ្នាក់បរិញ្ញាបត្រ មានយុវជនជាច្រើនបានសម្រេចចិត្តបន្តការសិក្សានៅសាកលវិទ្យាល័យភ្លាមៗបន្ទាប់ពីបញ្ចប់ថ្នាក់មធ្យមសិក្សា។ ប៉ុន្តែមានយុវជនមួយចំនួនទៀត បានសម្រេចចិត្តពន្យាពេលមួយឆ្នាំ ឬច្រើនជាងនេះ មុននឹងចាប់ផ្ដើមថ្នាក់មហាវិទ្យាល័យ។

ប្រសិនបើអ្នកសម្រេចចិត្តបន្តការសិក្សាភ្លាមៗតែម្ដង អ្នកនឹងមិនបានសម្រាក ហើយត្រឡប់ទៅរៀនវិញនោះទេ។ លើសពីនេះ អ្នកដែលបានសិក្សាពីការសិក្សាច្រើនតែពិបាកត្រឡប់ទៅបន្តការសិក្សាវិញ ព្រោះពិបាកដាក់វិន័យលើខ្លួនឯង និងកង្វះកម្លាំងជំរុញទឹកចិត្ត។ ម្យ៉ាង ការបន្តការសិក្សាភ្លាមៗក៏ចំណេញពេលវេលាផងដែរ។

យ៉ាងណាក៏ដោយ ប្រសិនបើអ្នកចំណាយពេលមួយឆ្នាំ ឬលើសនេះ សម្រាកពីការសិក្សា ដើម្បីធ្វើការ អ្នកនឹងទទួលបានប្រាក់ចំណូលបន្ថែម ហើយក្នុងករណីដែលអ្នកអាចសន្សំប្រាក់បានអំឡុងពេលធ្វើការ អ្នកនឹងមានស្ថេរភាពហិរញ្ញវត្ថុ នៅពេលដែលអ្នកត្រឡប់មកបន្តការសិក្សាឡើងវិញ។ លើសពីនេះ អ្នកក៏អាចចំណាយពេលមួយឆ្នាំ ឬពីរឆ្នាំ ដើម្បីស្វែងយល់ពីចំណង់ចំណូលចិត្តខ្លួនឯង និងការងារដែលខ្លួនឯងស្រឡាញ់ ជំនាញដែលខ្លួនឯងចង់រៀនពិត​ប្រាកដ និងសាកលវិទ្យាល័យដែលស័ក្តិសមសម្រាប់ការសិក្សា។ នៅពេលដែលរកឃើញចំណង់ចំណូលចិត្តខ្លួនឯងច្បាស់ អ្នកនឹងមានកម្លាំងជំរុញទឹកចិត្តខ្លួនសម្រាប់ការសិក្សា និងមានអត្រាជោគជ័យខ្ពស់។

២. តើគួរសិក្សានៅឯណា?

ការសម្រេចចិត្តជ្រើសរើសសាកលវិទ្យាល័យសិក្សាក៏មានឥទ្ធិពលខ្លាំងផងដែរមកលើការសិក្សា និងអនាគតរបស់អ្នក។ អ្វីដែលយើងត្រូវដឹងនោះគឺ សាកលវិទ្យាល័យ និងសញ្ញាបត្រទាំងអស់មានអត្ថប្រយោជន៍មិនស្មើគ្នានោះទេ។ វគ្គសិក្សា និងសាកលវិទ្យាល័យមួយចំនួន មានកិត្តិនាម និងកិត្យានុភាពជាងកន្លែងមួយចំនួនទៀតឆ្ងាយណាស់ ហើយសញ្ញាបត្រដែលទទួលបានពីសាលាល្បី នឹងអាចជួយអ្នកបានច្រើនក្រោយពីបញ្ចប់ការសិក្សា។ មួយវិញទៀត ក្រៅពីកិត្តិនាម សាកលវិទ្យាល័យ ក៏គួរតែជាកន្លែង ដែលអ្នកគិតថាស័ក្តិសមចំពោះសមត្ថភាព គោលដៅ និងមិនឆ្ងាយពីកន្លែងស្នាក់នៅរបស់អ្នកផងដែរ។

៣. តើគួររៀនជំនាញអ្វី?

ការជ្រើសរើសជំនាញសិក្សា គឺជាចំណុចសំខាន់ ដែលទាមទារឱ្យមានការសម្រេចចិត្តឱ្យបានច្បាស់លាស់ ព្រោះវាជាប់ទាក់ទងទៅនឹងចំណង់ចំណូលចិត្ត គម្រោងសម្រាប់ថ្ងៃអនាគត ទីតាំង និងតម្លៃ ដែលអ្នកត្រូវចំណាយ ។ មានអាជីពមួយចំនួនទាមទារសញ្ញាបត្រជាសំខាន់ ដូចជា ជំនាញវេជ្ជសាស្ត្រ និងវិទ្យាសាស្ត្រជាដើម ខណៈអាជីពមួយចំនួនទៀត មិនផ្ដោតលើសញ្ញាបត្រតែមួយមុខនោះទេ។ អ្នកអាចចាប់យកអាជីព ដែលមានលក្ខណៈស្រដៀងគ្នាទៅនឹងអ្វី ដែលអ្នកទទួលបានសាកលវិទ្យាល័យ។

៤. តើរៀនដោយរបៀបណា?

ពេលវេលាសិក្សាក៏ជាចំណុចមួយដែលគួរគិតគូឱ្យបានល្អិតល្អន់ដូចគ្នា។ អ្នកអាចរៀនថ្នាក់ពេញម៉ោង ថ្នាក់ក្រៅម៉ោង រៀនដោយផ្ទាល់ក្នុងថ្នាក់ រៀនតាម​អនឡាញ ឬរៀនតាមកញ្ចប់មេរៀនជាដើម។ ខណៈរបៀបរៀននីមួយៗសុទ្ធតែមានគុណសម្បត្តិ និងគុណវិបត្តិ ប៉ុន្តែអ្នកអាចជ្រើសរៀនរបៀបរៀន ដែលស្របទៅតាមស្ថានភាពជាក់ស្ដែងរបស់អ្នក។ អ្វីដែលសំខាន់នោះគឺ អ្នកត្រូវប្រាកដថា ក្រោយបញ្ចប់ការសិក្សា អ្នកអាចទទួលបានចំណេះ ជំនាញពិតប្រាកដ ដើម្បីអាចបំពេញការងារក្នុងសង្គមបាន៕