ការមានវិន័យផ្ទាល់ខ្លួន ឬ Personal Discipline នឹងជួយ​ឱ្យ​បុគ្គល​មានការ​គោរព​គោលដៅ គ្រប់គ្រងពេលវេលាបានល្អ អាចគ្រប់គ្រងអារម្មណ៍ ហើយ​ជាពិសេស​វិន័យផ្ទាល់ខ្លួនគឺសំខាន់សម្រាប់​ការ​អភិវឌ្ឍន៍ខ្លួន​ឯង។ យ៉ាងណាដើម្បីឱ្យមានវិន័យផ្ទាល់ខ្លួន គឺបុគ្គលត្រូវការការលះបង់ខ្ពស់ និងចេះឆ្លុះបញ្ចាំងដើម្បីរៀនសូត្រអំពីកំហុសដែលកើតមាននាអតីតកាល ហើយកូនសោរដ៏សំខាន់ក្នុងការដោះស្រាយបញ្ហានេះ គឺ ចាប់ផ្តើមពីចំណុចសាមញ្ញៗ ដោយ​ដោះស្រាយ​ឧបសគ្គដែលជួបប្រទះបន្តិចម្តងៗ រួមទាំងរក្សាភាពអត់ធ្មត់កំឡុងពេលអនុវត្តន៍ដំណើរការ។

ហេតុអ្វីមនុស្សមួយចំនួនពិបាកក្នុងការរក្សាវិន័យ?

ជួបឧបសគ្គកំឡុងពេលពង្រឹងខ្លួនឯងឱ្យមានវិន័យ ជាអ្វីដែលមនុស្សភាគច្រើនបានជួបប្រទះ ដែលក្នុងនោះមានហេតុផលផ្សេងៗគ្នាទៅតាមបទពិសោធន៍នៃមនុស្សម្នាក់ៗ។ វាក៏អាចបណ្តាលមកពី កាលដែលមិនមានគោលដៅជាក់លាក់ បាត់បង់ការជំរុញទឹកចិត្ត ខ្វះជំនាញក្នុងការគ្រប់គ្រងពេលវេលា របៀបរស់នៅប្រចាំថ្ងៃមិនមានទម្លាប់ល្អ ឬក៏មានបញ្ហាសុខភាពផ្លូវចិត្ត។ យ៉ាងណាមិញប្រសិនបើអ្នកព្យាយាមស្វះស្វែងផ្លាស់ប្តូរ ទៅរកភាពល្អប្រសើរ នោះអ្វីៗប្រាកដជាមានភាពវិជ្ជមាន ជាពិសេសគឺការរក្សាវិន័យផ្ទាល់ខ្លួនក្នុងកម្រិតខ្ពស់ ។

ធ្វើដូចម្តេចដើម្បីបញ្ចៀសភាពខ្ចិលច្រអូសជំនួសដោយការមានវិន័យ?

ជំនះនូវភាពខ្ជិលច្រអូស ផ្តើមចេញពីបុគ្គលផ្ទាល់ខ្លួនជាមុនសិន ត្រូវស្វែងរកឱ្យឃើញនូវកត្តាដែលនាំឱ្យការជំរុញចិត្ត និងការចាត់ចែងសកម្មភាពសំខាន់ៗ។ ជាដំបូងរកឱ្យឃើញនូវដើមចម ថាហេតុអ្វីបានជាបណ្តាលឱ្យទម្លាប់ខ្ចិល និងពន្យារពេលកើតឡើងជាប្រចាំ បន្ទាប់មកសិក្សាពីគន្លឹះកំចាត់ចោលនូវបញ្ហាទាំងនោះ រួមទាំងប្តេជ្ញាចិត្តអនុវត្តន៍ជានិច្ច។

រក្សាវិន័យផ្ទាល់ខ្លួនក្នុងកម្រិតខ្ពស់

ជាដំបូងត្រូវកំណត់យុទ្ធសាស្រ្តឱ្យបានជាក់លាក់ទើបអាចអភិវឌ្ឍន៍ការពង្រឹងវិន័យផ្ទាល់ខ្លួនក្នុងកម្រិតមួយដែលខ្ពស់។ រចនាបរិយាកាសមួយដែលល្អសម្រាប់ធ្វើការ និងកាត់បន្ថយការរំខាន។ គ្រប់គ្រងប្រភេទការងារដោយបំបែកឱ្យតូចៗ ងាយស្រួលអនុវត្តន៍ ផ្ទៀងផ្ទាត់ការងារ និងត្រួតពិនិត្យឱ្យបានជាក់លាក់ ។ រួមទាំងរក្សាសុខភាពផ្លូវចិត្តបន្ថែមតាមរយៈ ការសមាធិ រក្សាចិត្តឱ្យស្ងប់ ព្យាយាមកាត់បន្ថយអាការៈអន្ទះសា ឬក៏ការទៅប្រឹក្សាផ្ទាល់ជាមួយអ្នកជំនាញ៕