ក្រុមហ៊ុន អប្សរា មេឌា សឺវីស ឯ.ក (AMS) និង​មជ្ឈមណ្ឌល​កម្ពុជា ៤.០ នៅព្រឹកថ្ងៃទី២១ ខែតុលានេះ បានចុះអនុស្សរណៈ នៃការយោគយល់គ្នាស្តីពីភាពជាដៃគូក្នុងការផលិត និងផ្សព្វផ្សាយ គម្រោង «ប្រជាជនសកល» និងការពង្រឹងកិច្ចសហប្រតិបត្តិការ ក្រោមអធិបតីភាព ឯកឧត្តម ណេប​ សាមុត សមាជិកក្រុមប្រឹក្សាភិបាលនៃមជ្ឈមណ្ឌលកម្ពុជា ៤.០ ជាតំណាងដ៏ខ្ពង់ខ្ពស់ ឯកឧត្តម ហ៊ុន ម៉ានី ប្រធានក្រុមប្រឹក្សាភិបាលនៃមជ្ឈមណ្ឌលកម្ពុជា ៤.០  និង លោក លឹម ឃុនស្រ៊ុន អគ្គនាយកនៃក្រុមហ៊ុន អប្សរា មេឌា សឺវីស ឯ.ក។

គោលបំណងនៃការចុះអនុស្សរណៈនៃការយោគយល់គ្នានេះ គឺដើម្បីពង្រឹងកិច្ចសហការរវាងស្ថាប័នទាំងពីរ ក៏ដូចជាការប្រកាសជាផ្លូវការពីការចាប់ផ្តើមកិច្ចសហប្រតិបត្តិការក្នុងការផលិត និងផ្សព្វផ្សាយរួមគ្នានូវគម្រោង «ប្រជាជនសកល» ដែលនឹងបានជាប្រយោជន៍ដល់សង្គមសេដ្ឋកិច្ចកម្ពុជា តាមរយៈការផ្តល់ព័ត៌មាននិងចំណេះដឹងទូទៅអំពីការវិវត្ត និងការរីកចម្រើននៃបច្ចេកវិទ្យាឌីជីថលដល់ប្រជាពលរដ្ឋ ជាពិសេសយុវជនកម្ពុជា ដើម្បីអភិវឌ្ឍន៍សមត្ថភាពឱ្យក្លាយជាធនធាន ដែលមានសមត្ថភាព និងចំណេះដឹងសកល។

ផ្អែកតាមខ្លឹមសារអនុស្សរណៈនៃការយោគយល់គ្នា ស្ថាប័នទាំងពីរនឹងធ្វើការរួមគ្នាក្នុងការផលិត និងផ្សព្វផ្សាយនូវមាតិកានានា ក្រោមគម្រោង «ប្រជាជនសកល» ដូចជា៖ ទី១). កម្មវិធី «ឧស្សាហកម្ម ៤.០», ទី២). កម្មវិធី «អក្ខរថិក-Digital Literacy», និងទី៣). ការផលិតមាតិកាផ្សេងៗទៀតក្រោមមូលបទ «ប្រជាជនសកល»។

នាឱកាសនោះ ឯកឧត្តម ណេប សាមុត បានសម្ដែងការសាទរចំពោះកិច្ចសហការថ្មីរវាងស្ថាប័នទាំងពីរ និងបានរំលេចនូវចក្ខុវិស័យ ក៏ដូចជាបេសកកម្មរបស់មជ្ឈមណ្ឌលកម្ពុជា ៤.០ រួមជាមួយសកម្មភាពដែលស្ថាប័នទាំងពីរនឹងត្រូវអនុវត្តរួមគ្នាក្រោមអនុស្សរណៈនៃការយោគយល់គ្នា ក្នុងការជំរុញការផ្សព្វផ្សាយអំពីបច្ចេកវិទ្យាឌីជីថល ដើម្បីឱ្យសាធារណជន ជាពិសេសយុវជន បានទទួលព័ត៌មាន និងយល់ដឹងកាន់តែច្រើនពីដំណើរវិវត្តន៍នៃបច្ចេកវិទ្យាឌីជីថលថ្មីៗ, អាចសម្របខ្លួនបានទាន់ពេលវេលាទៅតាមការផ្លាស់ប្តូរនៃបច្ចេកវិទ្យា, អាចទាញយកផលប្រយោជន៍ជាអតិបរមាពីការប្រើប្រាស់បច្ចេកវិទ្យា និងអាចអភិវឌ្ឍន៍សមត្ថភាពឱ្យក្លាយជាធនធានដែលមានសក្ដានុពលនៅកម្ពុជា។ ឯកឧត្តម ក៏បានបន្ថែមផងដែរថា នេះគឺជាឱកាសដ៏ល្អមួយសម្រាប់មជ្ឈមណ្ឌលកម្ពុជា ៤.០ ក្នុងការពង្រីកខ្លួនបន្ថែម និងទទួលបាននូវបទពិសោធថ្មីបន្ថែមទៀតលើការផ្សព្វផ្សាយឌីជីថល តាមរយៈការធ្វើការជាមួយក្រុមហ៊ុន អប្សរា មេឌា សឺវីស ឯ.ក ដែលជាបណ្តាញផ្សព្វផ្សាយដ៏មានសក្តានុពលមួយនាពេលបច្ចុប្បន្ន។

ជាមួយគ្នានោះដែរ លោក លឹម ឃុនស្រ៊ុន ក៏បានមានប្រសាសន៍ថា ការចាប់ដៃគ្នារវាងក្រុមហ៊ុន អប្សរា មេឌា សឺវីស ឯ.ក ជាមួយមជ្ឈមណ្ឌលកម្ពុជា ៤.០ នៅថ្ងៃនេះគឺជាកិច្ចសហការផលិត និងផ្សព្វផ្សាយកម្មវិធីទូរទស្សន៍ក្រោមគម្រោង «ប្រជាជនសកល» ។ កម្មវិធីនេះមានគោលបំណងបង្ហាញអំពីដំណើរការវិវត្តនៃសកលលោក ជាពិសេសលើវិស័យសេដ្ឋកិច្ច សង្គមឌីជីថល បច្ចេកវិទ្យា ដើម្បីឆ្លុះបញ្ចាំងអំពីវិធីនៃការចូលរួមរបស់ប្រជាជនកម្ពុជា ជាពិសេសស្រទាប់យុវវ័យ ក្នុងការក្តោបយកឱកាសអភិវឌ្ឍន៍ខ្លួននៅក្នុងសម័យឌីជីថលភាវូបនីយកម្មនេះ។ លោកក៏បានបង្ហាញពីក្តីរំពឹងថា កិច្ចសហការនេះនឹងជំរុញភាពខ្លាំងនៃស្ថាប័នទាំងពីរ បំពេញបន្ថែមឱ្យគ្នាទៅវិញទៅមក និងផលិតបាននូវមាតិកាដែលពោរពេញដោយគុណភាព និងគុណតម្លៃ។

សូមបញ្ជាក់ផងដែរថា កិច្ចសហប្រតិបត្តិការរវាងក្រុមហ៊ុន អប្សរា មេឌា សឺវីស ឯ.ក និងមជ្ឈមណ្ឌលកម្ពុជា ៤.០ គឺជាការបើកទំព័រថ្មីមួយ ដែលនឹងអនុញ្ញាតឱ្យស្ថាប័នទាំងពីរធ្វើការជំរុញ និងពង្រីកកិច្ចសហការកាន់តែប្រសើរជាមួយស្មារតីសាមគ្គីភាព ក្នុងការសម្រេចបាននូវគោលដៅរួម គឺការជំរុញវិសាលភាពនៃការផ្សព្វផ្សាយមាតិកាឌីជីថលឱ្យបានកាន់តែធំទូលំទូលាយដល់សាធារណជនទូទៅ សំដៅរួមចំណែកដល់ការកសាង និងអភិវឌ្ឍន៍សេដ្ឋកិច្ច សង្គមឌីជីថល នៅកម្ពុជា៕