អាហារូបត្ថម្ភ គឺជាមូលដ្ឋានយ៉ាងសំខាន់ ដែលមានឥទ្ធិពលទៅលើខួរក្បាល និងរាងកាយ ក្នុងដំណើរការគ្រប់គ្រងភាពតានតឹង។ យោងតាម វេជ្ជបណ្ឌិត IAN K.SMITH ជាអ្នកជំនាញផ្នែកសុខភាពពោះវៀន បានឱ្យដឹងថា របបអាហារមានទំនាក់ទំនងយ៉ាងជិតស្និទ្ធទៅនឹងមីក្រូជីវសាស្ត្រពោះវៀនមនុស្ស។ ចំណែក សុខភាពពោះវៀនមានទំនាក់ទំនងទៅនឹងសមត្ថភាពរាងកាយក្នុងការគ្រប់គ្រងភាពតានតឹង។ ដូច្នេះ អ្នកជំនាញបានណែនាំឱ្យទទួលទាន អាហារ ៥ប្រភេទ ដែលជំនួយដល់សុខភាពពោះវៀន និងជួយគ្រប់គ្រងភាពតានតឹងបានយ៉ាងមានប្រសិទ្ធភាព។

១. ត្រីសាល់ម៉ុន និងប្រូតេអ៊ីនគ្មានខ្លាញ់សម្បូរ អូមេហ្គា-3 ៖ ត្រីសាម៉ុនជាអាហារដែលសម្បូរទៅដោយ អាស៊ីតខ្លាញ់អូមេហ្គា-3 (omega-3 fatty acid) ដែលចូលរួមចំណែកយ៉ាងសកម្ម ក្នុងការពង្រឹងសុខភាពខួរក្បាល និងកាត់បន្ថយភាពតានតឹង។ លើសពីនេះ លោកវេជ្ជបណ្ឌិតខាងលើ បានលើកឡើងថា ប្រូតេអ៊ីនគ្មានខ្លាញ់ ដូចជា​សាច់មាន់ ក៏មានអត្ថប្រយោជន៍ច្រើនដែរ ព្រោះអាមីណូអាស៊ីតដែលមានក្នុងសាច់ អាចធ្វើឱ្យអ្នកមានអារម្មណ៍ប្រសើរឡើង។ យ៉ាងណាមិញ ត្រូវជៀសវៀងការទទួលទានសាច់ ដែលមានជាតិខ្លាញ់ឆ្អែត។

២. ផ្លែឈើដែលមានជាតិសរសៃរ៖ យោងតាម វេជ្ជបណ្ឌិត Smith អាហារសរសៃរ គឺជាកត្តាជំរុញដ៏សំខាន់ ដែលនាំឱ្យកើតមានបាក់តេរីល្អក្នុងពោះវៀន។ លើសពីនេះ អាហារដែលសម្បូរជាតិសរសៃរ គឺងាយស្រួលរកទិញ ដែលយើងអាចស្វែងរកបាននៅគ្រប់ទីកន្លែង ហើយភាគច្រើនជាបន្លែ និងផ្លែឈើ។ ក្នុងនោះមានដូចជា គ្រាប់ធញ្ញជាតិ គ្រាប់ផ្លែឈើ សណ្ដែកសៀង ពោតលីង និងផ្លែប័ររីជាដើម។ យោងតាមគេហទំព័រ REAL SIMPLE បានឱ្យដឹងថា ផ្លែប័ររី ជាផ្លែឈើ ដែលមានផ្ទុកជាតិសរសៃរជាច្រើនជាងគេក្នុងចំណោមផ្លែឈើ។ លើសពីនេះ ផ្លែប័ររី ក៏ត្រូវបានគេដឹងថា អាចចូលរួមកាត់បន្ថយ អរម៉ូនកទីសូល និងអរម៉ូនស្ត្រេសផងដែរ។

៣. ផ្លែក្រូច៖ ក្រូច គឺជាផ្លែឈើមួយប្រភេទ ដែលសម្បូរទៅដោយ វីតាមីន C ដែលជាវីតាមីនដ៏សំខាន់មួយក្នុងដំណើរការពង្រឹងប្រព័ន្ធភាពស៊ាំ និងកាត់បន្ថយភាពតានតឹង។ យោងតាមការពិសោធន៍របស់ Science Alert ដែលបានឱ្យអ្នកស័្មគ្រចិត្តមួយក្រុម ធ្វើកិច្ចការដែលស្មុគស្មាញខ្លាំង បន្ទាប់ឱ្យស្ម័គ្រចិត្តទាំងអស់ទទួលទានផ្លែក្រូច ក្រោយពីទទួលទានបានមួយស្របក់ អ្នកទាំងអស់គ្នាក៏មានអារម្មណ៍ប្រសើរឡើង។

៤. សណ្ដែកសៀង ៖ អាហារមួយប្រភេទនេះ សម្បូរទៅដោយសារធាតុ Tryptophan ដែលសម្បូរទៅដោយអាមីណូអាស៊ីត ដែលមានតួនាទីយ៉ាងសំខាន់ក្នុងការតភ្ជាប់ពោះវៀន និងខួរក្បាល ព្រោះរាងកាយប្រើសារធាតុនេះ ដើម្បីជួយផលិតអរម៉ូន Serotonin ដែលមានតួនាទីរក្សាលំនឹងអារម្មណ៍ និងជាសារធាតុគីមីល្អក្នុងខួរក្បាល។

៥. សូកូឡាខ្មៅ ៖ សូកូឡាមានផ្ទុកសារធាតុ polyphenols ដែលជាសារធាតុប្រឆាំងអុកស៊ីតកម្មដ៏មានប្រសិទ្ធភាពព្រមទាំងធ្វើឱ្យប្រសើរឡើងនូវមុខងារខួរក្បាល និងអារម្មណ៍ ។ យ៉ាងណាមិញ វេជ្ជបណ្ឌិត Smith បានបញ្ជាក់ថា មិនមែនសូកូឡាដែលមានជាតិទឹកដោះគោនោះទេ ប៉ុន្តែជាសូកូឡាខ្មៅ៕