មនុស្សដែលភាពធន់ក្នុងការរស់នៅ ជាពាក្យមួយឃ្លា ដែលបង្ហាញថា អ្នកអាចសម្របខ្លួនទៅនឹងព្រឹត្តិការណ៍មិនល្អ ឬឧបសគ្គផ្សេងៗក្នុងជីវិត។ នៅពេលអ្នកក្លាយជាមនុស្សម្នាក់ ដែលមានភាពធន់ អ្នកអាចទាញយកកម្លាំងជំរុញពីខាងក្នុង ដែលអាចជួយឱ្យអ្នកងើបចេញពីភាពលំបាក ឬបញ្ហាប្រឈមធំៗ ដូចជា ការបាត់បង់ការងារ ជំងឺ គ្រោះថា្នក់ដោយចៃដន្យ ឬការបាត់បង់របស់ ឬមនុស្សជាទីស្រឡាញ់ជាដើម។ ផ្ទុយទៅវិញ ប្រសិនបើអ្នកជាមនុស្សខ្វះភាពធន់ អ្នកអាចនឹងជាប់គាំងក្នុងបញ្ហា ឬមានអារម្មណ៍ថា ដូចជាជនរងគ្រោះ ឬកើតទុក្ខ នៅពេលជួបវិបត្តិអ្វីមួយ។

នៅពេលក្លាយជាមនុស្សមានភាពធន់ មិនមែនមានន័យថា បញ្ហាទាំងអស់របស់អ្នក នឹងលែងមាននោះទេ។ ប៉ុន្តែភាពធន់ អាចជួយអ្នក ប្រឈមនឹងបញ្ហាទាំងនោះបានល្អ ហើយគ្រប់គ្រងភាពតានតឹងបានប្រសើរ។

ការសម្របខ្លួនទៅនឹងស្ថានការណ៍លំបាក

ភាពធន់ (Resilient) មានន័យថា អាចទប់ទល់នឹងស្ថានការណ៍តានតឹង ឬលំបាក។ នៅពេលដែលមានរឿងអាក្រក់កើតឡើង អ្នកនៅតែមានអារម្មណ៍ ខឹង កើតទុក្ខ ព្រួយបារម្ភ ឬឈឺចាប់ ប៉ុន្តែអ្នកអាចបន្តទៅមុខបាន ទាំងផ្លូវកាយ និងផ្លូវចិត្ត។ ក្នុងន័យនេះ មិនមែនមានន័យថា ភាពធន់ គឺជាការសម្ងំទ្រាំ ទប់ទល់នឹងភាពលំបាក ឬស្ថានការណ៍តានតឹងតែម្នាក់ឯងនោះទេ។ ការចេះស្វែងរកជំនួយពីអ្នកដទៃ ក៏ជាផ្នែកមួយនៃភាពធន់ផងដែរ។

ភាពធន់និងសុខភាពផ្លូវចិត្ត

ភាពធន់អាចជួយការពារអ្នកពីបញ្ហាផ្លូវចិត្តដូចជា ជំងឺធ្លាក់ទឹកចិត្ត និងការថប់បារម្ភ។ ភាពធន់ក៏អាចជួយអ្នកក្នុងការទប់ទល់នឹងហានិភ័យសុខភាពផ្លូវចិត្ត ដូចជា ការទទួលរងនូវការសម្លុត ឬធ្វើបាប និងការប៉ះទង្គិចផ្លូវចិត្ត ដែលអាចនាំឱ្យមិនសប្បាយចិត្តជាដើម។ លើសពីនេះ ការកសាងភាពធន់ ក៏អាចជួយឱ្យបញ្ហា ឬរបួសផ្លូវចិត្តរបស់អ្នក បានធូរស្បើយទៀតផង។

គន្លឹះបង្កើនភាពធន់ក្នុងការរស់នៅ

ប្រសិនបើអ្នកជាមនុស្សមិនទាន់មានភាពធន់ទេ អ្នកក៏អាចរៀនជំនាញនេះបានដែរ ដើម្បីកសាងគ្រឹះជីវិត ដែលមានលក្ខណៈរឹងមាំ និងមិនងាយទន់ទោរទៅតាមបញ្ហា។ មានគន្លឹះចំនួន ៦ ដែលអ្នកអាចអនុវត្តបាន៖​

១. រក្សាទំនាក់ទំនង ៖ ការកសាងទំនាក់ទំនងរឹងមាំ ជាមួយមនុស្សជាទីស្រឡាញ់ និងមិត្តភក្តិ អាចផ្ដល់ឱ្យអ្នកនូវការគាំទ្រ ដែលអ្នកត្រូវការ ព្រមទាំងការណែនាំ និងមតិល្អៗ នៅអំឡុងពេលតានតឹង។

២. មានផែនការជីវិត ៖ ចាប់ផ្ដើមធ្វើកិច្ចការ ឬរឿងអ្វីមួយ ដែលធ្វើឱ្យអ្នកមានអារម្មណ៍ថាជោគជ័យ និងមានគោលបំណងរស់នៅរាល់ថ្ងៃ។ ការកំណត់គោលដៅ និងផែនការសកម្មភាពរស់នៅច្បាស់លាស់ អាចជួយឱ្យអ្នកឆ្ពោះទៅរកផែនការអនាគត ដែលអ្នកចង់បាន និងធ្វើឱ្យការរស់នៅមានន័យជាងមុន។

៣. រៀនពីអតីតកាល ៖ គិតអំពីរបៀបដែលអ្នកអាចស៊ូទ្រាំនឹងបញ្ហា ដែលកើតលើជីវិតអ្នកកាលពីអតីតកាល។ បន្ទាប់មក គិតពីអ្វីដែលបានជួយអ្នកឱ្យឆ្លងកាត់ពេលវេលាលំបាកៗ ហើយរៀនអំពីបទពិសោធន៍ទាំងនោះ ដើម្បីជាកម្លាំងជំរុញឱ្យអ្នកបន្តដំណើរឆ្ពោះទៅរកអនាគត។

៤. មានក្តីសង្ឃឹម ៖ អ្នកមិនអាចផ្លាស់ប្តូរអតីតកាលបានទេ ប៉ុន្តែអ្នកអាចផ្លាស់ប្តូររបៀបគិត និងសកម្មភាពរបស់អ្នក ដើម្បីឆ្ពោះទៅរកអនាគត។ ការផ្ដល់ក្ដីសង្ឃឹមឱ្យខ្លួនឯង និងបើកចិត្តឱ្យទូលាយ អាចធ្វើឱ្យអ្នកងាយស្រួលសម្របខ្លួន និងប្រឈមមុខនឹងបញ្ហាថ្មីៗ ដោយភាពជឿជាក់ និងមិនសូវព្រួយបារម្ភ។

៥. ស្រឡាញ់ខ្លួនឯង ៖ ផ្ដោតលើតម្រូវការ និងអារម្មណ៍ខ្លួនឯង ដូចជាធ្វើសកម្មភាព ដែលជាចំណង់ចំណូលចិត្តរបស់អ្នក។ ក្រៅពីនេះ អ្នកអាចគេងឱ្យបានគ្រប់គ្រាន់ ញ៉ាំអាហារដែលជួយដល់សុខភាព ស្វែងយល់ពីវិធីគ្រប់គ្រងភាពតានតឹង និងសាកល្បងវិធីសាស្ត្រផ្សេងៗ ដែលជួយឱ្យរាងកាយ និងផ្លូវចិត្តរបស់អ្នកបានសម្រាកដូចជា យូហ្គា សម្មាធិ ការដកដង្ហើមវែងៗ ឬការអធិដ្ឋានជាដើម។

៦. ធ្វើសកម្មភាព ៖ កុំព្រងើយកន្តើយនឹងបញ្ហា។ ចូរស្វែងយល់ពីអ្វីដែលអ្នកត្រូវធ្វើ ដើម្បីដោះស្រាយបញ្ហាទាំងនោះ បន្ទាប់មករៀបចំផែនការ និងធ្វើសកម្មភាព។ ការធ្វើសកម្មភាព ហើយទទួលបានផល នឹងជួយឱ្យអ្នកមានផ្លូវចិត្តប្រសើរឡើង ហើយការគិត និងជីវិតរបស់អ្នកក៏ប្រសើរដូចគ្នា៕