ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ថាមពលចិត្ត និងថាមពលកាយសំខាន់សម្រាប់ការបំពេញការងារ ឬការសិក្សា, នៅក្នុងបរិបទបច្ចុប្បន្ននេះ មានកត្តាច្រើនយ៉ាងដែលអាចឆកទាញយកថាមពលពីក្នុងរាងកាយបានយ៉ាងលឿន តាមរយៈការចុចស្រ្គីនទូរស័ព្ទចុះឡើងៗ ដែលនាំទៅរកការពន្យារពេលអំឡុងកំពុងបំពេញកិច្ចការអ្វីមួយ។ ការបង្កើតទម្លាប់ថ្មីៗ អនុវត្តន៍វិន័យថ្មីៗ មិនមែនងាយស្រួលប៉ុន្មានឡើយចំពោះធម្មជាតិ នៃមនុស្ស ប៉ុន្តែបើមិនកាត់ចោលទម្លាប់ដែលនាំឱ្យជីវិតដុនដាបនោះទេ វានឹងនាំថាមពលរាងកាយថយចុះ ។ យោងតាមគេហទំព័រ Good Men Project បានបង្ហាញទម្លាប់៤ដែលនាំឱ្យទាញថាមពលចុះ ដើម្បីជាការកត់សម្គាល់និងជៀសវាង។
១. គេងមិនស្កប់ស្កល់ ៖ មនុស្សជាច្រើនសុទ្ធតែបានដឹងអំពីឥទ្ធិពលល្អ នៃការគេងគ្រប់គ្រាន់ ហើយពេលខ្លះគេគិតថា គ្រាន់តែប្រើត្រឹមតែ៤ម៉ោងក្នុងមួយថ្ងៃដើម្បីទទួលទានដំណេកក៏វាគ្រប់គ្រាន់ដែរ ខណៈរាងកាយត្រូវការពេលច្រើនជាងនេះយ៉ាងហោចណាស់៨ម៉ោង និងគេងឱ្យបានស្កប់ផងដែរ ដើម្បីឱ្យមានភាពស្រស់ស្រាយ បង្កើនកម្លាំង និងថាមពលរាងកាយបន្ថែម។
ការគេងមិនគ្រប់ ឬមិនស្ងប់ បណ្តាលឱ្យមានអាការៈស្រ្តេសទៀតផង ហើយបើអ្នកមានបញ្ហាជាមួយនឹងការគេង អាចអនុវត្តន៍តាមរយៈវិធីមួយចំនួនដូចជា មុនចូលគេងមិនប្រើភេសជ្ជៈដែលមានជាតិកាហ្វេអ៊ីនយ៉ាងហោចណាស់១០ម៉ោង មិនពិសាអាហារ ឬជាតិអាកុលយ៉ាងហោចណាស់បីម៉ោង ឈប់បន្តកិច្ចការផ្សេងៗពីរម៉ោង និងចាកចេញពីអេក្រង់អេឡិចត្រូនិចនានាមុនពេលគេងយ៉ាងហោចណាស់មួយម៉ោង។
២. សម្លឹងស្រ្គីនយូរពេក ៖ ការចូលគេងទាំងអារម្មណ៍មិនល្អនិងក្រោកមកជាមួយនិងភាពសោកសៅ ឬក្រោកជាមួយសម្លេងរោទ៍ចេញពីទូរស័ព្ទ អាចនឹងទាក់ចិត្តឱ្យកាន់វាហើយចុចចុះ ចុចឡើង រហូតដល់យឺតយ៉ាវក្នុងការបំពេញភារកិច្ចសំខាន់ជាច្រើន។ កត្តានេះ បានចូលរួមចំណែកបំផ្លាញសុភមង្គលយ៉ាងអនេកទៅកាន់ការរស់នៅប្រចាំថ្ងៃ។ ចំណែកឯគន្លឹះ ក្នុងការកាត់បន្ថយ ពីការចំណាយពេលងប់ក្នុងការប្រើប្រាស់ ស្រ្គីន ផ្តើមដោយទុកទូរស័ព្ទឱ្យឆ្ងាយពីដៃ បង្កើតវិន័យក្នុងការប្រើ កំណត់ម៉ោងឱ្យជាក់លាក់ គិតអំពីផលប៉ះពាល់ពីការប្រើស្រ្គីនទូរស័ព្ធលើសលប់ថា តើនឹងជះផលអវិជ្ជមានអ្វីខ្លះទៅកាន់អនាគតដើម្បីជាការដាស់ស្មារតីកុំឱ្យលង់នឹងការប្រើប្រាស់ច្រើនលើសកំណត់។
៣. ផ្ទុកទុកនូវកំហឹង ៖ ខឹងសម្បារនឹងអ្វីមួយគឺជារឿងធម្មជាតិរបស់មនុស្ស ដូច្នេះត្រូវតែបញ្ចេញវាមកក្រៅប៉ុន្តែក្នុងរូបភាពមួយដែលមានផាសុកភាព។ ការផ្ទុកកំហឹងក្នុងខ្លួនពុំបានផ្តល់នូវផលវិជ្ជមានក្នុងរយៈពេលវែងនោះទេ ហើយការផ្ទុកកំហឹងទៀតសោត ប្រៀបដូចជាការផ្ទុកជាតិពុលនៅក្នុងខ្លួនយ៉ាងដូច្នោះដែរ។ ដូច្នេះការចេះអភ័យទោសចំពោះរឿងរ៉ាវដែលបានកើតឡើង ជំនួសឱ្យការផ្ទុកកំហឹង ជាវិធីមួយនាំឱ្យស្ថានការណ៍ដែលបានកើតឡើងកន្លងមកបានធូរស្បើយ ជាងកាលដែលអោបទុកនូវរឿងរ៉ាវមិនល្អ។
៤. មិនធ្វើសកម្មភាពចលនារាងកាយ ៖ ក្នុងស្ថានភាពដ៏មមាញឹក ឬអង្គុយធ្វើការជាច្រើនម៉ោងក្នុងមួយថ្ងៃ ធ្វើឱ្យរាងកាយមានសុខភាពមិនល្អ ស្ពឹកស្រពន់ជាដើម។ ដូច្នេះក្នុងកំឡុងពេលអង្គុយធ្វើការពី៨ម៉ោងទៅ១០ម៉ោងក្នុងមួយថ្ងៃ គឺចាំបាច់ណាស់ត្រូវឱ្យរាងកាយបានអនុវត្តន៍សកម្មភាពទាំងឡាយណាដែលផ្តល់ផលល្អទៅកាន់សុខភាព។ ប្រសិនបើអ្នកមានបញ្ហាជាមួយនឹងការមិនមានទម្លាប់ធ្វើឱ្យរាងកាយសកម្មនោះទេ ជាដំបូងគឺត្រូវស្វែងរកសកម្មភាពណាដែលធ្វើឱ្យអ្នករីករាយជាមុនសិន ឬក៏ដើរហាត់ប្រាណរៀងរាល់ថ្ងៃ ហើយវិធីដែលល្អនោះគឺរៀបចំកាលវិភាគទៅហាត់ប្រាណនៅឯក្លឹបតែម្តង៕
