ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
អារម្មណ៍ភ័យខ្លាច មនុស្សគ្រប់រូបតែងតែជួប ជួនកាលអាចដោយសារយើងខ្វះបទពិសោធន៍ជាមួយរឿងថ្មី ទើបអារម្មណ៍ភ័យខ្លាចតែងកើតឡើង។ ទន្ទឹមគ្នានេះ ការភ័យខ្លាចរបស់យុវជនច្រើនកើតមានឡើងនៅលើវេទិកា កម្មវិធីជួបជុំមនុស្សច្រើន ដែលនាំឱ្យពិបាកក្នុងការនិយាយ ទំនាក់ទំនង ឬបង្ហាញកាយវិកាណាមួយ។
ខាងក្រោមនេះ គឺជាគន្លឹះ៣យ៉ាងដើម្បីជំនះភាពភ័យខ្លាចរបស់យុវជន ដែលបង្ហាញដោយ អ្នកឧកញ៉ា គួច ម៉េងលី អគ្គនាយកប្រតិបត្តិ នៃក្រុមហ៊ុន ម៉េងលី ជេ. គួច អេឌ្យូខេសិន ៖
ទី១. ហ្វឹកហាត់ដកដង្ហើបធំមួយៗ ៖ ប្រសិនយុវជនកើតមានអារម្មណ៍ឆាប់ភ័យនៅពេលជួបមនុស្សច្រើន ឬចូលរួមក្នុងកម្មវិធីណាមួយ អាចសាកល្បងហ្វឹកហាត់ដកដង្ហើមធំមួយៗ បន្ធូរអារម្មណ៍ ឈរឱ្យរឹងពឹងចាប់ដៃច្បាស់លាស់ និងសួរសុខទុក្ខមនុស្សដែលបានជួបឱ្យច្បាស់លាស់។ ការធ្វើរបៀបនេះ អាចជួយកាត់បន្ថយអារម្មណ៍ភ័យខ្លាចបានមួយកម្រិត ហើយក៏ជាវិធីសាស្រ្តសាមញ្ញមួយក្នុងការបំបាត់ភាពភ័យខ្លាច។
ទី២. ត្រូវគិតថា យើងដូចគេ គេក៏ដូចយើង “កុំភ័យ” ៖ មនុស្សគ្រប់រូបនរណាក៏ធ្លាប់ភ័យ ប៉ុន្តែគេចេះគ្រប់គ្រងអារម្មណ៍ភ័យខ្លាចនោះ។ ដូច្នេះ នៅពេលយុវជន សិស្សានុសិស្ស និស្សិត ទៅចូលរួមកម្មវិធីមានមនុស្សច្រើន ត្រូវតាំងចិត្តថា មនុស្សគ្រប់គ្នាសុទ្ធតែដូចជាយើង ត្រូវក្លាហានទំនាក់ទំនង កុំភ័យខ្លាច។ ជាពិសេស រៀនទំនាក់ទំនងមនុស្សម្នាក់ក្នុងរយៈពេល៥នាទី ដោយផ្ដោតលើការណែនាំខ្លួន និងសួរសុខទុក្ខគ្នាទៅវិញទៅមក។
ទី៣. សម្លឹងមើលទៅមនុស្ស ឬរបស់អ្វីមួយដែលមិនធ្វើឱ្យភ័យ ៖ ការសម្លឹងមើលទៅមុខមនុស្សណាម្នាក់ដែលមានឋានៈ ឬតួនាទីធំ ក៏អាចនាំឱ្យមានការភ័យខ្លាចចំពោះយុវជនផ្ទាល់ផងដែរ។ ដូច្នេះ ប្រសិនយុវជនដឹងថាខ្លួនជាមនុស្ស ឆាប់ខ្លាច ឆាប់ភ័យ អាចសម្លឹងមើលទៅទីតាំងណាមួយផ្សេង ដូចជា ជញ្ជាំង ឬមើលត្រឹមថ្ងាសមនុស្ស ដើម្បីកុំឱ្យភ័យ។
គួរជម្រាបជូនថា ថ្វីបើយើងពិបាកយល់ពីមូលហេតុនៃការភ័យខ្លាច ប៉ុន្តែការគេចវេស ជាកត្តាដែលរក្សាការភ័យខ្លាច។ ដូច្នេះ ការរៀនប្រឈមមុខជាមួយការភ័យខ្លាច ដោយមានជំនួយពីថ្នាំពេទ្យ ឬអ្នកជំនាញចិត្តសាស្រ្ត អាចឱ្យយើងយកឈ្នះភាពភ័យខ្លាចបាន។ សូមស្វែងរកការព្យាបាលពីអ្នកជំនាញ បើអ្នកសង្ស័យថាខ្លួនអ្នក ឬមនុស្សដែលអ្នកស្គាល់មានជំងឺភ័យខ្លាច៕
