បណ្តុះទម្លាប់ខ្លួនឯងជាមួយនឹងការអាន លេងកីឡាចម្រុះ និងប្រើប្រាស់ឧបករណ៍ភ្លេងតន្រ្តីច្រើនប្រភេទ ជាចំណែកក្នុងការបង្វឹកបង្ហាត់ខួរក្បាលឱ្យកាន់តែឈ្លាសវៃ។

ការប្រើប្រាស់ថាមពលពេញមួយថ្ងៃដើម្បីវិនិយោគលើកាតព្វកិច្ចការងារ នៅថ្ងៃខ្លះធ្វើឱ្យអ្នកហត់នឿយ និងអស់កម្លាំងខ្លាំង ហើយអ្វីដែលធ្វើបន្ទាប់ក្រោយពេលសម្រាកគឺមានតែអង្គុយទស្សនាភាពយន្ត ដើម្បីឱ្យស្បើយចិត្តខ្លះ។ ប៉ុន្តែនៅមានសកម្មភាព និងទម្លាប់ដទៃទៀត ដែលអាចផ្តល់នូវភាពរីករាយ ហើយថែមទាំងជំរុញ​ឱ្យលោកអ្នកកាន់តែមានភាពឆ្លៀវឆ្លាតបន្ថែមមួយកម្រិតទៀត ដោយមានដូចជា សរសេរកំណត់ហេតុគូរគំនូរ តូរ្យតន្ត្រី លេងកីឡា ដាំផ្កា និងថែទាំសួនរុក្ខជាតិជាដើម។ យ៉ាងណាមិញ តាមរយៈគេហទំព័រ GRAZIA បង្ហាញសកម្មភាពសាមញ្ញៗ ៣ចំណុច ដែលជាដើមចម ជួយឱ្យលោកអ្នក កាន់តែបង្កើនភាពឆ្លៀវឆ្លាតចំពោះសមត្ថភាពខួរក្បាល។

១. អាន ៖ ការអានជួយជំរុញខួរក្បាលឱ្យមានភាពរស់រវើក និងអត្ថប្រយោជន៍ជាច្រើនដូចជា ពង្រឹងសមត្ថភាពគំនិតស្រមើស្រមៃតាមរយៈព័ត៌មានដែលបានអានរួច ថែមទាំងមានសមត្ថភាពយល់ដឹងអំពីអារម្មណ៍អ្នកដទៃតាមរយៈភាសាដែលទទួលជ្រាបអំពីអំណាន និងពង្រីកសមត្ថភាពទំនាក់ទំនងទៅកាន់មនុស្សជុំវិញខ្លួន ហើយអ្វីដែលគួរឱ្យចាប់អារម្មណ៍នោះ គឺ ការបង្កើនភាសាពាក្យពេចន៍ថ្មីៗ ដែលមិនធ្លាប់ប្រើពីមុនមក។  

២. កីឡា ៖ ការហ្វឹកហាត់កីឡាទៀងទាត់ និងមានចម្រុះបែប គឺមិនត្រឹមតែផ្តល់អត្ថប្រយោជន៍ចំពោះសុខភាពរូបរាងកាយប៉ុណ្ណោះទេ វាក៏នាំមកនូវភាពរឹកមាំចំពោះសុខភាពផ្លូវចិត្តទាំងមូល។ ហើយក្រៅតែអំពីសុខភាព កីឡាក៏ជាចំណែកក្នុងការរក្សាផលិតភាពការងារ និងសុខុមាលភាព ភាពអត់ធ្មត់ក្នុងការរស់នៅ ដោយហេតុថា អ្នកដែលអាចហាត់កីឡាទៀងទាត់បាន គឺទាល់តែមានការតាំងចិត្តខ្ពស់ មិនមែនគ្រាន់តែមានកម្លាំងគឺគ្រប់គ្រាន់នោះទេ អ្នកហាត់បានជាប់លាប់តែងមានគោលដៅជាក់លាក់ និងមានទម្លាប់ក្នុងការថែទាំខ្លួនឯងជាប្រចាំ ដែលសកម្មភាពទាំងនេះហើយសុទ្ធសឹងតែបង្កបង្កើតនូវភាពឈ្លាសវៃ។

៣. សាកល្បងឧបករណ៍ភ្លេងតន្រ្តីគ្រប់ប្រភេទ ៖ ឧបករណ៍​ភ្លេងតន្រ្តី មិនត្រឹមតែផ្តល់នូវអារម្មណ៍ស្រស់ស្រាយ និងការបង្កើននូវភាពច្នៃប្រតិដ្ឋ ឬកាត់បន្ថយភាពតានតឹងតែប៉ុណ្ណោះទេ ការលេងតន្ត្រីរួមចំណែកយ៉ាងសំខាន់ក្នុងការផលិតណឺរ៉ូនគ្រប់ប្រភេទ ដែលមាននាទីដឹកនាំព័ត៌មានពីសរសៃប្រសាទទៅកាន់សរីរាង្គមនុស្ស៕