ភ្នំពេញ – កម្ពុជាជាប្រទេសដែលស្ថិតនៅចំកណ្តាលនៃសហគមប្រជាជាតិអាស៊ីអាគ្នេយ៍ ឬតំបន់អាស៊ាន មានទីតាំងភូមិសាស្ត្រអំណោយផង មានសក្តានុពលសេដ្ឋកិច្ចនិងពាណិជ្ជកម្ម មានធនធានធម្មជាតិល្អៗ និងមានធនធានមនុស្សភាគច្រើនជាប្រជាជនសកម្ម ។

តាមទិន្នន័យជំរឿនឆ្នាំ ២០១៩ របស់ក្រសួងផែនការ បានបញ្ជាក់ថា ប្រជាជនកម្ពុជាមានចំនួនជាង ១៥លាននាក់ (១៥ ៥៥២ ២១១នាក់) ហើយបើគិតជាគ្រួសារមានចំនួនជាង ៣លានគ្រួសារ (៣ ៥៥៣ ០២១ គ្រួសារ) ។ ក្នុងនោះមានប្រជាជនប្រមាណជាង ៦លាននាក់ (៦ ១៣៥ ១៩៤ នាក់) ស្ថិតក្នុងតំបន់ទីប្រជុំជន និងជាង ៩លាននាក់ (៩ ១៤៧ ០១៧នាក់ស្ថិត) រស់នៅតំបន់ជនបទ ។

ទិន្នន័យដដែលបានបញ្ជាក់ថា កម្ពុជាមានប្រជាជនអាយុពី ០ ដល់ ១៤ឆ្នាំ ចំនួន ២៩,៤ ភាគរយ និងអាយុចាប់ពី ១៥ ដល់ ៥៩ឆ្នាំ ដល់ទៅ ៦១,៧ភាគរយ ខណៈប្រជាជនអាយុ ៦០ឆ្នាំឡើងទៅមានត្រឹមតែ ៨,៩ភាគរយប៉ុណ្ណោះ ។
តាមរយៈទិន្នន័យនេះ យើងអាចឃើញបានថា កម្ពុជាមានចំនួនប្រជាជនសកម្មច្រើនសម្រាប់បម្រើការងារលើគ្រប់វិស័យទាំងអស់នៃសេដ្ឋកិច្ចជាតិ ។ ចំណុចនេះ ក៏ជាសក្តានុពលមួយផងដែរសម្រាប់ដំណើរការអភិវឌ្ឍ និងជាចំណុចដ៏រឹងមាំក្នុងការទាក់ទាញអ្នកវិនិយោគ ។
ទោះជាយ៉ាងនេះក្តី នៅក្នុងរឿងដ៏គួរឱ្យរីករាយនេះ អ្នកជំនាញផ្នែកអប់រំមួយចំនួនបានមើលឃើញថា ចំណុចសំខាន់មួយក្នុងចំណោមចំណុចនានាដែលរាំងស្ទះដល់ការអភិវឌ្ឍធនធានមនុស្សកម្ពុជាគឺអំពើហិង្សាលើកុមារ ។

ទិន្នន័យដែលចេញដោយក្រសួងកិច្ចការនារី អង្គការ UNICEF ការអង្កេតស្តីពីអំពើហិង្សាលើកុមារនៅឆ្នាំ ២០១៤ បានបញ្ជាក់ថា ការខាតបង់ថវិកាទៅលើផ្នែកសុខភាព ដោយសារអំពើហិង្សាលើកុមារនៅឆ្នាំ ២០១៣ តែមួយប៉ុណ្ណោះ ត្រូវបានគេប៉ាន់ប្រមាណថា ចំណាយអស់ទឹកប្រាក់ប្រមាណ ១៦៨លានដុល្លារអាមេរិក ឬស្មើនឹង១,១% នៃផលិតផលក្នុងស្រុកសរុបរបស់កម្ពុជា (GDP) និងបណ្តាលឱ្យមានផលវិបាករយៈពេលវែងលើកំណើនសេដ្ឋកិច្ច និងការអភិវឌ្ឍន៍សង្គម ។
តើអ្វីជាផលប៉ះពាល់បណ្តាលមកពីអំពើហិង្សា ? សម្រាប់អ្នកជំនាញអប់រំធ្វើការងារពាក់ព័ន្ធនឹងសិទ្ធិកុមារបានបញ្ជាក់ថា អំពើហិង្សាលើកុមារពិតជាមានផលប៉ះពាល់ដល់ការអភិវឌ្ឍធនធានមនុស្ស ព្រោះកាលណាកុមារទទួលរងអំពើហិង្សា គាត់មិនមែនប៉ះពាល់តែផ្នែកសុខភាពផ្លូវកាយប៉ុណ្ណោះទេ តែក៏អាចប៉ះពាល់ផ្លូវចិត្តផងដែរ។
លោក ឆាយ វាសនា ប្រធានគ្រប់គ្រងកម្មវិធីកិច្ចការពារ និងការចូលរួមរបស់កុមារនៃអង្គការទស្សនៈពិភពលោក (World Vision) មានប្រសាសន៍ថា ៖
“ដោយសារតែកុមារកម្ពុជាមួយចំនួនទទួលរងអំពើហិង្សា ធ្វើឱ្យគាត់ខ្វះភាពក្លាហាន មិនសូវហ៊ានសម្រេចចិត្ត អៀនប្រៀនច្រើន និងមិនសូវមានគំនិតបង្កើតថ្មី ដែលធ្វើឱ្យអនាគតទៅគាត់ក្លាយជាធនធានមនុស្សដែលមិនសូវមានសមត្ថភាពខ្លាំងសម្រាប់អភិវឌ្ឍស្ថាប័នដែលគាត់បម្រើការងារ ឬលំបាកប្រកួតប្រជែងជាមួយធនធានមនុស្សមកពីតំបន់ដទៃ”
“អំពើហិង្សាវាធ្វើឱ្យប៉ះពាល់ដល់ជីវភាពគ្រួសារ ប៉ះពាល់ដល់ចំណូលសេដ្ឋកិច្ច ឧទាហរណ៍ថា កូនឈឺត្រូវយកកូនទៅពេទ្យព្យាបាល ពេលនោះត្រូវអស់លុយ ហើយខាតពេលវេលា ខាតទាំងថវិកា ដោយសារយើងត្រូវចំណាយលុយព្យាបាលកូន”
នេះជាការបញ្ជាក់បន្ថែមរបស់លោកជំទាវ សម្បត្តិ សុគន្ធា អគ្គលេខាធិការរង នៃក្រុមប្រឹក្សាជាតិដើម្បីកុមារ ។
តាមរយៈរបាយការណ៍ស្តីពីការរកឃើញស្តីពីអំពើហិង្សាលើកុមារក្នុងប្រទេសកម្ពុជា ក្នុងឆ្នាំ២០១៣ របស់ក្រសួងកិច្ចការនារី អង្គការយូនីសេហ្វកម្ពុជា និងមជ្ឈមណ្ឌលសហរដ្ឋអាមេរិកសម្រាប់ការត្រួតពិនិត្យនិងបង្ការជំងឺ បានឱ្យដឹងថា កុមារភាគច្រើនមានអាយុចន្លោះពី ១៣ ទៅ១៧ ឆ្នាំ រាយការណ៍ថា ធ្លាប់ឆ្លងកាត់អំពើហិង្សាលើរាងកាយ ក្នុងនោះមាន ៦១,១% ជាក្មេងស្រី និង ៥៨,២% ជាក្មេងប្រុស។
ចំណែកផែនការសកម្មភាពដើម្បីទប់ស្កាត់ និងឆ្លើយតបចំពោះអំពើហិង្សាលើកុមារ ២០១៧-២០២១ របស់ក្រសួងសង្គមកិច្ច អតីតយុទ្ធជន និងយុវនីតិសម្បទា បានបញ្ជាក់ថា ភាគច្រើននៃកុមារដែលធ្លាប់ឆ្លងកាត់អំពើហិង្សា បានបញ្ជាក់ថា ឪពុកម្តាយជាពិសេសម្តាយ អ្នកថែទាំ និងសមាជិកក្រុមគ្រួសារដែលពេញវ័យផ្សេងទៀតគឺជាអ្នកប្រព្រឹត្តញឹកញាប់ជាងគេ សម្រាប់អំពើហិង្សាលើរាងកាយ ផ្លូវចិត្ត និងផ្លូវភេទមកលើកុមារ។ តាមពិត “ផ្ទះ” ជាទីកន្លែងដែលកុមាររងអំពើហិង្សាច្រើនជាងគេ ដែលភាគច្រើនបំផុតគឺការដាក់ទ័ណ្ឌកម្មលើរាងកាយ និងផ្លូវចិត្ត ។
ត្រង់ចំណុចនេះ លោកជំទាវ សម្បត្តិ សុគន្ធា អគ្គលេខាធិការរង នៃក្រុមប្រឹក្សាជាតិដើម្បីកុមារ មានប្រសាសន៍បញ្ជាក់ថា ការ អំពើហិង្សាលើកុមារអាចលុបបំបាត់បានដោយចាប់ផ្តើមចេញពីសមាជិកគ្រួសារនីមួយៗចូលរួម ។
លោកជំទាវ សម្បត្តិ សុគន្ធា អគ្គលេខាធិការរង នៃក្រុមប្រឹក្សាជាតិដើម្បីកុមារ ៖
“គ្រួសារមួយចំនួនគិតថា កាលណាគាត់មិនវាយកូន កូននឹងមិនស្ដាប់ រហូតវាយកូនក្លាយជាទម្លាប់ ហើយគិតថាបើកូនមានកំហុសដាច់ខាតវាយកូន ។ បើយើងគិតឱ្យស៊ីជម្រៅ អំពើហិង្សាលើកុមារមិនមែនជាជំងឺតពូជនោះទេ វាមកពីការប្រព្រឹត្តរបស់ម្តាយឪពុក វាមិនមែនជាជំងឺដែលមិនអាចព្យាបាលបាននោះទេ”
ក្រៅពីមជ្ឈដ្ឋានផ្ទះ គ្រូបង្រៀន (ជាពិសេសគឺគ្រូប្រុស) គឺជាអ្នកប្រព្រឹត្តអំពើហិង្សាលើរាងកាយ ញឹកញាប់ជាងគេបំផុត។ ក្មេងប្រុសស្រីជាងពាក់កណ្តាលដែលមានអាយុចន្លោះពី ១៣ ទៅ ១៧ ឆ្នាំ បានរាយការណ៍ថាធ្លាប់ឆ្លងកាត់អំពើហិង្សាលើរាងកាយដែលប្រព្រឹត្តដោយគ្រូប្រុស (ក្នុងនោះក្មេងស្រី ៥៨,៦% និងក្មេងប្រុស ៥១,៧%) យ៉ាងហោចមួយលើក ហើយ២៩% នៃកុមារដែលមានអាយុពី ១២ ដល់ ១៥ឆ្នាំ មានការឆ្លងកាត់ដោយផ្ទាល់នូវការដាក់ទណ្ឌកម្មលើរាងកាយដោយគ្រូបង្រៀនក្នុងរយៈកាល ១២ខែ ចុងក្រោយនេះ។ នេះបើតាមការអង្កេតស្តីពីហិង្សាលើកុមារនៅកម្ពុជា ឆ្នាំ២០១៣ របស់ក្រសួងកិច្ចការនារី ។
ទោះជាយ៉ាងនេះក្តី យើងឃើញថា ប្រសិនបើយើងអាចទប់ស្កាត់បញ្ហាអសកម្មទាំងអស់នេះបាន កម្ពុជានឹងចំណេញជាច្រើនក្នុងផ្នែកសេដ្ឋកិច្ច ។ អ្នកជំនាញកុមារ បានបកស្រាយបន្តថា ប្រសិនបើយុវជនជាអ្នកបន្តវេន បានជៀសផុតពីអំពើហិង្សាគ្រប់ទម្រង់ក្នុងការអប់រំ ទាំងនៅផ្ទះ និងនៅសាលារៀននោះកុមារទាំងអស់នឹងក្លាយជាធនធានដែលមានថាមពល មានភាពរឹងមាំផ្នែកផ្លូវចិត្ត និងគំនិតបង្កើតថ្មីសម្រាប់ចូលរួមយ៉ាងសកម្មលើគ្រប់វិស័យទាំងអស់នៅថ្ងៃអនាគត ។ កុមារកម្ពុជាជាច្រើន ក៏នឹងក្លាយជាធនធានដែលមានសមត្ថភាពប្រកួតប្រជែងជាសកលទាំងផ្នែកវិទ្យសាស្ត្រ បច្ចេកវិទ្យា វិស្វកម្ម សិល្បៈ និងគណិតវិទ្យា (STEAM) ។ កម្ពុជានឹងសំបូរធនធានប្រកបដោយបញ្ញាញាណ អត្តចរិត ភាពជាអ្នកដឹកនាំ និងឆ្លើយតបបានជាមួយតម្រូវការនាសតវត្សទី២១ នេះ ។
ហេតុនេះហើយទើបក្រុមប្រឹក្សាជាតិដើម្បីកុមារ (CNCC) បានរៀបចំផែនការសកម្មភាពជាច្រើនដើម្បីចូលរួមចំណែកជាយន្តការថ្នាក់ជាតិ និងតាមដានបន្តដល់ថ្នាក់ក្រោមជាតិ ដើម្បីអនុវត្តឱ្យបានខ្ជាប់ខ្ជួនលើសកម្មភាពលុបបំបាត់ហិង្សាលើកុមារ ។
ប្រសិនបើកុមារកម្ពុជា ភាគច្រើនបំផុតត្រូវបានគាំពារ និងជៀសផុសតពីអំពើហិង្សា ពួកគាត់នឹងមានថាមពលផ្លូវចិត្តកាន់តែខ្លាំងដើម្បីក្លាយជាកោសិកាយ៉ាងរឹងមាំសម្រាប់ទ្រទ្រង់ឱ្យគ្រប់ផ្នែកក្នុងសេដ្ឋកិច្ច ។ នៅពេលនោះ ផលិតភាពការងារ ភាពច្នៃប្រឌិដ្ឋ និងសក្តានុពលរបស់ពួកគេនឹងក្លាយជាកម្លាំងចលករយ៉ាងមានថាមពលសម្រាប់ជំរុញកម្ពុជាឱ្យសម្រេចគោលដៅសំខាន់ ក្លាយជាប្រទេសចំណូលមធ្យមកម្រិតខ្ពស់នៅឆ្នាំ ២០៣០ និងក្លាយជាប្រទេសអភិវឌ្ឍក្នុងឆ្នាំ ២០៥០ ។
“ការប្រព្រឹត្ត ឬការធ្វើគំរូបែបអហិង្សាមានន័យថា កុំយកដៃប៉ះដៃកុំយកជើងប៉ះជើង ! វាជាគំរូល្អមួយដើម្បីជំរុញឱ្យកុមារមើលគំរូតាមមនុស្សចាស់ ។ គ្មានអំពើហិង្សាបង្ហាញថា កុមារកម្ពុជារស់នៅក្នុងសង្គមមួយដែលមានផ្ដល់ភាពក្តៅ”
លោកជំទាវ សម្បត្តិ សុគន្ធា បញ្ជាក់
តាមរយៈទិន្នន័យ និងការបង្ហាញរបស់អ្នកជំនាញ យើងមើលឃើញថា អំពើហិង្សាលើកុមារ ពិតជាឧបសគ្គចម្បងរាំងស្ទះដល់ការអភិវឌ្ឍផ្នែកសង្គមនិងសេដ្ឋកិច្ច ប៉ុន្តែរនាំងនេះមានវិធីជាច្រើនដើម្បីលុបបំបាត់ ហើយទាញយកផលចំណេញយ៉ាងច្រើនសម្រាប់ការអភិវឌ្ឍនៅថ្ងៃអនាគត ។
សូមជម្រាបថា រាជរដ្ឋាភិបាលកម្ពុជាបាននឹងកំពុងពង្រឹងប្រព័ន្ធការពារកុមារតាមរយៈគោលនយោបាយថ្មីៗ ហើយតាមរយៈការប្រែក្លាយជា “ប្រទេសត្រួសត្រាយផ្លូវ” របស់កម្មវិធីភាពជាដៃគូសកល ដើម្បីបញ្ចប់អំពើហិង្សាលើកុមារ ។ ក្នុងគោលដៅអភិវឌ្ឍន៍ប្រកបដោយចីរភាព SDGs គោលដៅទី១៦.២ បញ្ចប់ការរំលោភបំពាន និងកេងប្រវ័ញ្ចការជួញដូរនិងគ្រប់ទម្រងទាំងអស់នៃអំពើហិង្សា និងការដាក់ទណ្ឌកម្មកុមារ ។
ការលុបបំបាត់អំពើហិង្សាលើកុមារ មិនមែនជាតួនាទីរបស់រាជរដ្ឋាភិបាល ឬប្រជាជនតែមួយមុខនោះទេ តែត្រូវការចូលរួមពីគ្រប់ផ្នែកទាំងអស់ ទាំងអាជ្ញាធរជាតិ អាជ្ញាធរថ្នាក់ក្រោមជាតិ អង្គការសង្គមស៊ីវិល វិស័យឯកជន សាលារៀន និងក្រុមគ្រួសារទាំងអស់នៅក្នុងប្រទេស៕

ជីវប្រវត្តិ: លោក ម៉ៅ សំណាង ជាការីនិពន្ធផ្នែកអប់រំ និងជាផលិតករព័ត៌មាននៃ AMS Education ។ លោកមានបទពិសោធន៍ការងារជាអ្នកសារព័ត៌មានវិទ្យុ, ពិធីករ និងជាអ្នករាយការណ៍ព័ត៌មានទូរទស្សន៍, និងជាផលិករប្រព័ន្ធផ្សព្វផ្សាយចម្រុះ។
របាយការណ៍ថ្មី
មើលទាំងអស់ ➧
គរុនិស្សិតថ្នាក់បរិញ្ញាបត្រ+២ ផ្អែកលើកិច្ចព្រមព្រៀងការងារ ជំនាន់ទី១ ជាង ២ពាន់នាក់ បញ្ចប់វគ្គបណ្តុះបណ្តាល ត្រៀមចុះបង្រៀនតាមសាលាគោលដៅ
បទយកការណ៍, ព័ត៌មានជាតិ, ព័ត៌មានជាតិ, ព័ត៌មានជាតិ និងអន្តរជាតិ, ព័ត៌មានជាតិ និងអន្តរជាតិ, ព្រឹត្តិការណ៍
• 20/11/2026

វិធីសាស្រ្ត ៤ ដើម្បីការពារ និងគ្រប់គ្រងអាការៈ Burnout
ចំណេះជីវិត, បទយកការណ៍, ព្រឹត្តិការណ៍
• 13/04/2026

ការប្រើគ្រឿងស្រវឹងអាចបំផ្លាញខួរក្បាល ដែលរួមចំណែកនាំឱ្យមានជំងឺវង្វេង
បទយកការណ៍, ព័ត៌មានអន្តរជាតិ, ព្រឹត្តិការណ៍
• 13/04/2026
ព័ត៌មានទូទៅ
មើលទាំងអស់ ➧
ឱកាសអាហារូបករណ៍ជំនាញវិជ្ជាជីវៈនៅវិទ្យាស្ថានពហុបច្ចេកទេសភូមិភាគតេជោសែនបាត់ដំបង ចំនួន៥១០កន្លែង
ព័ត៌មានអាហារូបករណ៍, ព្រឹត្តិការណ៍
• 12/03/2024
វិទ្យាស្ថានពហុបច្ចេកទេសភូមិភាគតេជោសែនបាត់ដំបង ប្រកាសផ្តល់អាហាររូបករណ៍សិក្សាជំនាញវិជ្ជាជីវៈ ចំនួន៥១០កន្លែង សម្រាប់យុវជន យុវនារីដែលមកពីគ្រួសារក្រីក្រ គ្រួសារងាយរងហានិភ័យ...

ឱកាសសម្រាប់និស្សិតជំនាញនីតិសាស្រ្ត និងព័ត៌មានវិទ្យា ចូលហាត់ការនៅអគ្គលេខាធិការដ្ឋានក្រសួងអប់រំ
ព័ត៌មានអាហារូបករណ៍, ព្រឹត្តិការណ៍
• 22/04/2026
ជាឱកាសសម្រាប់និស្សិតទាំងពីរភេទដែលកំពុងសិក្សាជំនាញនីតិសាស្រ្ត និងព័ត៌មានវិទ្យា, អគ្គលេខាធិការដ្ឋាន ក្រសួងអប់រំ យុវជន និងកីឡា កំពុងជ្រើសរើសមន្រ្តីហាត់ការមកបម្រើការងារចំនួន ៨រូប ក្នុងនោះជំនាញនីតិសាស្រ្ត...

អាហារូបករណ៍ថ្នាក់បរិញ្ញាបត្រ និងបរិញ្ញាបត្រជាន់ខ្ពស់ ១០កន្លែងនៅសាកលវិទ្យាល័យលីមកុកវីង
ព័ត៌មានអាហារូបករណ៍, ព្រឹត្តិការណ៍
• 18/12/2023
ជាឱកាសសម្រាប់សិស្សនិស្សិតដែលកំពុងស្វែងរកអាហារូបករណ៍សិក្សាថ្នាក់បរិញ្ញាបត្រ និងបរិញ្ញាបត្រជាន់ខ្ពស់ នៅសាកលវិទ្យាល័យលីមកុកវីង ពេលនេះ គណៈកម្មាធិការអាហារូបករណ៍...

អាហារូបករណ៍សិក្សាជំនាញវិជ្ជាជីវៈនៅវិទ្យាស្ថានអភិវឌ្ឍន៍មុខជំនាញកម្ពុជា-ថៃ
ព័ត៌មានអាហារូបករណ៍, ព្រឹត្តិការណ៍
• 23/04/2024
ឱកាសសិក្សាជំនាញវិជ្ជាជីវៈជាច្រើនកន្លែងនៅវិទ្យាស្ថានអភិវឌ្ឍន៍មុខជំនាញកម្ពុជា-ថៃកម្រិតសញ្ញាបត្របច្ចេកទេស និងវិជ្ជាជីវៈ១(កម្មវិធី១,៥លាននាក់).....

ឱកាសសិក្សាវគ្គខ្លីតាម Online ពីសាកលវិទ្យាល័យ Boston ឆ្នាំសិក្សា២០២៥-២០២៦
ព័ត៌មានអាហារូបករណ៍, ព្រឹត្តិការណ៍
• 02/04/2025
សាកលវិទ្យាល័យអន្តរជាតិ Boston នៅរដ្ឋMassachusetts នៃសហរដ្ឋអាមេរិក ប្រកាសផ្ដល់ការសិក្សាវគ្គខ្លី តាមរយៈ Online សម្រាប់ឆ្នាំសិក្សា២០២៥-២០២៦។ កម្មវិធីសិក្សា មានផ្ដល់ជូនសញ្ញាបត្របញ្ជាក់ការសិក្សាក្រោយសិស្សរៀនចប់។

ឱកាសផ្លាស់ប្ដូរការសិក្សានៅសាកលវិទ្យាល័យ Yale ពីកម្មវិធី Yale Young Scholars ឆ្នាំ២០២៥
ព័ត៌មានអាហារូបករណ៍, ព្រឹត្តិការណ៍
• 25/12/2024
កម្មវិធីអាហារូបករណ៍ Yale Young Scholars (YYGS) ផ្ដល់ឱកាសផ្លាស់ប្ដូរការសិក្សានៅសាកលវិទ្យាល័យ Yale ចំនួន២សប្ដាហ៍សម្រាប់និស្សិតអន្តរជាតិទាំងអស់ដែលមានអាយុចាប់ពី១៦ឆ្នាំ ដល់១៨ឆ្នាំ សិក្សានៅសហរដ្ឋអាមេរិក។

អតីតពលករវិលត្រឡប់មកពីប្រទេសថៃ, វិទ្យាស្ថានពហុបច្ចេកទេសភូមិភាគតេជោសែនសៀមរាប ផ្តល់អាហារូបករណ៍ជិត៣ពាន់កន្លែង សិក្សាជំនាញឥតគិតថ្លៃ
ព័ត៌មានអាហារូបករណ៍, ព្រឹត្តិការណ៍
• 12/05/2026
ជាឱកាសសម្រាប់បងប្អូនអតីតពលករវិលត្រឡប់មកពីប្រទេសថៃ ពេលនេះវិទ្យាស្ថានពហុបច្ចេកទេសភូមិភាគតេជោសែនសៀមរាប ដែលជាគ្រឹះស្ថានសាធារណៈស្ថិតនៅក្រោមក្រសួងការងារ និងបណ្តុះបណ្តាលវិជ្ជាជីវៈ...

អាហារូបករណ៍ថ្នាក់ឧត្ដមសិក្សានៅសាកលវិទ្យាល័យបច្ចេកវិទ្យា Nanyang នៃប្រទេសសឹង្ហបុរី ឆ្នាំសិក្សា២០២៦
ព័ត៌មានអាហារូបករណ៍, ព្រឹត្តិការណ៍
• 18/07/2025
ឱកាសសិក្សាអាហារូបករណ៍ថ្នាក់បរិញ្ញាបត្រ បរិញ្ញាបត្រជាន់ខ្ពស់ និងថ្នាក់បណ្ឌិត នៅសាកលវិទ្យាល័យបច្ចេកវិទ្យា Nanyang នៃប្រទេសសឹង្ហបុរី សម្រាប់ឆ្នាំសិក្សា២០២៦។ អាហារូបករណ៍...

កម្មវិធី Women Innovators ជ្រើសរើសនិស្សិតស្រី និងស្រ្តី ចូលរួមវគ្គបណ្តុះបណ្តាលពីបច្ចេកវិទ្យា ភាពជាអ្នកដឹកនាំ និងសហគ្រិនភាព
ព័ត៌មានអាហារូបករណ៍, ព្រឹត្តិការណ៍
• 26/03/2025
កម្មវិធី Women Innovators Bootcamp ក្រោមកម្មវិធី SparkMeet រដូវកាលទី៤ បានប្រកាសជ្រើសរើសនិស្សិតស្រី និងស្រ្តី ចូលរួមវគ្គបណ្តុះបណ្តាលពីបច្ចេកវិទ្យា ភាពជាអ្នកដឹកនាំ និងសហគ្រិនភាព រយៈពេល ៦សប្តាហ៍...

































































