ទិវាជាតិអប់រំបណ្ដុះបណ្ដាលបច្ចេកទេស និងវិជ្ជាជីវៈ លើកទី៧ ឆ្នាំ២០២៤ ក្រោមប្រធានបទ «TVET រៀនឱ្យចប់ ឱ្យចេះ ឱ្យមានការងារ» កំពុងប្រព្រឹត្តទៅ​នៅមជ្ឈមណ្ឌលសន្និបាត និងពិព័រណ៌កោះពេជ្រ រយៈពេល២ថ្ងៃ។ យុវជនដែលបានចូលរួមក្នុងទិវានេះ បានបង្ហាញអារម្មណ៍រីករាយ ដោយថា ទិវាជាតិនេះធ្វើ​ឱ្យ​គេ​ទទួលបានចំណេះដឹងថ្មីៗ ស្គាល់ជំនាញបច្ចេកទេសវិជ្ជាជីវៈ ឱកាសសិក្សា និងការងារជាច្រើនស្របតាមតម្រូវការទីផ្សារការងារ។

យុវតី តាំង ជូមិ ជាសិស្សនៃសាលារៀនវ៉េស្ទឡាញន៍ បាននិយាយថា រូបគេពិតជាមានអារម្មណ៍រីករាយដែលបានចូលរួមក្នុងទិវាជាតិអប់រំបណ្ដុះបណ្ដាលបច្ចេកទេស និងវិជ្ជាជីវៈ លើកទី៧នេះ ព្រោះជាកម្មវិធីមួយដែលអាចឱ្យសិស្សានុសិស្សបានស្វែងយល់អំពីជំនាញសិក្សាថ្មីៗ ជាពិសេសជំនាញ TVET ដែលកំពុងមានតម្រូវការទីផ្សារការងារខ្ពស់។

សិស្សនៃសាលារៀនវេសន៍ឡាញ រូបនេះ បញ្ជាក់បន្ថែម កម្មវិធីថ្ងៃនេះ ពិតជាមានសារៈសំខាន់សម្រាប់សិស្សានុសិស្ស ក៏ដូចជានិស្សិតទូទៅ ដើម្បីចូលរួមផ្លាស់ប្ដូរបទពិសោធន៍គ្នាទៅវិញទៅមក ឃើញការរីកចម្រើននៃបច្ចេកវិទ្យាថ្មីៗ និងបណ្ដុះគំនិតក្នុងការចាប់យកជំនាញទាំងនោះតាមរយៈការខិតខំរៀនសូត្រនៅសាលា និងចុះអនុវត្តផ្ទាល់។

យុវតី តាំង ជូមិ ក៏បានលើកទឹកចិត្តដល់យុវជន ក៏ដូចជាសិស្សានុសិស្សទាំងអស់ឱ្យចូលរួមក្នុងទិវាជាតិអប់រំបណ្ដុះបណ្ដាលបច្ចេកទេស និងវិជ្ជាជីវៈ លើកទី៧នេះ ព្រោះមានជំនាញជាច្រើនដែលសិស្សានុសិស្សអាចស្វែងយល់បន្ថែម និងអាចជួយតម្រង់ទិសក្នុងការចាប់យកជំនាញនៅថ្ងៃអនាគត។

យុវតី ចំរើន ម៉ាលីនីន​ ជានិស្សិតឆ្នាំទី៥ ជំនាញវិស្វកម្មអគ្គីសនី នៃវិទ្យាស្ថានពហុបច្ចេកទេសព្រះកុសុមៈ លើកឡើងថា រូបគេមានអារម្មណ៍រំភើបជាខ្លាំងដែលបានចូលរួមក្នុងទិវាជាតិអប់រំបណ្ដុះបណ្ដាលបច្ចេកទេស និងវិជ្ជាជីវៈ លើកទី៧នេះ​ ព្រោះនេះជាលើកទីមួយហើយដែលបានចូលរួម ព្រមទាំងបានឃើញអំពីភាពរីកចម្រើននៃស្នាដៃរបស់សិស្ស និស្សិត រួមមាន ការបង្កើតរ៉ូបូត មនុស្សយន្ត ប្រព័ន្ធបច្ចេកវិទ្យាជួយដល់វិស័យកសិកម្ម និងពិព័រណ៌ស្នាដៃជាច្រើនទៀត។

និស្សិតឆ្នាំទី៥ ជំនាញវិស្វកម្មអគ្គីសនី នៃវិទ្យាស្ថានពហុបច្ចេកទេសព្រះកុសុមៈ រូបនេះ បញ្ជាក់បន្ថែមថា ប្រធានបទ «TVET រៀនឱ្យចប់ ឱ្យចេះ ឱ្យមានការងារ» នេះ​ ពិតជាសំខាន់ក្នុងការជំរុញឱ្យសិស្សានុសិស្សខិតខំប្រឹងប្រែងរៀនសូត្រឱ្យមានចំណេះដឹងពិតប្រាកដ មានជំនាញមួយច្បាស់លាស់ ដើម្បីមានការងារសម្រាប់ជាមុខរបរចិញ្ចឹមជីវិតឱ្យបានប្រសើរ។

យុវតី ម៉ាលីនីន ក៏បានលើកទឹកចិត្តដល់សិស្សានុសិស្ស និងយុវជនគួរមកចូលរួមក្នុងទិវាជាតិអប់រំបណ្ដុះបណ្ដាលបច្ចេកទេស និងវិជ្ជាជីវៈ លើកទី៧នេះ ដើម្បីទទួលបានព័ត៌មានសំខាន់ៗទាក់ទងនឹងជំនាញសិក្សា ក៏ដូចជាឱកាសការងារក្រោយរៀនចប់ និងលើកទឹកចិត្តដល់សិស្ស និស្សិត បន្តបង្កើតស្នាដៃថ្មីៗ​ដែលប្រើប្រាស់បច្ចេកវិទ្យា មកតាំងបង្ហាញក្នុងកម្មវិធីឱ្យបានច្រើនបន្ថែមទៀត។

ចំណែក យុវជន សំអាត វរៈយុត្ត ជានិស្សិតសិក្សាជំនាញឧស្សាហកម្មគ្រឿងយន្ត នៃវិទ្យាស្ថានពហុបច្ចេកទេសកម្ពុជា បានឱ្យដឹងថា រូបគេមានអារម្មណ៍សប្បាយរីករាយជាខ្លាំងដែលបានចូលរួមកម្មវិធីនេះ ព្រោះបានទទួលបទពិសោធន៍ថ្មីៗ ឱកាសការងារផ្សេងៗ និងបានឃើញពីការតាំងពិព័រណ៍ស្នាដៃសិស្ស និស្សិតតាមសាលានីមួយៗផងដែរ។

និស្សិតសិក្សាជំនាញឧស្សាហកម្មគ្រឿងយន្ត រូបនេះ បញ្ជាក់បន្ថែមថា យុវជន សិស្សានុសិស្ស គួរចូលរួមកម្មវិធីទិវាជាតិអប់រំបណ្ដុះបណ្ដាលបច្ចេកទេស និងវិជ្ជាជីវៈ ដើម្បីស្វែងយល់អំពីជំនាញជាច្រើន ដែលសិក្សារយៈពេលខ្លី ទទួលបានជំនាញច្បាស់លាស់ និងមានឱកាសការងារខ្ពស់។ ទន្ទឹមគ្នានេះ ចំពោះសិស្សានុសិស្សដែលមកពីគ្រួសារខ្វះខាត អាចចូលរួមដោយឥតគិតថ្លៃ មានឱកាសការងារអាចចិញ្ចឹមជីវិតបាន។

គួរជម្រាបជូនថា ទិវាជាតិអប់រំបណ្ដុះបណ្ដាលបច្ចេកទេស និងវិជ្ជាជីវៈ លើកទី៧ ឆ្នាំ២០២៤ រៀបចំឡើងរយៈពេល២ថ្ងៃ ពីថ្ងៃទី១៥-១៦ ខែមិថុនា ឆ្នាំ២០២៤ ចាប់ពីម៉ោង ៨:០០នាទី ដល់ម៉ោង ២០:០០នាទី នៅ​មជ្ឈមណ្ឌល​ពិពរណ៍ និងសន្និបាតកោះពេជ្រ៕