ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
យុវជន យុវនារីជាច្រើនបានមកចុះឈ្មោះនៅស្តង់ពិព័រណ៌របស់មជ្ឈមណ្ឌលវាយតម្លៃសមត្ថភាព ព្រះកុសុមៈ អំពីការវាយតម្លៃសមត្ថភាព ហៅថា RPL ។ ក្នុងឱកាសនេះ យុវជនពីររូបដែលបានចុះឈ្មោះចូលរួមតេស្តវាយតម្លៃសមត្ថភាពបានសម្ដែងចំណាប់អារម្មណ៍រីករាយរបស់ខ្លួនដែលបានធ្វើតេស្តដែលមិនធ្លាប់មាននេះ។
លោក ហេង មករា ជាអ្នកគ្រប់គ្រងរោងពុម្ព បានមកសាកល្បងធ្វើតេស្តផ្នែករចនាក្រាហ្វិកដោយកុំព្យូទ័របានសម្ដែងភាពរីករាយនៅពេលដែលបានចូលរួមតេស្តសមត្ថភាព ឬហៅកាត់ថា RPL នេះ ព្រោះបានដឹងពីសមត្ថភាពរបស់ខ្លួនឯងថា វិវត្តន៍ដល់កម្រិតណា ដើម្បីអភិវឌ្ឍន៍ខ្លួនឯងបន្ថែម ឬអាចមានសមត្ថភាពគ្រប់គ្រាន់ដែលអាចទទួលបានវិញ្ញាបនបត្រហើយ ឬនៅ។
លោក ហេង មករា បន្តថា កម្មវិធីតេស្តសមត្ថភាពនេះ ពិតជាផ្ដល់សារៈសំខាន់សម្រាប់ខ្លួន និងប្រជាជនខ្មែរដទៃទៀតដែលអាចយកវិញ្ញាបនបត្របញ្ជាក់ជំនាញនេះស្វែងរកការងារធ្វើកាន់តែប្រសើរ ព្រោះមានការទទួលស្គាល់ពីមជ្ឈមណ្ឌលវាយតម្លៃសមត្ថភាព ។
ជាមួយគ្នានេះ លោក រ៉េត រ៉ាវី ជាបេក្ខជនម្នាក់ដែលបានចូលរួមធ្វើតេស្តវាយតម្លៃសមត្ថភាព RPL បានបង្ហាញពីអារម្មណ៍សប្បាយរីករាយដែលបានតេស្តវាយតម្លៃសមត្ថភាពអំពីជំនាញរបស់ខ្លួនឯង។ លើសពីនេះ រ៉ាវី បានមើលឃើញចំណុចល្អចំនួនពីរ ដោយទីមួយអាចមានជំនាញច្រើនដែលអាចធ្វើតេស្តលើកុំព្យូទ័របាន និងទីពីរ ក្រោយធ្វើតេស្តចប់ និងមានសមត្ថភាពគ្រប់គ្រាន់ បេក្ខជនអាចស្នើសុំវិញ្ញាបនបត្របញ្ជាក់សមត្ថភាពដែលចេញពីក្រសួងការងារ និងបណ្ដុះបណ្ដាលវិជ្ជាជីវៈផងដែរ។
និយាយដោយរីករាយ លោក រ៉េត រ៉ាវី បានបន្តថា ត្បិតការធ្វើតេស្តលើកនេះមិនទទួលបានលទ្ធផលល្អ ឬជាប់ ប៉ុន្តែ រ៉ាវី សប្បាយចិត្តដែលបានដឹងពីសមត្ថភាពខ្លួនឯង និងខិតខំបន្ថែមសមត្ថភាពខ្លួនឯងទាំងទ្រឹស្ដី និងការអនុវត្តន៍ផ្ទាល់ដើម្បីធ្វើតេស្តវាយតម្លៃម្ដងទៀតនៅពេលក្រោយ។
ជាចុងក្រោយ បេក្ខជនទាំងពីររូបនេះសូមលើកទឹកចិត្តដល់ប្រជាពលរដ្ឋខ្មែរគ្រប់រូប ជាពិសេសអ្នកដែលកំពុងធ្វើការក្នុងជំនាញផ្សេងៗដែលចេះមកពីការចេះតពីគ្នា ឬចេះបែបប្រពៃណី គួរតែសាកល្បងដើម្បីទទួលបានវិញ្ញាបនបត្របញ្ជាក់ជំនាញហើយកាន់តែងាយស្រួលក្នុងការស្វែងរកការងារធ្វើ និងឱកាសបន្ថែមសមត្ថភាពខ្លួនឯងកាន់តែប្រសើរ៕
